មហេសីរបស់ព្រះអង្គស្នងរាជ្យថៃបោះបង់ចោលងារ ទៅធ្វើជារាស្ត្រសាមញ្ញ
រាជរាំងថៃបាននិយាយនៅថ្ងៃសៅរ៍នេះថា មហេសីរបស់ព្រះបុត្រាស្នងរាជ្យ បានបោះបង់ចោលងាររបស់ខ្លួន ទៅធ្វើជារាស្ត្រសាមញ្ញ។ នេះគឺជាការបញ្ជាក់ដោយផ្លូវការជាលើកទី១ នៃការលាលែងរបស់ព្រះនាង បន្ទាប់ពីសាច់ញាត្តិទ្រង់ត្រូវបានចាប់ខ្លួនពីបទជាប់ពាក់ព័ន្ធនិងរឿងអាស្រូវពុករលួយក្នុងស្ថាប័នប៉ូលីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ព្រះមហាក្សត្របានចេញការអនុញ្ញាត ដើម្បីប្រកាសថា ព្រះនាងស្រ៊ីរ៉ាស្ម៊ី មហេសីរបស់ព្រះអង្គស្នងរាជ្យ ម៉ាហា វ៉ាជីរ៉ាឡុងកន បានបញ្ជាក់នៅក្នុងសារលិខិតថា ព្រះនាងបានលាលែងចេញពីខ្សែរាជវង្ស-នេះបើតាមសេចក្តីថ្លែងការរបស់ព្រះរាជរាំង។
ព្រះនាងស្រ៊ីរ៉ាស្ម៊ី បានរៀបអភិសេកជាមួយនិងព្រះរាជទាយាទកាលពីឆ្នាំ២០០១ ហើយរហូតមកទល់នឹងពេលនេះ ព្រះអង្គមានបុត្រាមួយអង្គ។
នៅប៉ុន្មានសប្តាហ៍នេះ មានពាក្យចចាមអារាមជាច្រើនទាក់ទងទៅនឹងជោគរាសនារបស់ក្រុមគ្រួសារព្រះនាងស្រ៊ីរ៉ាស្ម៊ី នៅទូទាំងប្រទេសថៃ បន្ទាប់ពីសាច់ញាតិរបស់ព្រះនាងជាច្រើននាក់ត្រូវបានចាប់ខ្លួននៅក្នុងរឿងអាស្រូវពុករលួយយ៉ាងធំក្នុងស្ថាប័នប៉ូលីស ដែលបានធ្វើឲ្យរង្គោះរង្គើរយ៉ាងខ្លាំងក្នុងស្រទាប់អភិជនថៃ។
មន្ត្រីជាន់ខ្ពស់ជាច្រើនរូបត្រូវបានចាប់ខ្លួន ដែលរួមមានទាំងក្បាលម៉ាស៊ីនរបស់ស្ថាប័នប៉ូលីស និងយោធាផង នៅខណៈដែលមហាសេដ្ឋីដែលមានទ្រព្យសម្បត្តិស្តុកស្តម្ភបំផុតម្នាក់នៅក្នុងប្រទេសថៃ កំពុងតែរត់គេចខ្លួនពីការចោទប្រកាន់របស់ប៉ូលីសទាក់ទងនឹងការសូកប៉ាន់។
ការបង្ហាញជាលើកដំបូង ដែលថាងារក្នុងខ្សែរាជវង្សរបស់ព្រះនាងស្រ៊ីរ៉ាស្ម៊ីស្ថិតនៅក្នុងភាពមន្ទិលនោះ ត្រូវបានលាតត្រដាង កាលពីដើមខែនេះ នៅពេលដែលព្រះអង្គម្ចាស់ស្នងរាជ្យបានប្រកាសថា រាល់សមាជិកនៅក្នុងក្រុមគ្រួសាររបស់ព្រះនាងត្រូវបានលុបចេញពីបញ្ជីឈ្មោះខ្សែរាជវង្ស។
សូមបញ្ជាក់ថា រាជាធិបតេយ្យនៅក្នុងប្រទេសថៃ គឺត្រូវបានការពារដោយច្បាប់រាជវង្សយ៉ាងតឹងរឹងបំផុតនៅក្នុងពិភពលោក។ ទាំងសារព័ត៌មានក្នុងស្រុកនិងអន្តរជាតិត្រូវតែស្ថិតក្រោមការត្រួតពិនិត្យយ៉ាងហ្មត់ចត់បំផុតនៅពេលដែលសរសេរព័ត៌មានទាក់ទងនិងក្រុមគ្រួសាររាជវង្សថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ