អាជ្ញាធរនឹងបណ្តេញវិនិយោគិនរុស្ស៊ីម្នាក់ពីកម្ពុជាដោយសារអនាចារ
នគរបាលកម្ពុជា បានចាប់ខ្លួនជនជាតិរុស្ស៊ីម្នាក់ឈ្មោះ Alexander Trofimov កាលពីថ្ងៃចន្ទម្សិលមិញនៅជាយរាជធានីភ្នំពេញក្រោមបទសង្ស័យថា បុរសម្នាក់នេះ បានស្រឡាញ់ក្មេងស្រីអាយុ១២ឆ្នាំ។ អាជ្ញាធរកម្ពុជា គ្រោងបណ្តេញបុរសជនជាតិរុស៊្សីដែលជាម្ចាស់ក្រុមហ៊ុនវិនិយោគកោះពស់នៅខេត្តព្រះសីហនុចេញពីប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ទីបំផុតជនជាតិរុស្ស៊ីដ៏ចម្រូងចម្រាស់ម្នាក់ដែលពាក់ព័ន្ធនឹងការប្រព្រឹត្តិអនាចារលើកុមារកម្ពុជាតាំងពីឆ្នាំ២០០៧មកនោះ ទំនងជាត្រូវអាជ្ញាធរកម្ពុជាបណ្តេញចេញពីប្រទេសកម្ពុជាហើយ។ សមត្ថកិច្ចកម្ពុជាត្រូវសម្រេចបណ្តេញជនជាតិរុស្ស៊ីឈ្មោះ Alexander Trofimovចេញពីកម្ពុជា បន្ទាប់បានរកឃើញ និងចាប់ខ្លួនជនជាតិរុស្ស៊ីម្នាក់នេះដែលនៅលាក់ខ្លួននៅក្នុងផ្ទះរបស់គ្រួសារមួយនៅជាយរាជធានីភ្នំពេញ។ ប៉ូលីសបាននិយាយថា ជនជាតិរុស្ស៊ីនេះបានស្រឡាញ់កូនស្រីម្ចាស់ផ្ទះដែលមានអាយុប្រមាណ១២ឆ្នាំ។
លោកឧត្តមសេនីយឯក គៀត ចន្ទថារិទ្ធ អ្នកនាំពាក្យនគរបាលជាតិបានប្រាប់ទីភ្នាក់ងារព័ត៌មានបារាំងAFPនៅថ្ងៃអង្គារនេះថា កម្ពុជានឹងបណ្តេញជនជាតិរុស្ស៊ីនេះចេញពីប្រទេសកម្ពុជា។
ជនជាតិរុស្ស៊ីម្នាក់នេះត្រូវបានដឹងថា គឺជាប្រធានក្រុមហ៊ុនអភិវឌ្ឍកោះពស់ក្នុងខេត្តព្រះសីហនុ។ ហើយកាលពីឆ្នាំ២០០៧ ជនជាតិរុស្ស៊ីនេះ ត្រូវបានចាប់ខ្លួនម្តងហើយក្រោយពីមានពាក្យបណ្តឹងពីជនរងគ្រោះចំនួន១៧នាក់ដែលជាអនីតិជន។ ក្នុងចំណោមនោះ មានក្មេងស្រីតូចជាងគេអាយុ៦ឆ្នាំ។ នៅពេលនោះតុលាការបានកាត់ទោសជនជាប់ចោទ Alexanderនេះអោយជាប់ពន្ធនាគារ១៧ឆ្នាំ ហើយក្រោយមកត្រូវបានសាលាឧទ្ធរណ៍បន្ថយមកនៅត្រឹម៨ឆ្នាំ។
ប៉ុន្តែកាលពីដើមខែធ្នូឆ្នាំ២០១១កន្លងទៅនេះ ពិរុទ្ធជនរុស្ស៊ីម្នាក់នេះ ស្រាប់តែបានទទួលព្រះរាជលើកលែងទោសពីព្រះមហាក្សត្រ ហើយត្រូវបានដោះលែងអោយមានសេរីភាពវិញ។
គួរបញ្ជាក់ថា រហូតដល់ពេលនេះ មានជនបរទេសជាង១០នាក់ដែលត្រូវបានកាត់ទោសដាក់ពន្ធនាគារ ក្រោមបទប្រព្រឹត្តិអំពើអនាចារលើកុមារ និងត្រូវបញ្ជូនចេញពីប្រទេសកម្ពុជាដើម្បីទទួលការកាត់ទោសនៅក្នុងប្រទេសកំណើតរបស់ពួកគេ។ កម្ពុជាបានមានច្បាប់ស្តីពីការប្រឆាំងការរំលោភផ្លូវភេទលើកុមារនៅក្នុងឆ្នាំ២០០៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ