លោកស៊ូប៊ែឌីពន្យល់ពីតួនាទីនិងបន្តលើកឡើងពីការរំលោភសិទ្ធិមនុស្សនៅកម្ពុជា
អាចថាជាការឆ្លើយតបទៅកាន់ប្រមុខរដ្ឋាភិបាលកម្ពុជាគឺនៅថ្ងៃសុក្រនេះលោកស៊ូរិយា ប្រាសាទស៊ូប៊ែឌី បានបញ្ជាក់ជាថ្មីពីតួនាទីរបស់លោកដែលក្រុមប្រឹក្សាសិទ្ធិមនុស្ស អង្គការសហប្រជាជាតិប្រគល់ឲ្យគឺលោកត្រូវតាមឃ្លាំមើលស្ថានភាពសិទ្ធិមនុស្សនៅក្នុងប្រទេសនិងរាយការណ៍ជាសាធារណៈទៅក្រុមប្រឹក្សាសិទ្ធិមនុស្ស។ ចំណែកអនុសាសន៍របស់លោកគ្រាន់តែលោកចង់ឲ្យស្ថានភាពសិទ្ធិមនុស្សនៅកម្ពុជា បានប្រសើរប៉ុណ្ណោះ។ លោក ស៊ូប៊ែឌី ក៏បានសម្តែងការភ្ញាក់ផ្អើលនិងមិនយល់ពីហេតុផលអ្វីបានជាប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន ប្រតិកម្មនឹងអនុសាសន៍របស់លោកហើយមិនជួបរូបលោក។យ៉ាងណាក៏ដោយក្នុងបេសកកម្មលើកនេះ លោកស៊ូប៊ែឌី បន្តលើកឡើងពីបញ្ហាដីធ្លី ប្រព័ន្ធតុលាការមិនឯករាជ្យ ប្រព័ន្ធបោះឆ្នោត រួមទាំងព្រួយបារម្ភពីសេរីភាពបញ្ចេញមតិនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:២៤
ចាប់តាំងពីទទួលបានការតែងតាំងពីក្រុមប្រឹក្សាសិទ្ធិមនុស្សអង្គការសហប្រជាជាតិ ក្នុងខែមីនាឆ្នាំ២០០៩លោក ស៊ូរិយា ប្រាសាទ ស៊ូប៊ែឌី បានធ្វើរបាយការណ៍សំខាន់ធំៗចំនួនបួន ដោយបានធ្វើការវិភាគជាលំអិតអំពីស្ថានភាពសិទ្ធិមនុស្សនិងបញ្ហាប្រឈមដែលប្រទេសកម្ពុជាជួបប្រទះទាក់ទងនឹងការការពារនិងការលើកស្ទួយសិទ្ធិមនុស្ស។
របាយការណ៍ប្រចាំឆ្នាំរបស់លោក ស៊ូប៊ែឌី ដាក់ជូនក្រុមប្រឹក្សាសិទ្ធិមនុស្សអង្គការសហប្រជាជាតិ បានផ្តោតជាសំខាន់លើប្រព័ន្ធយុតិ្តធម៌ រដ្ឋសភា និងកំណែទម្រង់ប្រព័ន្ធបោះឆ្នោត និងផលប៉ះពាល់លើសិទ្ធិមនុស្ស ដោយសម្បទានគោលដៅសេដ្ឋកិច្ច និងសម្បទានដទៃផ្សេងទៀត។
ក្នុងសន្និសីទកាសែត នៅរសៀលថ្ងៃសុក្រនេះ ដែលពេលបិទបញ្ចប់បេសកកម្ម រយៈពេលមួយសប្តាហ៍ ចាប់ពីថ្ងៃទី៨ធ្នូ លោក ស៊ូប៊ែឌី បានប្រកាសថា អាណត្តិការងារសំខាន់ដែលក្រុមប្រឹក្សាសិទ្ធិមនុស្ស អង្គការសហប្រជាជាតិ ប្រគល់ឲ្យលោកគឺការឃ្លាំមើលស្ថានភាពសិទ្ធិមនុស្សនៅក្នុងប្រទេស និងរាយការណ៍ជាសាធារណៈទៅក្រុមប្រឹក្សាសិទ្ធិមនុស្ស។
លោក ស៊ូប៊ែឌី ជឿជាក់ថាការសន្ទនាគឺជាមធ្យោបាយមួយដ៏សំខាន់ ឆ្ពោះទៅមុខ ហើយលោកបានបញ្ជាក់ម្តងហើយម្តងទៀតអំពីសារៈសំខាន់ នៃការសន្ទនានេះ ជាមួយដៃគូពាក់ព័ន្ធទាំងអស់ហើយជាពិសេសរដ្ឋាភិបាល។
លោក ស៊ូប៊ែឌី អះអាងថា លោកបានប្រកាន់ភ្ជាប់នូវគោលការណ៍សន្ទនាក្នុងន័យស្ថាបនា ក្នុងការបំពេញអាណត្តិការងាររបស់លោក ហើយនឹងបន្តធ្វើដូចនេះតទៅទៀត។ គោលដៅរបស់លោក គឺការផ្តល់ប្រឹក្សាយោបល់ សម្រាប់អនាគត នៃប្រទេសកម្ពុជា មានសុខសន្តិភាព ប្រជាធិបតេយ្យ ស្ថិរភាព និងនិរន្តរភាព ហើយអនុសាសន៍របស់លោក ធ្វើឡើង ដើម្បីផ្តល់ជូនជាដំណោះស្រាយ ចំពោះបញ្ហាប្រឈមមួយចំនួនខាងសិទ្ធិមនុស្ស ក្នុងប្រទេសនេះ។
លោក ស៊ូប៊ែឌី ក៏បានសម្តែងការសោកស្តាយជាខ្លាំងដែលលោកមិនបានជួបប្រាស្រ័យទាក់ទងជាមួយដៃគូពិភាក្សាក្នុងជួររដ្ឋាភិបាលនាពេលនេះ។អ្នករាយការណ៍ពិសេសក៏បានប្រកាសថា លោកមិនដឹងច្បាស់ទេថា ហេតុអ្វីបានជាស្ថានភាពទំនាក់ទំនងរវាងលោក និងរដ្ឋាភិបាល កើតឡើងយ៉ាងដូច្នេះ ហើយតើមកពីហេតុអ្វី?។
លោក ស៊ូប៊ែឌី ក៏បានបង្ហាញការភ្ញាក់ផ្អើលបន្តិច ដោយបានឮប្រតិកម្ម ចំពោះអនុសាសន៍មួយចំនួនរបស់លោក។ តែលោកអរគុណរដ្ឋាភិបាលដែលបានអញ្ជើញរូបលោកមកប្រទេសកម្ពុជា និងមិនធ្វើឲ្យមានការរាំងស្ទះដំណើររបស់លោកជួបនឹងជនរងគ្រោះដោយអំពើរំលោភបំពានសិទ្ធិមនុស្ស។
ក្នុងដំណើរការបេសកកម្មលើកនេះ លោក ស៊ូប៊ែឌី បានសំរេចចិត្ត ផ្តោតលើការឃ្លាំមើលស្ថានភាពសិទ្ធិមនុស្ស នៅកម្ពុជា និងតាមដានការអនុវត្តអនុសាសន៍ទាំងឡាយ ដែលមាននៅក្នុងរបាយការណ៍លើកមុនៗ របស់លោក។លោកស៊ូប៊ែឌី បានបន្តលើកឡើងថា កម្ពុជាបន្តអនុវត្តបានល្អលើសូចនាករជាច្រើនក្នុងវិស័យសេដ្ឋកិច្ចគាំទ្រដោយស្ថិរភាពនយោបាយ។ ក៏ប៉ុន្តែលោក ស៊ូប៊ែឌី មើលឃើញថាដោយសារតែកេរ្តិ៍ដំណែលប្រវត្តិសាស្ត្រ សិទ្ធិលើដីធ្លី បានក្លាយជាបញ្ហាដ៏ធំមួយ ក្នុងប្រទេសកម្ពុជា។លោកស៊ូប៊ែឌី បានធ្វើការអំពាវនាវសូមឲ្យពន្លឿនការអនុវត្តកម្មវិធីផ្តល់ប័ណ្ណកម្មសិទ្ធិដីធ្លីប្រកបដោយភាពត្រឹមត្រូវនិងតម្លាភាព ជូនប្រជាពលរដ្ឋកម្ពុជា។ លោកក៏មានកង្វល់ជាច្រើនអំពីការអនុវត្តកម្មវិធីផ្តល់ប័ណ្ឌកម្មសិទ្ធិដីធ្លី ដូចជា កង្វះតម្លាភាព ផលប៉ះពាល់របស់កម្មវិធីនេះ ទៅលើជនជាតិដើមភាគតិច និងអំពីរបៀបជ្រើសរើសសហគមន៍ដែលត្រូវផ្តល់ប័ណ្ណកម្មសិទ្ធិដីធ្លី។
លោក ស៊ូប៊ែឌី ជាថ្មីម្តងទៀត បានជំរុញឲ្យគ្រប់ភាគីទាំងអស់ និងគណៈកម្មាធិការជាតិរៀបចំការបោះឆ្នោត ដើម្បីធានាឲ្យមានការបោះឆ្នោតដោយសេរី យុត្តិធម៌ និងសន្តិវិធី។ អំពីឯករាជ្យភាព និងសមត្ថភាពនៃប្រព័ន្ធតុលាការ ក៏ត្រូវអ្នករាយការណ៍លើកឡើងដែរ។ ក្នុងនោះ លោក ស៊ូប៊ែឌី ក៏នៅតែមានការព្រួយបារម្ភជាខ្លាំងអំពីវប្បធម៌និទណ្ឌភាព នៅកម្ពុជា ដែលមិនមានជនល្មើស ត្រូវបាននាំខ្លួនមកតុលាការ ដើម្បីផ្តន្ទាទោសឡើយ។លោក ស៊ូប៊ែឌី ក៏បានបញ្ជាក់ថា លោកពិតជាមានការព្រួយបារម្ភជាខ្លាំងអំពីសេរីភាពក្នុងការបញ្ចេញមតិនៅកម្ពុជា ដូចជាករណីមួយចំនួន ទាក់ទងនឹងការគំរាមកំហែង និងការធ្វើទុក្ខបុកម្នេញដល់អ្នក ដែលបំពេញការងារក្នុងវិស័យព័ត៌មាន និងតស៊ូមតិផ្នែកសិទ្ធិមនុស្ស នៅកម្ពុជា ជាដើម។
តាមលោក ស៊ូប៊ែឌី អនុសាសន៍ទាំងឡាយរបស់លោក ដែលលើកឡើង អំពីមធ្យោបាយក្នុងការដោះស្រាយបញ្ហាប្រឈមទាំងនេះ គឺគ្រាន់តែដាក់ជូនរាជរដ្ឋាភិបាល ដើម្បីធ្វើការពិចារណាតែប៉ុណ្ណោះ។ លោកគោរពទាំងស្រុង ចំពោះអធិបតេយ្យភាពរបស់ប្រទេសកម្ពុជា និងសមត្ថកិច្ចរបស់រដ្ឋាភិបាលក្នុងការសំរេចចិត្តដើម្បីផលប្រយោជន៍ជាតិ។
កាលពីថ្ងៃព្រហស្បតិ៍ម្សិលមិញ លោកនាយករដ្ឋមន្ត្រី ហ៊ុន សែន បានប្រកាសមិនទទួលជួបលោក ស៊ូប៊ែឌី ដែលទំនងជាលោកនាយករដ្ឋមន្ត្រីចង់ថាលោក ស៊ូប៊ែឌី រំលោភលើអធិបតេយ្យភាពរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ