គ្រួសារជនរងគ្រោះដោយសារធ្លាក់ដែកចំក្បាល ដកពាក្យបណ្តឹង តែសំណុំរឿងនៅតែបន្ត
ភាគីខាងជនរងគ្រោះដែលស្លាប់ដោយសារការធ្លាក់កំណាត់ដែកចំក្បាល បានយល់ព្រមដកពាក្យបណ្តឹង ពីក្រុមហ៊ុន ICOC ក្រោយពីមានការផ្តល់សំណង៦ម៉ឺនដុល្លាអាមេរិក។ ប៉ុន្តែ បើតាមច្បាប់ សំណងនេះ គ្រាន់តែជាការទទួលខុសត្រូវ ខាងបណ្តឹងរដ្ឋប្បវេណីប៉ុណ្ណោះ ចំណែកឯបណ្តឹងអាជ្ញានៅមិនទាន់បញ្ចប់នោះទេ ។ ហើយនៅចំពោះមុខ កម្មករសំណង់៥នាក់ ត្រូវបានចាប់ខ្លួន ចំណែកឯការដ្ឋានសំណង់ក៍ត្រូវផ្អាកការសាងសង់ ជាបណ្តោះអាសន្ន។
ចុះផ្សាយនៅថ្ងៃ៖
ស្តាប់ - ០២:២៤
បើតាមការបញ្ជាក់ពីលោក កែវ សុជាតិ ព្រះរាជអាជ្ញារង អមតុលាការសាលាដំបូងរាជធានីភ្នំពេញភាគីគ្រួសារជនរងគ្រោះបានសម្រេចដកពាក្យបណ្តឹងពីក្រុមហ៊ុន ICOC ហើយ ក្រោយពីបានទទួលសំណងចំនួន៦ម៉ឺនដុល្លាអាមេរិក។ ក៍ប៉ុន្តែយោងតាមច្បាប់ សំណុំរឿងឃាតកម្មដោយអចេតនានេះ នៅមិនទាន់រលត់នោះទេ ពោលគឺ ការស៊ើបអង្កេតនឹងត្រូវបន្តធ្វើ ទៅលើមនុស្សមួយចំនួនទៀត។ លោកបានបញ្ជាក់ថា បច្ចុប្បន្ន សំណុំរឿងនេះ ត្រូវបានបញ្ជូនបន្តទៅអោយចៅក្រមស៊ើបសួរ លោក ទេស សារ៉ោ ធ្វើការស៊ើបអង្កេតបន្ត។
សូមបញ្ជាក់ថា បច្ចុប្បន្ន មានតែកម្មករសំណង់៥នាក់ប៉ុណ្ណោះ ដែលត្រូវបានឃាត់ខ្លួន និងចោទប្រកាន់ពីបទមនុស្សឃាតដោយអចេតនា ក្រោយពីហេតុការណ៍ធ្លាក់កំណាត់ដែកបួនជ្រុង ប្រវែងជិត២ម៉ែត្រ បានបណ្តាលអោយស្លាប់ស្ត្រីម្នាក់ឈ្មោះ ប៊ុត វណ្ណី អាយុ៤៨ឆ្នាំ ខណៈដែលស្ត្រីរូបនោះកំពុងធ្វើដំណើរតាមផ្លូវ នៅក្បែរការដ្ឋានសំណង់អគារ Olympia City របស់ក្រុមហ៊ុន ICOC ស្ថិតនៅជាប់របងពហុកីឡាដ្ឋានជាតិអូឡាំពិក កាលពីល្ងាចថ្ងៃទី២ខែវិច្ឆិកា។ ហេតុការណ៍នេះ បានធ្វើឲ្យមានការភ្ញាក់ផ្អើល និងរន្ធត់យ៉ាងខ្លាំងពីសំណាក់ប្រជាពលរដ្ឋខ្មែរ។
កម្មករសំណង់ទាំង៥នាក់នោះរួមមាន ទី១-ឈ្មោះ ចែម ឈុន អាយុ២១ឆ្នាំ ជាកម្មករសំណង់មានស្រុកកំណើតមកពីខេត្តកំពង់ធំ, ទី២-ឈ្មោះ ចែម ថើត អាយុ២៣ឆ្នាំ ជាកម្មករសំណង់ ស្នាក់នៅក្នុងក្រុមហ៊ុន ICOC ស្តាតអូឡាំពិក ទី៣ឈ្មោះ លន់ សំអុល អាយុ៣៦ឆ្នាំ ទី៤-ឈ្មោះ ឃួន វិជ្ជា អាយុ២០ឆ្នាំ និង ទី៥-ឈ្មោះ សូ សាវ៉ៃ អាយុ២៤ឆ្នាំ ជាកម្មករសំណង់ ស្នាក់នៅក្នុងក្រុមហ៊ុនOCIC ស្តាតអូឡាំពិក។ ចំណែកឯ មេការចំនួន២នាក់ ដែលបណ្តាញព័ត៌មានក្នុងស្រុកផ្សាយថា ត្រូវបានតុលាការដោះលែងឲ្យមានសេរីភាពវិញនោះ ទី១មានឈ្មោះ ធាន សង្ហី អាយុ៤៨ឆ្នាំ ជាជនជាតិចិន មានមុខរបរវិស្វករ និងជាមេការ និងទី២-ឈ្មោះ កែវ ចាន់ អាយុ៤៨ឆ្នាំ ជនជាតិខ្មែរ។ ប៉ុន្តែ លោកកែវ សុជាតិ បានបដិសេធថា លោកមិនបានដោះលែងមេការសំណង់ទាំងពីរនាក់នេះទេ។
យ៉ាងណាក៍ដោយ ការចាប់ខ្លួនកម្មករសំណង់តែ៥រូប អោយមកទទួលខុសត្រូវ ខណៈដែលមេការ និងម្ចាស់សំណង់អគារដែលជាអ្នកទទួលខុសត្រូវខ្ពស់បំផុត មិនត្រូវបានចាប់ខ្លួននោះ កំពុងធ្វើអោយមហាជនរិះគន់យ៉ាងខ្លាំង។
ដោយឡែក ទាក់ទងនឹងដំណើរការសាងសង់អគារ Olympia City របស់ក្រុមហ៊ុន ICOCនេះវិញ ក៍ត្រូវបានក្រសួងរៀបចំដែនដី នគររូបនីយកម្ម និងសំណង់សម្រេចផ្អាកការសាងសង់ជាបណ្តោះអាសន្នសិន ដើម្បីរងចាំការស៊ើបអង្កេតរកមូលហេតុជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ