លោក ថាក់ស៊ីន នឹងមិនមានមុខតំណែងណាមួយក្នុងរដ្ឋាភិបាលថ្មីទេ
ទន្ទឹមនឹងពេលដែលគណបក្សភឿថៃ កំពុងចរចារៀបចំរដ្ឋាភិបាលចម្រុះថ្មីរបស់ខ្លួន ពាក្យចចាមអារ៉ាមមួយបានលេចឮថា លោកថាក់ស៊ីនស៊ីណាវ៉ាត់ដែលកំពុងស្នាក់នៅទីក្រុងឌូបៃ នឹងទទួលបានតំណែងមួយនៅក្នុងរដ្ឋាភិបាលអាណត្តិថ្មីនេះ ដែលនឹងដឹកនាំដោយប្អូនស្រីរបស់លោក។ ប៉ុនែ្តពាក្យចចាមអារ៉ាមនេះត្រូវបានច្រានចោលដោយលោកស្រីយីងឡាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នៅចំពោះមុខអ្នកកាសែតជាច្រើន នៅថ្ងៃពុធនេះ លោកស្រី យីងឡាក់ស៊ីណាវ៉ាត់ បានអះអាងថា គណបក្ស ភឿថៃ មិនបានគ្រោងទុកតួនាទីណាមួយសំរាប់លោកថាក់ស៊ីននោះទេ។ លោកថាក់ស៊ីន គ្រាន់តែជាអ្នកផ្តល់ប្រឹក្សានឹងលើកទឹកចិត្តពួកគាត់ប៉ុណ្ណោះ ។
ការឆ្លើយតបនេះ គឺស្របពេលដែលកាសែតថៃមួយចំនួន បានចុះផ្សាយថា អតីតនាយករដ្ឋមន្រ្តីថៃ លោកថាក់ ស៊ីន ដែលត្រូវបានទម្លាក់ពីតំណែង ដោយរដ្ឋប្រហារយោធាមួយកាលពីឆ្នាំ២០០៦ នឹងត្រូវតែងតាំងអោយទទួលបន្ទុកផ្នែកពាណិជ្ចកម្ម នៅក្រៅប្រទេស។ ជាមុខតំណែងមួយដែលអាចអោយលោកធ្វើដំណើរដោយសេរីជុំវិញពិភពលោកមុននឹងត្រលប់ចូលទឹកដីថៃទៀតផង។
ប៉ុន្តែ អនាគតនាយករដ្ឋមន្ត្រីថៃដែលកំពុងតែមមាញឹកក្នុងការរៀបចំរដ្ឋាភិបាលចម្រុះថ្មីរបស់ខ្លួនបានអះអាងថា បងប្រុសរបស់គាត់ដែលកំពុងតែ ស្នាក់នៅឯបរទេស មិនមានបំណងចង់បានមុខតំណែងណាមួយនោះឡើយ។ លោកស្រីបាននិយាយដោយសំឡេងម៉ត់ចត់ថា “ អ្វីដែលគាត់ចង់បាននោះ គឺការផ្សះផ្សាជាតិតែប៉ុណ្ណោះ”។
គួរបញ្ជាក់ដែរថា លោកថាក់ស៊ីន ដែលបានរត់ភៀសខ្លួនទៅស្នាក់នៅក្នងទីក្រុងឌូបៃ ប្រទស អារ៉ាប់រួមបានត្រូវតុលាការថៃកាត់ទោសកំបាំងមុខ អោយជាប់គុកពីរឆ្នាំដោយចោទថាលោកបានកេងប្រវ័ញ្ចថវិកាជាតិ។
ដូច្នេះ ជោគជ័យរបស់គណបក្សភឿថៃដែលស្និទ្ធនឹងរូបលោក ត្រូវបានគេមើលឃើញថា ជាឱកាសមួយដ៏ល្អ ដែលអាចអោយលោកត្រលប់ចូលស្រុកវិញបាន។
អ្នកវិភាគនយោបាយម្នាក់ ប្រចាំនៅទីក្រុងបាងកក ដែលត្រូវបានសម្ភាសដោយកាសែតបារាំង Le Nouvel Observateur បានវាយតម្លៃថា ប្រកដណាស់ លោកថាក់ស៊ីន នឹងត្រលប់ទៅចូលប្រទេសថៃវិញ។ គ្រាន់តែថាគាត់នឹងមិនធ្វើវាភ្លាមៗនោះទេ ។ បើមិនដូច្នេះទេ អ្នកប្រជាធិបតេយ្យ ព្រមទាំងបក្សពួកប្រឆាំងនឹងរិៈគន់ពីភាពមិនត្រឹមត្រូវ នៅក្នុងប្រព័ន្ធយុត្តិធម៌ជាតិថៃ។ ប៉ុន្តែ ក្រុមបក្សពួករបស់លោក ថាក់ ស៊ីននឹងរិៈរកគន្លឹះណាមួយ ដើម្បីជួយលោកអោយរួចពីការចោទប្រកាន់ទាំងឡាយពីមុនមក អោយខានតែបាន។
អ្នកវិភាគនយោបាយដដែល បានបន្តទៀតថា រីឯក្រុមយោធាថៃ ពួកគេនៅតែដើរតួនាទីសំខាន់នៅក្នុងឆាកនយោបាយថៃដូចកាលពីមុន បើទោះបីជាពួកគេយល់ព្រមទទួលស្គាល់លទ្ធផលបោះឆ្នោតកន្លងមកក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ