រដ្ឋមន្ត្រីការពារជាតិម៉ាឡេស៊ីនឹងជួបនាយករដ្ឋមន្ត្រីកម្ពុជា
គណៈប្រតិភូក្រសួងការពារជាតិនៃប្រទេសម៉ាឡេស៊ីមកដល់រាជធានីភ្នំពេញ នៅយប់ថ្ងៃពុធនេះក្នុងក្របខណ្ឌនៃដំណើរទស្សនកិច្ចពង្រឹងវិស័យយោធា ជាមួយកម្ពុជា។ ពាក់ព័ន្ធនឹងស្ថានភាពយោធានៅព្រំដែន កម្ពុជាបានសម្រេចកែសម្រួលកងទ័ពនៅក្នុងតំបន់ភូមិភាគ១ ពោលគឺនៅចំណុចមុំបី ដែលការកែសម្រួលកងទ័ពនេះ មិនស្ថិតនៅក្នុងក្របខណ្ឌនៃការអនុវត្តន៍សាលក្រមតុលាការឡាអេនោះ ឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
គណៈប្រតិភូយោធានៃប្រទេសម៉ាឡេស៊ីជាង១០រូប ដែលដឹកនាំដោយរដ្ឋមន្ត្រីការពារជាតិលោកAhmad Zahid Hamidi បានមកដល់កម្ពុជានៅយប់ថ្ងៃពុធទី២៧កក្កដានេះ ដើម្បីបំពេញទស្សនកិច្ចរហូតដល់ថ្ងៃទី២៩កក្កដា។ អ្នកនាំពាក្យយោធាកម្ពុជាឧត្តមសេនីយឯកឈុំ សុជាតិបានថ្លែងប្រាប់វិទ្យុបារាំងអន្តរជាតិនៅថ្ងៃនេះថា ប្រតិភូយោធានៃប្រទេសម៉ាឡេស៊ីនឹងជួបពិភាក្សាការងារដែលទាក់ទងនឹងសហប្រតិបត្តិការពង្រឹងវិស័យយោធានៃប្រទេសទាំងពីរជាមួយលោកទៀ បាញ់ រដ្ឋមន្ត្រីការពារជាតិកម្ពុជា និងបន្ទាប់មកគឺលោកនាយករដ្ឋមន្ត្រីហ៊ុន សែន។
គេនៅមិនទាន់ដឹងថាតើកម្ពុជានិងប្រតិភូយោធាម៉ាឡេស៊ីអាចនឹងលើកឡើងអំពីការអនុវត្តន៍សាលក្រមតុលាការឡាអេស្តីពីការដកកងទ័ពចេញពីតំបន់គ្មានយោធាបណ្តោះអាសន្ននៃតំបន់ប្រាសាទព្រះវិហារ និងការមកដល់នៃអ្នកសង្កេតការណ៍ឥណ្ឌូណេស៊ីដែរ ឬយ៉ាងណានោះទេ?
ទាក់ទងនឹងស្ថានភាពព្រំដែនកម្ពុជា កម្ពុជាបានប្រកាសកែសម្រួលកងទ័ពមួយវរសេនាធំកាលពីព្រឹកថ្ងៃពុធនេះ។ កងទ័ពដែលឈរជើងនៅចំណុចមុំបី នៃតំបន់ភូមិភាគ១។ អ្នកនាំពាក្យក្រសួងការពារជាតិបានបញ្ជាក់ថា ការកែសម្រួលកងទ័ពនេះ មិនមានពាក់ព័ន្ធនឹងការអនុវត្តសាលក្រមតុលាការឡាអេ ដែលត្រូវបានគូសវាសតំបន់គ្មានកងទ័ពចំនួន១៧គីឡូម៉ែត្រការេនោះឡើយ។ លោកបន្តពន្យល់ថា នេះគឺជាសកម្មភាពកែសម្រួលកងទ័ពក្នុងការងារការពារបូរណភាពដែនដីតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ