ទស្សនកិច្ចដ៏គួរឲ្យភ្ញាក់ផ្អើលរបស់លោកហូឡង់នៅអាហ្វហ្កានីស្ថាន
លោកហ្វ្រង់ស័រហូឡង់បានអញ្ជើញទៅដល់ទីក្រុងកាប៊ូលនៃប្រទេសអាហ្វហ្កានីស្ថាននៅថ្ងៃសុក្រទី២៥ឧសភាឆ្នាំ២០១២នេះ។ លោកប្រធានាធិបតីបារាំងត្រូវមានជំនួបពិភាក្សាជាមួយលោកប្រធានាធិបតីអាហ្វហ្កានីស្ថាន ហាមីឌការហ្សៃ។ ទស្សនកិច្ចនេះបានកើតមានប៉ុន្មានថ្ងៃតែប៉ុណ្ណោះក្រោយពីលោកហូឡង់បានប្រកាសបញ្ជាក់ថា យុទ្ធជននៃកងទ័ពបារាំងនឹងត្រូវដកចេញពីប្រទេសអាហ្វហ្កានីស្ថានមុនដំណាច់ឆ្នាំ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
លោកប្រធានាធិបតីបារាំងហ្វ្រង់ស័រហូឡង់បានអញ្ជើញទៅដល់ទីក្រុងកាប៊ូលនៃប្រទេសអាហ្វហ្កានីស្ថាននៅព្រឹកថ្ងៃសុក្រទី២៥ឧសភាឆ្នាំ២០១២នេះ។ ទស្សនកិច្ចដ៏គួរឲ្យភ្ញាក់ផ្អើលរបស់លោកប្រធានាធិបតីបារាំងថ្មីនេះ គឺជាទស្សនកិច្ចជាលើកទីមួយរបស់លោកនៅប្រទេសអាហ្វហ្កានីស្ថាន។ លោកហូឡង់ត្រូវជួបពិភាក្សាជាមួយលោកប្រធានាធិបតីអាហ្វហ្កានីស្ថាន ហាមីឌការហ្សៃ នៅវិមានប្រធានាធិបតីនៅទីក្រុងកាប៊ូល។
ដំណើរអញ្ជើញទៅប្រទេសអាហ្វហ្កានីស្ថាននេះ គឺជាកាយវិការនិងជាសញ្ញាដ៏ខ្លាំងក្លាមួយរបស់លោកប្រមុខរដ្ឋបារាំងដែលទើបនឹងឡើងមកកាន់អំណាច។ កាលពីសប្តាហ៍មុន នាឱកាសជំនួបកំពូលអូតង់នៅទីក្រុងស្ហ៊ីកាហ្គោ លោកហូឡង់ធ្លាប់បានបង្ហាញឲ្យឃើញនូវប្រតិទិនរបស់កងទ័ពបារាំងនៅប្រទេសអាហ្វហ្កានីស្ថានម្តងរួចទៅហើយ។ យុទ្ធជនក្នុងចំណោមទាហានបារាំងទាំងអស់៣ ៤០០នាក់ដែលមានវត្តមាននៅប្រទេសអាហ្វហ្កានីស្ថាននឹងត្រូវដកចេញមុនដំណាច់ឆ្នាំ២០១២។ ចំណែកឯកងទ័ពនៃប្រទេសបក្សសម្ព័ន្ធដទៃទៀតគ្រោងដកចេញនៅឆ្នាំ២០១៤។
ក៏ប៉ុន្តែ លោកប្រធានាធិបតីបារាំងហ្វ្រង់ស័រហូឡង់បានសន្យាថា បេសកកម្មនៃការបណ្តុះបណ្តាលកងកម្លាំងយោធានិងនគរបាលអាហ្វហ្កានីស្ថាននៅតែមានបន្ត។ ឆ្លៀតឱកាសទស្សនកិច្ចនេះ លោកហូឡង់បានប្រកាសប្រាប់ថា សហប្រតិបត្តិការរវាងប្រទេសបារាំងនិងប្រទេសអាហ្វហ្កានីស្ថាននៅតែមានបន្តទៅទៀតក្រោយពីឆ្នាំ២០១២។
គួរបញ្ជាក់ថា ជាង១០ឆ្នាំក្រោយពីមានអន្តរាគមន៍ដោយកងកម្លាំងយោធានៃបក្សសម្ព័ន្ធអន្តរជាតិនៅប្រទេសអាហ្វហ្កានីស្ថាន អ៊ូសាម៉ាបេនឡាដេន ប្រមុខដឹកនាំអាល់កៃដាបានត្រូវទាហានអាមេរិកាំងសម្លាប់។ របបគ្រប់គ្រងផ្តាច់ការដ៏ងងឹតងងល់របស់ពួកតាលីបង់បានត្រូវផ្តួលរំលំ។ ក៏ប៉ុន្តែ ការងើបបះបោរប្រឆាំងទល់នឹងរដ្ឋាភិបាលនៃទីក្រុងកាប៊ូលនៅតែមានសកម្មភាពយ៉ាងសកម្ម។
ទាំងនេះបានបណ្តាលឲ្យប្រជាជនអាហ្វហ្កានីស្ថានភ័យបារម្ភខ្លាចមានសង្គ្រាមស៊ីវិលក្រោយពីកងទ័ពបរទេសដកចេញពីប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ