អាមេរិកអស់អំណត់ធ្មត់នឹងប៉ាគីស្ថានទៀតហើយ
ទំនាក់ទំនងអាមេរិក ប៉ាគីស្ថានកាន់តែតឹងឡើងមួយកម្រិតទៀត។ កាលពីថ្ងៃព្រហស្បតិ៍ ទី ៧មិថុនា នៅក្នុងដំណើរទស្សនកិច្ច ឥតព្រាងទុក នៅអាហ្វហ្កានីស្ថាន លោកLeon Panetta បានឆ្លៀតដាក់គំនាបលើរដ្ឋាភិបាលប៉ាគីស្ថានឲ្យប្រយុទ្ធប្រឆាំងនឹងក្រុមភេរវនិយម Haqqani ដែលអាមេរិកបានចោទថា ជាអ្នកវាយប្រហារទៅលើកងកម្លាំងអូតង់ នៅក្នុងទឹកដីអាហ្វហ្កានីស្ថាន។នៅថ្ងៃសុក្រនេះ នៅខេត្តPeshawar គ្រាប់ផ្ទុះត្រូវគេប្រើវាយប្រហារទៅលើរថយន្តដឹកបុគ្គលិករដ្ឋាភិបាលមួយគ្រឿងដោយបានសម្លាប់មនុស្ស១៨នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ក្នុងរឿងប្រយុទ្ធប្រឆាំងនឹងក្រុមប្រដាប់អាវុធ រដ្ឋមន្រ្តីការពារជាតិអាមេរិកបាននិយាយព្រមានថា ទីក្រុងវ៉ាស៊ីនតោន លែងមានភាពអត់ធ្មត់នឹងប៉ាគីស្ថានទៀតហើយ។ ប៉ាគីស្ថានបានក្លាយជាឋានសួរគ៌ សម្បុកលាក់ខ្លួនដ៏មានប្រសិទ្ធិភាពរបស់ពួកអ៊ីស្លាមជ្រុលនិយម Haqqani។ ពួកHaqqaniដែល អាមេរិកបានចាត់ទុកជាបណ្តាញអាល់កៃដា ហើយបាន រួមគ្នាជាមួយពួកតាលីបង់ យកទឹកដីប៉ាគីស្ថានដើម្បីវាយប្រហារទៅលើកងកម្លាំងអាហ្វហ្កានិស្ថាន និងទ័ពអូតង់។
កាលពីចុងឆ្នាំមុន ក្នុងពេលលោកធ្វើជានាយសេនាធិការកងទ័ពចម្រុះអាមេរិក លោកMike Mullenធ្លាប់បាននិយាយថា ក្រុមប្រដាប់អាវុធ Haqqaniជាដៃជើងរបស់ភ្នាក់ងារស៊ើបការណ៍សម្ងាត់ប៉ាគីស្ថាន។ មួយខែក្រោយមក រដ្ឋមន្រ្តីការពារប៉ាគីស្ថានបានរុញច្រាន ការចោទប្រកាន់ និងនិយាយបកទៅវិញថា អាមេរិកមិនចាំបាច់ញុះញង់ប៉ាគីស្ថានឲ្យ ធ្វើសង្រ្គាមជាមួយពួកក្រុមប្រដាប់អាវុធនៅប៉ាគីស្ថានទេ ប៉ុន្តែ អាមេរិកគួរផ្តោតតែទៅលើបញ្ហានៅ អាហ្វហ្កានីស្ថានបានហើយ។
សម្រាប់Leon Panettaថា វាច្បាស់ណាស់ថា សន្តិភាពអាចកើតមាននៅអាហ្វហ្កានីស្ថាន ដរាបណាប៉ាគីស្ថានឈប់ផ្តល់ជំរកដ៏សុវត្ថិភាព ដោយចាត់វិធានការជាក់ស្តែងវាយប្រហារទៅលើពួកអ៊ីស្លាមជ្រុលនិយមដែលមានពួកតាលីបង់ និងពួកHaqqaniជាដើម។ រហូតមកដល់ពេលនេះ ប៉ាគីស្ថាននៅតែបដិសេធការចោទប្រកាន់ និងថា ខ្លួនក៏ជាអ្នករងគ្រោះដោយការវាយប្រហារពីក្រុមប្រដាប់អាវុធHaqqani នេះដែរ។
រាប់ឆ្នាំមកហើយ អាមេរិកបានជំរុញ ទីក្រុងអ៊ីស្លាម៉ាបាតឲ្យចរចាជាមួយក្រុមប្រដាប់អាវុធនៅតំបន់កុលសម្ព័ន្ធ ដែលស្ថិតនៅជាប់ព្រំដែន ជាមួយអាហ្វហ្កានីស្ថាន។ ប៉ុន្តែ ប៉ាគីស្ថានដែលមិនពេញចិត្តនឹងប្រតិបត្តិការអាមេរិក សម្លាប់ប៊ិនឡាដិន ដោយមិនឲ្យខ្លួនដឹងមុន បានបែរជំហរ លែងស្តាប់អាមេរិក ដូចមុន។ ប៉ាគីស្ថានបានចោទប្រកាន់អាមេរិកថា បានរំលោភអធិបតេយ្យភាពរបស់ខ្លួន ដោយបានប្រើយន្តហោះ Drone បាញ់សម្លាប់ប្រជាជនស៊ីវិល និងទាហានប៉ាគីស្ថាន២៤នាក់ នៅព្រំដែនជាមួយអាហ្វហ្កានីស្ថាន៕ យន្តហោះ Droneនេះហើយ ដែល កាលពីសប្តាហ៍មុន អាមេរិកបានប្រើ ដើម្បីបាញ់សម្លាប់មេទីពីររបស់អាល់កៃដា នៅតំបន់កុលសម្ព័ន្ធជាប់ព្រំដែនអាហ្វហ្កានីស្ថាន។
គេជឿថា ការសហការជាមួយប៉ាគីស្ថានគឺជារឿងចាំបាច់ សម្រាប់សន្តិសុខនៅតំបន់ ជាពិសេស នៅក្រោយពេលកងទ័ពអូតង់ត្រូវដកចេញពីអាហ្វហ្កានីស្ថាន នៅចុងឆ្នាំ ២០១៤ ប៉ុន្តែ យ៉ាងណាក៏ដោយ ប៉ាគីស្ថាននៅតែបដិសេធ មិនអាមេរិកប្រើ ឆ្លងកាត់ទឹកដីខ្លួន ដើម្បីដឹកជញ្ជូនភស្តុភារទៅឲ្យកងទ័ពអូតង់នៅកាន់អាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ