ជនភៀសខ្លួនស៊ីរីសម្រុកចូលមកក្នុងទឹកដីតួកគី
តាំងពីថ្ងៃចន្ទទី៥កញ្ញាម្សិលមិញមក ជនភៀសខ្លួនស៊ីរីជាច្រើនរយនាក់ បាននិងកំពុងបន្តចូលមកក្នុងដែនដីនៃប្រទេសតួកគី ពីព្រោះកងទ័ពស៊ីរីបានវាយប្រហារទៅលើភូមិមួយនៅមិនឆ្ងាយប៉ុន្មានពីព្រំដែនរវាងប្រទេសទាំងពីរ។ ដោយឡែក កាលពីម្សិលមិញ ពួកជនភៀសខ្លួនស៊ីរីក្នុងជំរំមួយនៅលើទឹកដីតួកគី បាននាំគ្នាធ្វើបាតុកម្ម ដើម្បីប្រឆាំងនឹងប្រតិបត្តិការវាយបង្ក្រាបរបស់កងទ័ពស៊ីរីនៅប៉ែកពាយព្យនៃប្រទេស ជិតព្រំដែនជាមួយតួកគី។
ចុះផ្សាយនៅថ្ងៃ៖
ស្តាប់ - ០១:០៧
ជនភៀសខ្លួនស៊ីរីដែលបានចូលមកក្នុងទឹកដីតួកគី តាំងពីម្សិលមិញមក មានចំនួនពី៤០០ទៅ១ ០០០នាក់។ ពួកគេបានចាកចេញពីស្រុកកំណើត និងពីប្រទេសហើយបានឆ្លងចូលមកខាងទឹកដីតួកគី ដោយហេតុតែប្រតិបត្តិការយោធាស៊ីរី ទៅលើភូមិមួយដែលឋិតនៅចម្ងាយប្រមាណតែជាងមួយគីឡូម៉ែត្រប៉ុណ្ណោះ ពីទល់ដែនជាមួយតួកគី។
តាមសំដីរបស់ជនភៀសខ្លួនទាំងនេះ កងទ័ពស៊ីរីបានដេញប្រមាញ់ពួកគេចូលរហូតដល់ទឹកដីតួកគី។ តាំងពីខែមិថុនាមក ពោលគឺតាំងពីកងទ័ពរបស់Bachar el-Assad បានផ្តើមវាយបង្ក្រាបចលនាបាតុកម្ម ប្រជាជនស៊ីរីជាច្រើនពាន់គ្រួសារបានចូលមកជ្រកនៅលើទឹកដីតួកគី។ ចំនួនជនភៀសខ្លួនបានកើនរហូតដល់ទៅ ១២ ០០០នាក់នៅចុងខែមិថុនា។
ពួកជនភៀសខ្លួនអះអាងថា មានប្រជាជនស្លាប់រៀងរាល់ថ្ងៃក្រោមគ្រាប់កាំភ្លើងរបស់ទាហានស៊ីរី។ យោងទៅតាមអង្គការសហប្រជាជាតិ ប្រតិបត្តិការវាយបង្ក្រាបពួកបាតុករនៅស៊ីរីតរហូតមកទល់ពេលនេះ បានបណ្តាលឲ្យស្លាប់២ ២០០នាក់ បាត់ខ្លួនជាច្រើនពាន់នាក់ និងជាប់គុកជាងមួយម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ