ប្រទេសបារាំងនឹងខិតខំផ្តល់ជំនួយមនុស្សធម៌ជូនប្រជាជនស៊ីរី
ទីក្រុងប៉ារីសនឹងឆ្លៀតឱកាសដែលខ្លួនកាន់តំណែងជាប្រធានក្រុមប្រឹក្សាសន្តិសុខនៃអ.ស.ប. ដើម្បីជួយអភិវឌ្ឍជំនួយមនុស្សធម៌ជូនប្រជាជនស៊ីរី។ ទាំងនេះក៏ពីព្រោះតែការខិតខំរិះរកដំណោះស្រាយតាមផ្លូវនយោបាយជួបនឹងភាពទាល់ច្រក ដោយហេតុតែមានការប្រឆាំងដោយប្រើសិទ្ធិវេតូពីសំណាក់ប្រទេសរុស្ស៊ីនិងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
« ប្រទេសបារាំងដែលឡើងកាន់តំណែងជាប្រធានផ្លាស់វេននៃក្រុមប្រឹក្សាសន្តិសុខនៃអ.ស.ប.សម្រាប់រយៈកាលមួយខែចាប់តាំងពីថ្ងៃទី១សីហាឆ្នាំ២០១២ នឹងខិតខំធ្វើយ៉ាងណាអូសទាញប្រទេសចិននិងប្រទេសរុស្ស៊ីឲ្យមកជួយអភិវឌ្ឍក្នុងវិស័យមនុស្សធម៌”។ នេះជាការប្រកាសឲ្យដឹងដោយប្រមុខការទូតបារាំង លោក ឡូរ៉ង់ ហ្វាប៊ីយូស ដែលគ្រោងរៀបចំឲ្យមានជំនួបប្រជុំថ្នាក់រដ្ឋមន្ត្រីនៅក្រុមប្រឹក្សាសន្តិសុខនៃអ.ស.ប.នៅដំណាច់ខែនេះនៅទីក្រុងញីវយ៉ក។
គួរកត់សម្គាល់ថា បច្ចុប្បន្ននេះមានប្រជាជនស៊ីរីប្រមាណបីលាននាក់ដែលមានកង្វះខាតចំណីអាហារនិងថ្នាំសង្កូវសព្វបែបយ៉ាង ហើយប្រជាជនរងគ្រោះទាំងនេះពុំទទួលបានជំនួយមនុស្សធម៌សមរម្យឡើយ ក្រៅតែពីមានជំនួយពីសំណាក់កាកបាទក្រហមស៊ីរី។
អ្នកការទូតបារាំងសង្ឃឹមថា « ប្រទេសរុស្ស៊ីនិងប្រទេសចិននឹងចេះដឹងឮសំឡេងរបស់សហគមន៍អន្តរជាតិដែលទាមទារឲ្យមានដំណោះស្រាយនយោបាយនៅក្នុងវិបត្តិស៊ីរីដែលពោរពេញទៅដោយសោកនាដកម្មនេះ។ ជាពិសេសក្រោយពីមានការលាឈប់ដោយបេសកជនពិសេសរបស់អ.ស.ប. លោកកូហ្វី អាណាន។
ថ្វីដ្បិតតែទីក្រុងម៉ូស្គូបានថ្លែងប្រាប់ថា គេពុំចូលចិត្តឡើយប្រធានាធិបតីស៊ីរី បាស្ហារអាល-អាស្សាដ ក៏ប៉ុន្តែប្រទេសរុស្ស៊ីពុំចង់ឃើញឡើយពួកអ៊ីស្លាមនិយមជ្រុលឡើងមកកាន់កាប់អំណាចនៅក្នុងប្រទេសស៊ីរី។ ទាំងនេះបាននាំឲ្យឯកអគ្គរដ្ឋទូតបារាំងប្រចាំអ.ស.ប.ថ្លែងព្រមានទីក្រុងម៉ូស្គូថា « បើប្រទេសរុស្ស៊ីនៅតែប្រកាន់យកឥរិយាបថបែបនេះ នៅទីបំផុតគឺ ពួកអ៊ីស្លាមនិយមជ្រុលនឹងឡើងមកកាន់កាប់អំណាចនៅក្នុងប្រទេសស៊ីរីជំនួសបាស្ហារអាល-អាស្សាដ ដែលជាការពុំចង់បាន ពុំចង់ឮដោយប្រទេសរុស្ស៊ី”។
មុននឹងបញ្ចប់ ឯកអគ្គរដ្ឋទូតបារាំងប្រចាំអ.ស.ប.ថ្លែងព្រមានថា « ការសម្លាប់រង្គាលមួយថ្មីអាចកើតមាននៅទីក្រុងអាឡេព។ ដោយហេតុថា កងកម្លាំងរបស់ បាស្ហារអាល-អាស្សាដ កំពុងប្រមូលផ្តុំទាហាននិងអាវុធយុទ្ធភ័ណ្ឌសំខាន់ៗដាក់នៅជុំវិញទីក្រុងអាឡេព »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ