ប្រជាជនក្រុងបាងកក ទម្លាយទំនប់ ដោយកំហឹង
ទំនប់ទឹកធ្វើពីបាវខ្សាច់ ការពារក្រុងបាងកកទប់ទល់គ្រោះភ័យទឹកជំនន់ ត្រូវបានចោះទម្លាយឲ្យរបើកមួយភាគ ដោយស្នាដៃបណ្តាជនរស់នៅក្នុងសង្កាត់ភាគខាងជើង ក្រុងបាងកក ព្រោះតែភ្លើងកំហឹងមួយឆាប ច្រណែននឹងអ្នករស់នៅកណ្តាលក្រុង។ ភាគកណ្តាលក្រុង ដែលបានរួចផុតពីការគំរាមកំហែងជន់លិច តែនៅភាគខាងជើងវិញ ប្រជាជនរស់នៅត្រាំទឹក អស់ជាច្រើនសប្តាហ៍មកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
បើយោងតាមប្រភពព័ត៌មានប៉ូលិស ស្នាមរបើកធ្លាយ មិនជ្រៅទេ ប៉ុន្តែវាមានរង្វះប្រមាណជា៧ម៉ែត្រ និងពង្រីកឡើងដល់ជាង៨ម៉ែត្រ នៅថ្ងៃអាទិត្យម្សិលមិញ ដោយស្នាដៃបាតុករជាង១០០នាក់។ បាតុករដែលនាំគ្នាខឹងសម្បាមួយឆាប ព្រោះមិនអាចទ្រាំទ្ររស់ ត្រាំត្រែងក្នុងទឹកបានទៀត។ ដូច្នេះដើម្បីសម្រកទឹកខ្លះ បណ្តាជនរស់នៅក្នុងសង្កាត់ ដនមឿន ភាគខាងជើងបំផុតនៃក្រុងបាងកក បាននាំគ្នាស្ទុះទៅទម្លាយទំនប់ ព័ទ្ធការពារទីប្រជុំជនក្រុងបាងកក ដែលមានប្រវែង១៥គ.ម.។
អាជ្ញាធរបានសាកល្បងបិទស្នាមចោះនោះដែរ ទោះបីជាមានចលនាបាតុកម្មប្រឆាំង និងគំរាមបិទខ្ទប់ផ្លូវថ្នល់ធំៗក៏ដោយ។ រហូតមកទល់ព្រឹកនេះ ចលនាបះបោរផ្ទុះកំហឹង ទម្លាយទំនប់ហាក់បានស្ងប់ស្ងាត់ទៅវិញហើយ។
សូមបញ្ជាក់ថា ទីប្រជុំជន សង្កាត់ពាណិជ្ជកម្ម និងហិរញ្ញវត្ថុរបស់រាជធានី ត្រូវបានការពារ ដោយទំនប់បាវខ្សាច់ពិសេស ក្នុងមួយបាវៗទម្ងន់២តោន សម្រាប់ទប់ទល់នឹងគ្រោះទឹកជំនន់។ ទឹកជំនន់ ដែលបានយាយី ប្រទេសថៃអស់រយៈពេលជាងបីខែមកហើយ បានសម្លាប់ជីវិតមនុស្សអស់៥៦២នាក់។
ទោះបីជាពេលនេះ ទឹកចាប់ផ្តើមស្រកជាបណ្តើរៗ ខេត្តភាគខាងជើងផ្តើមបោសសម្អាតភក់ជ្រាំ ប៉ុន្តែ ក្រុងបាងកក មិនទាន់អាចវិលមករកភាពធម្មតាបានដោយងាយនិងឆាប់ៗទេ អាកាសយានដា្ឋនដនមឿននៅតែបន្តបិទទ្វារ ចរាចរណ៍តាមផ្លូវថ្នល់សំខាន់ៗនៅតែហាមឃាត់។ លោកស្រីរដ្ឋមន្ត្រីការបរទេសអាមេរិក ហ៊ីឡារី គ្លីនតុន នឹងអញ្ជើញទៅដល់ក្រុងបាងកកនៅថ្ងៃខានស្អែក ដើម្បីសម្តែងសាមគ្គីភាព ជាមួយប្រទេសថៃ ដែលបាននិងកំពុងស្ថិតក្នុងគ្រោះមហន្តរាយទឹកជំនន់ ដ៏ធ្ងន់ធ្ងរបំផុត មិនធ្លាប់មានក្នុងរយៈពេលកន្លះសតវត្សនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ