តុលាការភូមាព្រមអោយមានការដកបណ្តឹងលើសារព័ត៌មានមួយពីបទសំអុយកេរ្តិ៍ឈ្មោះ
នៅថ្ងៃព្រហស្បត្តិ៍នេះ តុលាការប្រទេសភូមាបានសំរេចយល់ព្រម អោយមានការលុបចោលបណ្តឹងលើសារព័ត៌មានប្រចាំសប្តាហ៍មួយ ឈ្មោះ The Voice Weekly ដែលត្រូវក្រសួងរ៉ែភូមាចោទប្រកាន់ពីបទសំអុយកេរ្តិ៍ឈ្មោះ។ The Voice Weekly បានសរសេរក្នុងទំព័ររបស់ខ្លួនថា ការិយាល័យសវនកម្មបានរកឃើញការលួចបន្លំនានា នៅក្នុងក្រសួងចំនួនបួន នៅក្នុងប្រទេសដែលក្នុងនោះក៏មានក្រសួងរ៉ែភូមាផងដែរ។ ការសំរេចរបស់តុលាការភូមា បានបង្ហាញពីការប្រែមុខមាត់ថ្មីរបស់រដ្ឋាភិបាល ដែលចង់បង្ហាញពីការប្រឹងប្រែងរបស់ខ្លួនក្នុងការធានាអោយមានសេរីភាពសារព័ត៌មានខ្ពស់ នៅក្នុងប្រទេស។ កាលពីម្សិលមិញនេះ អង្គការអ្នកកាសែតគ្មានព្រំដែនបានដាក់ចំណាត់ថ្នាក់ផ្នែកសេរីភាពសារព៍ត៌មានលេខ ១៥១ ដល់ភូមា ក្នុងចំណោមប្រទេស១៧៩ ទូទាំងពិភពលោក។
ចុះផ្សាយនៅថ្ងៃ៖
ស្តាប់ - ០១:៥០
លោក Kyaw Min Swe ដែលជានាយកនិពន្ធរបស់សារព័ត៌មានប្រចាំសប្តាហ៍ The Voice Weekly នៅភូមា បានធ្វើការស្វាគមន៍លើការសំរេចចិត្តរបស់តុលាការ នៅថ្ងៃព្រហស្បត្តិ៍នេះ អោយដកបណ្តឹងចោទប្រកាន់មកលើសារព័ត៌មាននេះ ពីបទសំអុយកេរ្តិ៍ឈ្មោះលើក្រសួងធនធានរ៉ែភូមា។
The Voice Weekly ធ្លាប់បានសរសេរក្នុងទំព័ររបស់ខ្លួនថា ការិយាល័យសវនកម្មបានរកឃើញការលួចបន្លំនានា នៅក្នុងក្រសួងចំនួនបួន នៅក្នុងប្រទេស ក្នុងនោះក៏មានក្រសួងធនធានរ៉ែភូមាផងដែរ។ កាលពីខែកញ្ញាកន្លងមក តុលាការភូមាបានយល់ព្រមបន្តការកាត់ទោសសារព័ត៌មានប្រចាំសប្តាហ៍មួយនេះ ពីបទសំអុយកេរ្តិ៍ឈ្មោះ ទៅតាមការចោទប្រកាន់របស់ក្រសួងធនធានរ៉ែ។ ប៉ុន្តែ ចាប់តាំងពីពេលនោះមក ក្រសួងធនធានរ៉ែបានផ្លាស់ប្តួរគំនិតវិញ ដើម្បីសំរួលខ្លួនអោយស្របទៅតាមការបញ្ចុះបញ្ចូលរបស់ក្រុមប្រឹក្សានៃសារព័ត៌មាន។
ការយល់ព្រមរបស់តុលាការភូមាអោយដកបណ្តឹងលើសារព័ត៌មាន The Voice Weekly ធ្វើឡើងតែមួយថ្ងៃប៉ុណ្ណោះ បន្ទាប់ពីប្រទេសភូមាបានទទួលចំណាត់ថ្នាក់លេខ ១៥១ ផ្នែកសេរីភាពសារព័ត៌មាន ក្នុងចំណោមប្រទេសសរុប ១៧៩ ប្រទេស។ រដ្ឋាភិបាលភូមាហាក់ចង់បង្ហាញពីមុខមាត់ថ្មីរបស់ខ្លួន ដែលមានការប្រឹងប្រែង ធានាអោយមានសេរីភាពសារព័ត៌មានខ្ពស់ នៅក្នុងប្រទេស។
ចាប់តាំងពីឆ្នាំ ២០១១មក បន្ទាប់ពីរបបសឹកភូមាត្រូវបានរំលាយចោល រដ្ឋាភិបាលភូមាថ្មី បានខិតខំបង្កើនការកែទំរង់នានានៅក្នុងប្រទេស។ កាលពីឆ្នាំមុននេះ រដ្ឋអំណាចភូមាបានបង្កើតឡើងនូវក្រុមប្រឹក្សាសារព័ត៌មានស្តីទីមួយ ទទួលបន្ទុកលើការគិតគូរផ្នែកសីលធម៌ និងដោះស្រាយការមិនចុះសម្រុងនានា។ រដ្ឋាភិបាលភូមាក៏បានលុបចោលផងដែរ នូវការរិះគន់ចាប់ថ្នាក់លើសារព័តម៌ាន ព្រមទាំងបានដោះលែងអ្នកកាសែតនានាដែលជាប់ឃុំឃាំង ហើយសន្យានឹងផ្តល់នូវអាជ្ញាបណ្ណដល់សារព័ត៌មានឯកជននានា ចាប់ពីថ្ងៃទី ០១ មេសា ខាងមុខនេះទៅ។
ទោះយ៉ាងនេះក្តី អ្នកសារព័តម៌ាននានាប្រមើលមើលថា សេរីភាពរបស់ខ្លួនអាចនឹងមានឡើងពិតប្រាកដ លុះត្រាតែឆ្លងកាត់នូវកំណែទំរង់ក្នុងសភាជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ