ទស្សនកិច្ចរយៈពេលពីរថ្ងៃរបស់ប្រធានាធិបតីរុស្ស៊ី Medvedev នៅកូរ៉េខាងត្បូង
ថ្ងៃនេះ ដែលជាថ្ងៃទី១នៃទស្សនកិច្ច ជាលទ្ធផលនៃកិច្ចចរចាជាមួយលោក ប្រធានាធិបតីកូរ៉េខាងត្បូង Lee Myung-bak នៅក្រុងសេអ៊ូល មានចុះបានកិច្ចព្រមព្រៀងពិធីសារអនុស្សរណៈ សរុបទៅប្រមាណ២០ច្បាប់ ជាអាទិ៍ លើវិស័យថាមពល និងវិស័យវិនិយោគ។ ស្អែក ប្រមុខរដ្ឋរុស្ស៊ីនឹងចូលរួមក្នុងជំនួបកំពូល “G-20“ ដែលនឹងប្រព្រឹត្តទៅនៅរដ្ឋធានីកូរ៉េខាងត្បូងដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
ថ្លែងក្នុងសន្និសីទសារពត៌មានរួមគ្នាថ្ងៃនេះ បន្ទាប់ពីកិច្ចចរចាទ្វេភាគីជាន់ថ្នាក់កំពូល បានចប់ទៅលោកប្រធានាធិបតីកូរ៉េខាងត្បូង Lee Myung-bak ក្រើនរំលឹកថា ទស្សនកិច្ចលោកប្រធានាធិបតីរុស្ស៊ី Dmitri Medvedev ប្រព្រឹត្តទៅគឺនៅចំកាលបរិច្ឆេទ២ ៖ ទី១-គឺខួបគំរប់២០ឆ្នាំ នៃទំនាក់ទំនងការទូតរវាងប្រទេសទាំងពីរ។ សំរាប់ជាការកត់សំគាល់សហព័ន្ធរុស្ស៊ី និងសាធារណរដ្ឋកូរ៉េ បានតាំងទំនាក់ទំនងការទូតនឹងគ្នា គឺ ថ្ងៃ៣០កញ្ញាឆ្នាំ១៩៩០។ ទី២-ឥឡូវដល់វេនកូរ៉េខាងត្បូង ធ្វើជាម្ចាស់ផ្ទះ ទទួលឲ្យប្រព្រឹត្តទៅនៅថ្ងៃ១២-១៣ វិច្ឆិកា គឺកិច្ចប្រជុំកំពូលនៃ២០ប្រទេសដែលមានសេដ្ឋកិច្ចហំហួនជាងគេ ហៅថា “G-20“។
លោកប្រធានាធិបតីរុស្ស៊ី Dmitri Medvedev ពីចំណែកខ្លួនថ្លែងថា ៖ គឺជាតុល្យាការដ៏ល្អបូកសរុបខួប២០ឆ្នាំនៃទំនាក់ទំនងការទូតនេះ ដែលកិច្ចចរចាជាន់ថ្នាក់កំពូល បានប្រព្រឹត្តទៅក្នុងបរិយាកាសស្ថាបនាសាច់ការ និងជឿទុកចិត្តគ្នាកំរិតខ្ពស់។
បន្ទាប់មក ដោយថ្លែងក្នុងវេទិកានៃ “សំវាទ Business រុស្ស៊ី-កូរ៉េខាងត្បូង“ លោក Medvedev លើកឡើងថា កូរ៉េខាងត្បូងជាអាទិភាពមួយនៃទំនាក់ទំនងរបស់រុស្ស៊ីនៅតំបន់អាស៊ី-ប៉ាស៊ីហ្វិក។ រុស្ស៊ីដាក់ទិសពង្រីកភាពជាដៃគូខ្លួនជាមួយកូរ៉េខាងត្បូង ឲ្យឡើងដល់កម្រិតជាយុទ្ធសាស្ត្រ។ ក្នុង២០ឆ្នាំកន្លងទៅ ប្រមុខរដ្ឋប្រទេសទាំង២ បានជួបគ្នា ចំនួនជាង២០លើកហើយ។
លោក Medvedev ក៏បន្ថែមថា ភាគីរុស្ស៊ីប្រាថ្នា ឃើញពួកវិនិយោគិនកូរ៉េខាងត្បូង បោះទុនឲ្យបានកាន់តែក្រាស់ក្រែលឡើងមកក្នុងសេដ្ឋកិច្ចរុស្ស៊ី។ ត្រង់ចំណុចនេះ គួរនិយាយថា បច្ចុប្បន្ន វិនិយោគទុនពីខាងកូរ៉េខាងត្បូងមកក្នុងសេដ្ឋកិច្ចរុស្ស៊ី មានទឹកប្រាក់សរុប២ពាន់លានដុល្លារអាមេរិក។ រីឯទំហំផ្តោះប្តូរពាណិជ្ជកម្ម កើនឡើងដោយសន្ទុះយ៉ាងលឿន។ បើ២០ឆ្នាំមុន ក្នុងឆ្នាំ១៩៩០ ទំហំនោះគឺតែ ១.៩០០លានដុល្លារ នោះក្នុងឆ្នាំ ២០០៨ បានស្ទុះដល់ ១៨.៤០០លានដុល្លារ ហើយគ្រាន់តែក្នុងឆមាសទី១ឆ្នាំ២០១០នេះ វាត់ដល់១១.០០០លានដុល្លារទៅហើយ។
ក្នុងទ្រង់ទ្រាយនាំចេញពីកូរ៉េខាងត្បូងមកកាន់រុស្ស៊ី ជាទូទៅ គឺគ្រឿងចក្រប្លែកៗ និងមធ្យោបាយដឹកជញ្ជូន រីឯការនាំចេញពីរុស្ស៊ីទៅកូរ៉េខាងត្បូង គឺច្រើនតែវត្ថុធាតុដើម។ ជាឧទាហរណ៍ ក្នុងចំណោមឯកសារដែលមានចុះថ្ងៃនេះ នៅក្រុងសេអ៊ូល គឺមានកិច្ចព្រមព្រៀងដែលចែងថា ចាប់ពីឆ្នាំ២០១៧ទៅ រុស្ស៊ីនឹងលក់ទៅឲ្យកូរ៉េខាងត្បូង ក្នុង១ឆ្នាំៗ គឺឧស្ម័នធម្មជាតិ បរិមាណ ១០.០០០លានម៣។
ចំណុចមួយគួរឲ្យកត់សំគាល់ ខាងផ្នែកនយោបាយក្រៅប្រទេស ៖ រុស្ស៊ី និងកូរ៉េខាងត្បូង ឯកភាពគ្នាថាបន្តសម្របសម្រួលសកម្មភាពគ្នា ក្នុងក្របខ័ណ្ឌ នៃកិច្ចចរចា ៦ភាគី ដែលក្នុងនោះ មានទាំង៤ភាគីទៀតពោល គឺ ចិន ស.រ.អា ជប៉ុន និងកូរ៉េខាងជើង ឆ្ពោះទៅប្រែឧបទ្វីបកូរ៉េឲ្យប្រាសចាកផុតពីធាតុបរមាណូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ