អាមេរិកលើកទណ្ឌកម្មទាក់ទងការនាំចេញសេវាហិរញ្ញវត្ថុខ្លះទៅឲ្យភូមា
សហរដ្ឋអាមេរិក ទើបបានជូនដំណឹងនៅថ្ងៃអង្គារ១៧មេសាម្សិលមិញអំពីការលើកទណ្ឌកម្មមួយចំនួនរបស់អាមេរិកដែលហាមមិនឲ្យមានការនាំចេញសេវាហិរញ្ញវត្ថុខ្លះទៅកាន់ភូមា។ ប៉ុន្តែ អាមេរិក បានអនុញ្ញាតចំពោះសេវា សំដៅបំរើ វិស័យមនុស្សធម៌ ប្រជាធិបតេយ្យ អប់រំ សង្គមកិច្ចនិងសុខាភិបាល កីឡាឬ សាសនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ក្នុងចំណោម គោលដៅ អនុញ្ញាត សំរាប់នាំចេញសេវាហិរញ្ញវត្ថុទៅឲ្យភូមា ដែលបានចែងយ៉ាងច្បាស់នៅក្នុងបទបញ្ជានៃក្រសួងរតនាគាផ្សព្វផ្សាយនៅថ្ងៃអង្គារ១៧មេសាម្សិលមិញ ចាប់ពីអំណើះតទៅ មាន”ការកសាងរបបប្រជាធិបតេយ្យនិងអភិបាលកិច្ចល្អ” ការអប់រំ,សុខាភិបាល.ការជួយឧបត្ថម្ភជនភៀសខ្លួន.ឬសកម្មភាពសាសនា។
នៅដើមខែមេសានេះ -បន្ទាប់ពីការបោះឆ្នោតសភាភូមា ដែលបានអនុញ្ញាតឲ្យសម្ព័ន្ធជាតិដើម្បីលទ្ធិប្រជាធិបេតយ្យLND របស់លោកស្រីស៊ូជី ក្លាយទៅជាកម្លាំងប្រឆាំងទីមួយនៅក្នុងរដ្ឋសភាភូមា លោកស្រីហ៊ីលឡារីគ្លីនតុន ប្រមុខការទូតអាមេរិក បានប្រកាសជូនដំណឹងថា នាពេលឆាប់ៗខាងមុខនេះ អាមេរិកនឹងបន្ធូរការរឹតត្បិតក្នុងវិស័យ ធ្វើវិនិយោគទុននៅក្នុងប្រទេសនេះ និង តែងតាំងឲ្យបានឆាប់រហ័ស ឯកអគ្គរដ្ឋទូតមួយរូបរបស់ខ្លួន ប្រចាំប្រទេសភូមា។ ដូច្នេះ អ្នកវិនិយោគអាមេរិក អាចទៅរកស៊ីនៅភូមាបាន នៅលើសេវ៉ាហិរញ្ញវត្ថុបើសិនជាគេចង់ទៅ។
កាយវិការអាមេរិកទាំងអស់នេះ បន្តអនុវត្ត នយោបាយ”ផ្តោះប្តូរស្មើភាពគ្នា” ដើម្បីកាច់បំបាក់យុទ្ធសាស្រ្តដាក់ឲ្យឯកោអនាថោប្រទេសភូមាដែលបានជំរុញឲ្យប្រទេសដ៏សម្បូណ៌ដោយវត្ថុធាតុដើមមួយនេះ ធ្លាក់ក្នុងកណ្តាប់ដៃនៃប្រទេសចិន។
សហភាពអឺរ៉ុបវិញ ក៏ត្រូវជូនដំណឹងនៅពេលខាងមុខនេះដែរអំពីការលើកទណ្ឌកម្មមួយចំនួនដែលដាក់ទៅលើភូមា បន្ទាប់ពីមានការអំពាវនាវរួមគ្នាមួយ កាលពីថ្ងៃសុក្រកន្លងផុតទៅនេះ ពីសំណាក់នាយករដ្ឋមន្ត្រីអង់គ្លេស លោក David Cameron និង ប្រធានគណបក្សប្រឆាំងភូមា លោកស្រី Aung San Suu Kyi សុំឲ្យសហភាពអឺរ៉ុប « ព្យួរ»ទណ្ឌកម្មទាំងនេះ។
ចំណែក ប្រទេសអូស្ត្រាលី ក៏បានជូនដំណឹងនៅថ្ងៃចន្ទម្សិលម្ង៉ៃថា អូស្ត្រាលីនឹងលើកទណ្ឌកម្មដាក់ទៅលើប្រធានាធិបតីភូមា និងទៅលើ អ្នកទទួលខុសត្រូវភូមាជាង២០០នាក់ទៀត ដែលបច្ចុប្បន្នកំពុងស្ថិតនៅក្រោមទម្ងន់ទណ្ឌកម្មហាមមិនឲ្យពួកគេអាចធ្វើដំណើរមកកាន់អូស្ត្រាលី និងចុះកិច្ចសន្យាលើផលិតផលហិរញ្ញវត្ថុជាមួយអូស្រ្តាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ