ប្រមុខដឹកនាំប៉ាឡេស្ទីនប្រកាសថ្កោលទោសការសម្លាប់រង្គាលជនជាតិជ្វីហ្វក្នុងសង្រ្គាមលោកលើកទី២
កាលពីថ្ងៃអាទិត្យម្សិលមិញ លោកម៉ះមូដ អាបាស់ (Mahmoud Abbas) ប្រធានាធិបតីប៉ាឡេស្ទីន បានប្រកាសជាសាធារណៈ ថ្កោលទោស ការសម្លាប់រង្គាលជនជាតិជ្វីហ្វ ដោយហ៊ីត្លែរ កាលពីក្នុងអំឡុងសង្រ្គាមលោកលើកទី២។ ការប្រកាសបែបនេះ ពីសំណាក់ប្រមុខដឹកនាំប៉ាឡេស្ទីន គឺជារឿងមិនធ្លាប់មាន ហើយត្រូវបានធ្វើឡើងនៅចំថ្ងៃ ដែលអ៊ីស្រាអែលធ្វើពិធីរំឭកខួបការសម្លាប់រង្គាលជនជាតិជ្វីហ្វនេះ។
ចុះផ្សាយនៅថ្ងៃ៖
ស្តាប់ - ០១:៥៦
“អ្វីដែលបានកើតឡើង ចំពោះជនជាតិជ្វីហ្វ កាលពីក្នុងអំឡុងសង្រ្គាមលោកលើកទី២ វាគឺជាបទឧក្រិដ្ឋដ៏គួរឲ្យស្អប់ខ្ពើមបំផុត ដែលគេមិនធ្លាប់ជួបប្រទះ នៅក្នុងប្រវត្តិសាស្រ្តរបស់មនុស្សជាតិនៃសម័យទំនើប”។ នេះគឺជាការប្រកាសរបស់លោកម៉ះមូដ អាបាស់ នៅក្នុងសេចក្តីប្រកាសព័ត៌មានចេញផ្សាយ កាលពីថ្ងៃអង្គារម្សិលមិញ តែប៉ុន្មានម៉ោងប៉ុណ្ណោះ មុនពេលដែលអ៊ីស្រាអែលចាប់ផ្តើមប្រារព្ធពិធីរំឭកខួប ការសម្លាប់រង្គាលជនរួមជំនឿរបស់ពួកគេ ដោយអាល្លឺម៉ង់ណាស៊ី។
លោកម៉ះមូដ អាបាស់ ដែលកាលពីមុនធ្លាប់ត្រូវបានគេចោទប្រកាន់ថាមិនព្រមទទូលស្គាល់ការសម្លាប់រង្គាលជនជាតិជ្វីហ្វ ក៏ធ្លាប់បានប្រកាសថ្កោលទោសការសម្លាប់រង្គាលជនជាតិជ្វីហ្វដែរ ក៏ប៉ុន្តែ កាលពីថ្ងៃអាទិត្យម្សិលមិញនេះ គឺជាលើកទី១ហើយ ដែលប្រមុខដឹកនាំប៉ាឡេស្ទីនបានប្រកាសថ្កោលទោសដោយប្រើសម្តីធ្ងន់ៗ ហើយការប្រកាសថ្កោលទោសនេះទៀតសោតត្រូវបានចេញផ្សាយជាសាធារណៈ តាមរយៈសេចក្តីប្រកាសព័ត៌មានជាភាសាអារ៉ាប់។
នៅក្នុងសេចក្តីប្រកាសព័ត៌មាននេះ លោកម៉ះមូដ អាបាស់ ក៏បានអំពាវនាវផងដែរដល់អ៊ីស្រាអែលឲ្យឆ្លៀតឱកាសនេះ ចុះកិច្ចព្រមព្រៀងសន្តិភាពមួយប្រកបដោយយុត្តិធម៌ ដោយឈរលើគោលការណ៍ប្រជាជាតិពីរ រដ្ឋឯករាជ្យពីរ ដែលនឹងរស់នៅក្នុងសុខសន្តិភាព ជាប្រទេសជិតខាងភូមិផងរបងជាមួយ។
គួរបញ្ជាក់ថា ការចរចាសន្តិភាព រវាងអ៊ីស្រាអែល និងប៉ាឡេស្ទីន ដែលកាលពីមុនគ្រោងថានឹងធ្វើឲ្យបានសម្រេចជាកិច្ចព្រមព្រៀង នៅត្រឹមថ្ងៃអង្គារ ទី២៩ មេសា ស្អែកនេះ កំពុងត្រូវជាប់គាំងទាំងស្រុង ដោយសារតែអ៊ីស្រាអែលប្រកាសផ្អាកចរចា ក្រោយពីលោកម៉ះមូដ អាបាស់ ចុះកិច្ចព្រមព្រៀងផ្សះផ្សាគ្នា ជាមួយនឹងក្រុមហាម៉ាស់ ដែលអ៊ីស្រាអែលចាត់ទុកថាជាក្រុមភេរវជន។
កាលពីថ្ងៃអាទិត្យម្សិលមិញនេះដែរ អង្គការរំដោះជាតិប៉ាឡេស្ទីន (OLP) របស់លោកអាបាស់ បានព្រមានដល់អ៊ីស្រាអែលថា ប្រសិនបើគ្មានកិច្ចព្រមព្រៀងសន្តិភាព នៅក្នុងរយៈពេល ៣ខែខាងមុខនេះទេ ប៉ាឡេស្ទីននឹងចាប់ផ្តើមឡើងវិញនូវនីតិវិធី សុះចូលជាសមាជិកអង្គការអន្តរជាតិ និងអនុសញ្ញាអន្តរជាតិ ដែលមានន័យស្មើនឹងការប្រកាសបង្កើតរដ្ឋប៉ាឡេស្ទីនឯករាជ្យ ដោយមិនឆ្លងកាត់ការចរចាជាមួយអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ