ការកំណត់តម្លៃដីធ្លីបង់ពន្ធលើអចលនទ្រព្យបង្កអោយកម្មសិទ្ធិករមិនសប្បាយចិត្ត
ការកំណត់តម្លៃដីធ្លីដើម្បីបង់ពន្ធលើអចលនទ្រព្យបង្កអោយមានភាពមិនសប្បាយចិត្តដល់កម្មសិទ្ធិករ។ ការមិនសប្បាយចិត្តនេះ គឺដោយសារការកំណត់តម្លៃអចលទ្រព្យខ្វះសុក្រឹតភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
ក្នុងខណៈពេលដែលនីតិវិធីនៃការបង់ពន្ធលើអចលនទ្រព្យបាននិងកំពុងដំណើរការទៅមុខនោះ កម្មសិទ្ធិករអចលនទ្រព្យមួយចំនួននៅទីក្រុងភ្នំពេញបានសម្តែងការមិនសប្បាយចិត្តចំពោះតម្លៃដីធ្លីដែលកំណត់ដោយរដ្ឋាភិបាល។
ដោយសារការកំណត់តម្លៃដីធ្លីផ្ទះសម្បែងថ្លៃពេក ម្ចាស់ផ្ទះមួយចំនួនបានសម្រេចចិត្តដាក់លក់ទ្រព្យសម្បត្តិរបស់ខ្លួនដើម្បីចង់ដឹងថា តើតម្លៃដែលកំណត់ដោយរដ្ឋាភិបាលអាចលក់បាននៅលើទីផ្សារបច្ចុប្បន្នបានដែរឬទេ?
ម្ចាស់ដីម្នាក់នៅក្នុងខណ្ឌចំការមនស្ថិតនៅក្នុងផ្លូវលេខ៩៧បានបញ្ជាក់ប្រាប់ថា ដីរបស់គាត់ត្រូវបានរដ្ឋាភិបាលកំណត់តម្លៃ១០០០ដុល្លារក្នុងមួយម៉ែត្រក្រឡា។ តម្លៃនេះជាតម្លៃដែលគាត់គិតថា មានកម្រិតខ្ពស់។ អ៊ីចឹងហើយទើបគាត់ដាក់លក់ ប៉ុន្តែរហូតមកដល់ពេលនេះ មិនទាន់មានអ្នកទិញនៅឡើយទេ។ អ្នកជិតខាងផ្សេងទៀតក៏បានត្អូញត្អែរពីបញ្ហានេះដូចគ្នាដែរ។
ការកំណត់តម្លៃថ្លៃជារឿងមួយ ប៉ុន្តែអ្វីដែលប្រជាជនមួយចំនួនមិនសប្បាយចិត្តកាន់តែខ្លាំងនោះគឺការកំណត់តម្លៃខុសគ្នានៃទីតាំងដីធ្លី។ អ្នករស់នៅក្នុងតំបន់ខ្លះបានលើកឡើងថា បើផ្អែកលើតម្លៃទីផ្សារជាក់ស្តែង ដីរបស់ពួកគេមានតម្លៃទាបជាងដីតំបន់មួយទៀត ប៉ុន្តែនៅពេលរដ្ឋកំណត់តម្លៃវិញ ដីរបស់ពួកគេបែរជាថ្លៃជាងទៅវិញ។ តើការគិតគូរនេះពឹងផ្អែកលើមូលដ្ឋានអ្វីខ្លះ?
លោក ស៊ឹង ប៊ុណ្ណា នាយកទីភ្នាក់ងារអចលនទ្រព្យប៊ុណ្ណារៀលធី ដែលធំជាងគេនៅទីក្រុងភ្នំពេញបានទទួលស្គាល់ថា បច្ចេកទេសនៃការវាយតម្លៃដីធ្លីនៅមានបញ្ហា ពោលគឺនៅមិនទាន់មានសុក្រឹតភាព១០០ភាគរយនៅឡើយទេ។ ប្រជាជន និងអាជ្ញាធរមូលដ្ឋានត្រូវជជែកគ្នាឡើងវិញ ដើម្បីធ្វើយ៉ាងដូចម្តេចអោយការវាយតម្លៃសម្រាប់ឆ្នាំក្រោយមានភាពសុក្រឹតជាងឆ្នាំ២០១១នេះ។
បន្ទាប់ពីបានពន្យារពេលជាច្រើនសារួចមក ការបង់ពន្ធលើអចលនទ្រព្យសម្រាប់ឆ្នាំ២០១១នឹងត្រូវបិទបញ្ចប់នៅថ្ងៃទី៣១ខែធ្នូឆ្នាំ២០១១ខាងមុខនេះ។ នេះជាលើកទីមួយហើយនៅក្នុងប្រទេសកម្ពុជាដែលមានការបង់ពន្ធលើអចលនទ្រព្យរបៀបនេះ។ ប្រជាជនមួយចំនួនធំបានចូលរួមបង់ពន្ធ ប៉ុន្តែប្រជាជនខ្លះទៀតនៅមិនទាន់អើពើនឹងបញ្ហានេះនៅឡើយទេ។
អ្នកជំនាញមួយចំនួននិយាយថា ប្រជាជនអាចមិនបង់នៅពេលនេះបាន ប៉ុន្តែពួកគេនៅតែជាប់កាតព្វកិច្ចពន្ធដដែល នៅពេលដែល ពួកគេលក់អចលនទ្រព្យនោះ។ និយាយបែបផ្សេងមានន័យថា ពួកគេមិនអាចគេចរួចពីការបង់ពន្ធបានឡើយ។
លោក ស៊ឹង ប៊ុណ្ណា នាយកទីភ្នាក់ងារអចលនទ្រព្យប៊ុណ្ណារៀលធីបាននិយាយទៀតថា ប្រាក់បានពីការបង់ពន្ធជូនរដ្ឋគឺដើម្បីបម្រើការកសាងហេដ្ឋារចនាសម្ព័ន្ធរបស់ជាតិ។
សូមបញ្ជាក់ថា ទីផ្សារដីធ្លីនៅក្នុងប្រទេសកម្ពុជាបានដួលសន្លប់តាំងពីឆ្នាំ២០០៨មក ប៉ុន្តែនៅឆ្នាំនេះ ទីផ្សារអចលនទ្រព្យបានងើបឡើងវិញបន្តិច ។ ហើយនៅឆ្នាំក្រោយ ទីផ្សារនឹងកាន់តែប្រសើរថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ