មហាសន្និបាត អ.ស.បចាត់ទុកការបោះឆ្នោតប្រជាមតិ នៅគ្រីមេថា ខុសច្បាប់
កាលពីថ្ងៃព្រហស្បតិ៍ ទី ២៧ មីនា មហាសន្និបាតរបស់អង្គការសហប្រជាជាតិបានចាត់ទុក ការបោះឆ្នោតប្រជាមតិ នៅគ្រីមេ កាលពីថ្ងៃទី ១៦មីនាកន្លងទៅ ថា រឿងខុសច្បាប់។ អង្គការសហប្រជាជាតិមានប្រទេសសមាជិក១៩៣។ អត្ថបទច្បាប់ដែលរៀបចំឡើងដោយរដ្ឋាភិបាលអ៊ុយក្រែន និងប្រទេសលោកខាងលិច បានទទួលសំឡេងគាំទ្រ ១០០ នៅពេលដែលសំឡេងប្រឆាំងមានចំនួន ១១ និងសំឡេងអនុប្បវាទ ដល់ទៅ ៥៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
សេចក្តីសម្រេចរបស់អង្គការសហប្រជាជាតិបានចាត់ទុកថា ការបោះឆ្នោតប្រជាមតិនៅគ្រីមេ ថា ខុសច្បាប់ និងគ្មានសុពលភាព ធ្វើឲ្យលក្ខន្តិកៈរបស់ជ្រោយគ្រីមេ ដែលជាទឹកដីរបស់អ៊ុយក្រែន ប្រែប្រួល។ សេចក្តីសម្រេចបានទាមទារឲ្យប្រទេសទាំងអស់ មិនទទួលស្គាល់ការផ្លាស់ប្តូរលក្ខន្តិកៈថ្មីរបស់គ្រីមេ ពោលគឺគ្រីមេ ដែលពេលនេះ បានកាត់ផ្តាច់ពីអ៊ុយក្រែន និងត្រូវបានទីក្រុងម៉ូស្គូធ្វើច្បាប់ យកចូល ជាទឹកដីរបស់រុស្ស៊ី កាលពីសប្តាហ៍មុន។
អ៊ុយក្រែន និងប្រទេសលោកខាងលិចបានចងក្រងសេចក្តីសម្រេចមួយ ដែលមិនសូវតឹងតែង និងមិនបានរិះគន់ចំៗ ប្រទេសរុស្ស៊ី។ នោះ គឺដើម្បីទទួលបានការគាំទ្រ និងដើម្បីឲ្យមហាសន្និបាតបោះឆ្នោតអនុម័តសេចក្តីសម្រេច។
ប៉ុន្តែ គ្មានអ្វីគួរឲ្យភ្ញាក់ផ្អើល រុស្ស៊ី បាននាំមុខគេ បោះឆ្នោតប្រឆាំង និងចាត់ទុកសេចក្តីសម្រេច ថា ជាវិធានការប្រឆាំងនឹងការរីកចម្រើន។ កាលពីថ្ងៃទី ១៩ មីនាកន្លងទៅ រុស្ស៊ី ក្នុងនាមជាសមាជិកអចិន្ត្រៃ៍យរបស់ក្រុមប្រឹក្សាសន្តិសុខបានបោះឆ្នោតវេតូលើសេចក្តីសម្រេចរបស់ក្រុម ប្រឹក្សាសន្តិសុខ ដែលចែងថ្កោលទោសទៅលើការបោះឆ្នោតប្រជាមតិ ដែលផ្តាច់គ្រីមេ ចេញពីទឹកដីអ៊ុយក្រែន។
ក្នុងចំណោមប្រទេសទាំង១០ដែលបោះឆ្នោតប្រឆាំងជាមួយរុស្ស៊ី ភាគច្រើនជាសម្ព័ន្ធមិត្តរបស់រុស្ស៊ី ដូចជាស៊ីរី បេឡារុស្ស កូរ៉េខាងជើង គុយបា ឬវេណេស៊ុយអេឡា ជាដើម។ ប្រទេស៥៨ដែលបោះឆ្នោតអនុប្បវាទ មិនគាំទ្រ ហើយក៏មិនប្រឆាំង មានដូចជាប្រទេសចិន ឥណ្ឌា ប៉ាគីស្ថាន អេហ្ស៊ីប ប្រេស៊ីល និងអាហ្រ្វិកខាងត្បូង។ អាមេរិក ប្រទេសសម្ព័ន្ធមិត្តនៅអឺរ៉ុប និងបណ្តាប្រទេសនៅអាស៊ីស្ថិតនៅក្នុងចំណោមប្រទេសទាំង ១០០ដែលបានបោះឆ្នោត គាំទ្រសេចក្តីសម្រេចរបស់អង្គការសហប្រជាជាតិ។
សូមបញ្ជាក់ថា សេចក្តីសម្រេចរបស់អង្គការសហប្រជាជាតិ ត្រូវបានបោះឆ្នោតឡើង ដើម្បីជានិមិត្តរូប និងដើម្បីបញ្ជាក់ជំហររបស់ប្រទេសភាគច្រើននៅលើពិភពលោកស្តីពីបូរណភាពទឹកដីរបស់អ៊ុយក្រែន។ ប៉ុន្តែ សេចក្តីសម្រេចរបស់អង្គការសហប្រជាជាតិគ្មានតម្លៃ ចាប់ចង តម្រូវឲ្យរុស្ស៊ីប្រគល់ទឹកដីគ្រីមេទៅឲ្យអ៊ុយក្រែនវិញទេ។
សម្រាប់ឯកអគ្គរដ្ឋទូតអ៊ុយក្រែន នៅ អង្គការសហប្រជាជាតិ សេចក្តីសម្រេចរបស់អង្គការសហប្រជាជាតិបញ្ជាក់ពីការគាំទ្ររដ្ឋាភិបាលអ៊ុយក្រែន និងអាចជួយធានាបូរណភាពទឹកដីរបស់អ៊ុយក្រែន ទប់ទល់ទៅនឹងការឈ្លានពានទៅថ្ងៃមុខទៀត របស់រុស្ស៊ី។ តាមរដ្ឋាភិបាលអ៊ុយក្រែន រុស្ស៊ីនៅបន្តពង្រាយទ័ពយ៉ាងក្រាស់ក្រែន នៅតាមព្រំដែន រហូតធ្វើឲ្យអ៊ុយក្រែនបារម្ភថា នឹងអាចប្រើជាលេសដើម្បីចូលទៅឈ្លានពាន និងគ្រប់គ្រងទឹកដីផ្សេងទៀត របស់អ៊ុយក្រែន ដូចដែលរុស្ស៊ីបានធ្វើកន្លងមកទៅលើជ្រោយគ្រីមេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ