លោកសុខ អាននឹងវិលពីព្យាបាលជំងឺវិញក្នុងពេលឆាប់ៗ
ជាច្រើនថ្ងៃមកហើយ សារព័ត៌មានក្នុងស្រុកមួយចំនួន រួមទាំងពាក្យចចាមអារ៉ាមផងបាននិយាយអំពីបញ្ហាសុខភាពរបស់លោកឧបនាយករដ្ឋមន្ត្រីសុខ អាន រដ្ឋមន្ត្រីទីស្តីការគណៈរដ្ឋមន្ត្រី។ ការផ្សព្វផ្សាយ និងការនិយាយតគ្នាអំពីបញ្ហាសុខភាពរបស់លោកឧបនាយករដ្ឋមន្ត្រី មានទាំងល្អ និងមានទាំងអាក្រក់។ ហេតុដូច្នេះហើយ អ្នកនាំពាក្យទីស្តីការគណៈរដ្ឋមន្ត្រីបានចេញសេចក្តីប្រកាសព័ត៌មានមួយនៅថ្ងៃអង្គារនេះ ដើម្បីបញ្ចប់ព័ត៌មានមិនច្បាស់លាស់ទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីដែលមានគោលដៅបញ្ចប់ពាក្យចចាមអារ៉ាមអំពីបញ្ហាសុខភាពរបស់លោកឧបនាយករដ្ឋមន្ត្រី សុខ អាន បានបញ្ជាក់អំពីសុខភាពមាំទាំរបស់លោកសុខ អាន ក្នុងពេលបច្ចុប្បន្ន។ ហើយថា លោករដ្ឋមន្ត្រីទីស្តីការគណៈរដ្ឋមន្ត្រីនឹងវិលត្រឡប់មកកម្ពុជាវិញក្នុងពេលឆាប់ៗខាងមុខទៀតផង។ ប្រភពពីទីស្តីការគណៈរដ្ឋមន្ត្រីបានអះអាងថា មានកម្មវិធីមួយចំនួន ដូចជាការជួបសវនាការជាមួយប្រតិភូនានាត្រូវបានរៀបចំសម្រាប់លោកឧបនាយករដ្ឋមន្ត្រី នៅពេលលោកឧបនាយករដ្ឋមន្ត្រីមកដល់រាជធានីភ្នំពេញវិញ។
លោកសុខ អាន បានចាកចេញទៅទទួលការព្យាបាលនៅប្រទេសសឹង្ហបុរីប្រមាណមួយខែមកហើយ។
សេចក្តីប្រកាសព័ត៌មាននៅថ្ងៃអង្គារទី២៤កក្កដានេះ ត្រូវបានចេញផ្សាយដោយអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រីដែលសរសេរថា៖«បច្ចុប្បន្ននេះ សុខភាពរបស់ឯកឧត្តម សុខ អាន មានភាពល្អប្រសើរ និងមាំទាំជាធម្មតាឡើងវិញហើយ បន្ទាប់ពីទទួលបានការព្យាបាលដោយជោគជ័យ ជំងឺគ្រួសតំរង់នោម ដោយក្រុមវេជ្ជបណ្ឌិតជំនាញនៅឯក្រៅប្រទេសរួចមក»។
បើយោងតាមសេចក្តីប្រកាសព័ត៌មានដដែល ការបំភឺ្លរបស់ក្រុមអ្នកនាំពាក្យរបស់ទីស្តីការគណៈរដ្ឋមន្ត្រីត្រូវធ្វើឡើងដើម្បីបញ្ចប់ ព័ត៌មានមិនផ្លូវការមួយចំនួនក្នុងពេលកន្លងមកដែលនិយាយថា លោកឧបនាយករដ្ឋមន្ត្រីមានជំងឺធ្ងន់ធ្ងរផ្សេងៗ។ អ្នកនាំពាក្យបានចាត់ទុក ការផ្សព្វផ្សាយព័ត៌មានទាំងនោះ ថាជាសង្គ្រាមចិត្តសាស្ត្រ និងជាការបំផ្លើសខុសពីការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ