លោកនាយករដ្ឋមន្ត្រី ហ៊ុន សែន ចេញទៅទស្សនកិច្ចប្រទេសចិន
ដូចការគ្រោងទុកគណៈប្រតិភូជាន់ខ្ពស់កម្ពុជា ដឹកនាំដោយលោកនាយករដ្ឋមន្ត្រី ហ៊ុន សែន បានចេញដំណើរ នៅព្រឹកថ្ងៃសៅរ៍នេះ ពីទីក្រុងភ្នំពេញ ក្នុងដំណើរទស្សនកិច្ចរយៈពេល៥ថ្ងៃ នៅប្រទេសចិន។ នេះជាទស្សនកិច្ចថ្មីមួយទៀតរបស់ប្រមុខដឹកនាំរាជរដ្ឋាភិបាលក្រុងភ្នំពេញ ក្នុងន័យរឹតចំណងមិត្តភាពជាប្រវត្តិសាស្ត្ររវាងកម្ពុជានិងមហាយក្សចិន បន្ទាប់ពីក្រុងប៉េកាំងទើបតែប្តូរក្បាលម៉ាស៊ីនដឹកនាំថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសចិន នៅថ្ងៃសៅរ៍នេះបានធ្វើឡើងតបតាមការអញ្ជើញរបស់នាយករដ្ឋមន្ត្រីចិន លោក លី ខឺឈាំង ដែលទើបឡើងកាន់តំណែងថ្មី។ គឺជាទស្សនកិច្ចដែលមានអត្ថន័យរឹតចំណងមិត្តភាពរវាងប្រទេសទាំងពីរដែលធ្លាប់មានប្រវត្តិកាទូតស្អិតល្មួត និងយូរលង់ណាស់មកហើយ។
ក្នុងអំឡុងទស្សនកិច្ចនេះ ក្រៅពីជួបពិភាក្សាការងារជាមួយសមភាគីចិន គឺលោក លី ខឺឈាំង លោកនាយករដ្ឋមន្ត្រី ហ៊ុន សែន ក៏នឹងជួបពិភាក្សាជាមួយប្រធានាធិបតីថ្មីរបស់ចិន លោក ស៊ី ជីនពីង ( Xi Jinping) និងប្រធានសភាប្រជាជនចិន លោក ចាង តេជាង (Zhang Dejiang) ផងដែរ។ ដោយឡែក ក្រៅពីមេដឹកនាំកំពូលរបស់ចិន ជំនួបពិភាក្សាជាមួយនាយករដ្ឋមន្ត្រីអូស្ត្រាលី លោកស្រី ជូលា ហ្គៀលឡាត (Julia Gillard) ក៏ត្រូវបានគ្រោងនៅក្នុងអំឡុងទស្សនកិច្ចនេះដែរ។ នេះបើយោងតាមរបៀបវារៈដែលផ្សព្វផ្សាយដោយក្រសួងការបរទេសកម្ពុជា។
ក៏ដូចជារៀងរាល់លើកដែរ ដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសចិននៅពេលនេះមិនមែនមានអត្ថន័យត្រឹមរឹតចំណងមិត្តភាពរវាងទីក្រុងភ្នំពេញនិង ប៉េកាំងតែប៉ុណ្ណោះទេ ប៉ុន្តែ ក៏មានកិច្ចព្រមព្រៀងវិនិយោគជាច្រើនដែលត្រូវចុះហត្ថលេខាផងដែរ។ ឯកសារចំនួន៨ ក្នុងនោះមានកិច្ចព្រមព្រៀងវិនិយោគចំនួន៤ ដែលសរុបមានទឹកប្រាក់ជិត ៩០០ លានយ័ន នឹងត្រូវចុះហត្ថលេខារវាងភាគីទាំងពីរ។
ក្រសួងការបរទេសកម្ពុជាក៏បានឲ្យដឹងទៀតថា ទីក្រុងភ្នំពេញ និងប៉េកាំង ក៏នឹងឯកភាពគ្នាកំណត់យកឆ្នាំ២០១៣ ជាខួបលើកទី ៥៥ នៃការបង្កើតទំនាក់ទំនងការទូតរវាងកម្ពុជាចិន និងជា «ឆ្នាំមិត្តភាពកម្ពុជា-ចិន»។ នៅចុងបញ្ចប់នៃទស្សនកិច្ច លោកនាយករដ្ឋមន្ត្រី ហ៊ុន សែន គ្រោងនឹងចូលរួម និងថ្លែងសុន្ទរកថាក្នុងវេទិកាបូអាវសម្រាប់សន្និសីទតំបន់អាស៊ីប្រចាំឆ្នាំ ២០១៣ ដែលនឹងប្រព្រឹត្តទៅពីថ្ងៃទី៦ ដល់ថ្ងៃទី៨ ខែមេសា ក្នុងខេត្តហៃណាន។
គួរបញ្ជាក់ថា លោកនាយករដ្ឋមន្ត្រី ហ៊ុន សែន ធ្លាប់បានទៅកាន់ប្រទេសចិនចំនួន៨លើករួចមកហើយ រាប់ទាំងដំណើរទស្សនកិច្ចផ្លូវការនិងក្រៅផ្លូវការ។ ដំណើរទៅកាន់ប្រទេសចិនលើកចុងក្រោយបានធ្វើឡើងកាលពីខែតុលា ឆ្នាំ២០១២ ដើម្បីដង្ហែព្រះបរមសពសម្តេចឳ នរោត្តម សីហនុ មកកាន់ទីក្រុងភ្នំពេញវិញ។ ដំណើរទស្សនកិច្ចផ្លូវរដ្ឋលើកនេះ បានធ្វើឡើងក្នុងបរិបទដែលមហាយក្សចិនទើបតែផ្លាស់ប្តូរក្បាលម៉ាស៊ីនដឹកនាំថ្មី កាលពីខែមីនាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ