ជំនួបប្រជុំសហភាពអឺរ៉ុបនិងជប៉ុនតាមទូរសព្ទ
នៅថ្ងៃចន្ទនេះ នាយករដ្ឋមន្ត្រីជប៉ុន ប្រធានក្រុមប្រឹក្សាអឺរ៉ុប និងប្រធានគណកម្មការអឺរ៉ុប នឹងជួបពិភាក្សាគ្នាតាមទូរសព្ទ ដើម្បីសំរេចអោយបានកិច្ចព្រមព្រៀងពាណិជ្ជកម្មសេរីរវាងអឺរ៉ុប និងជប៉ុន។ធម្មតាមេដឹកនាំទាំងបីរូបត្រូវជួបប្រជុំតទល់មុខគ្នា នៅថ្ងៃចន្ទនេះ នៅទីក្រុងតូក្យូ ប៉ុន្តែដោយសារតែវិបត្តិនៅប្រទេសស៊ីប ពួកគេបានប្តូរទិសដៅមកពិភាក្សាតាមទូរសព្ទវិញ។
ចុះផ្សាយនៅថ្ងៃ៖
ស្តាប់ - ០២:០៨
នៅថ្ងៃចន្ទនេះ នាយករដ្ឋមន្ត្រីជប៉ុន លោក Shinzo Abe ប្រធានក្រុមប្រឹក្សាអឺរ៉ុបលោក Herman Van Rompuy និងប្រធានគណកម្មការអឺរ៉ុប លោក José Manuel Barroso នឹងជួបពិភាក្សាគ្នាតាមទូរសព្ទ ដើម្បីសំរេចអោយចេញនូវកិច្ចព្រមព្រៀងពាណិជ្ជកម្មសេរីរវាងអឺរ៉ុប និងជប៉ុន។
វិបត្តិនៅប្រទេសស៊ីប បានតំរូវអោយពួកគេប្តូរការប្រជុំពីការពិភាក្សាតទល់មុខគ្នា មកជាការពិភាក្សាតាមទូរសព្ទវិញ។ យោងតាមរដ្ឋាភិបាលជប៉ុន ក្នុងកិច្ចប្រជុំតាមទូរសព្ទនេះ មេដឹកនាំសហភាពអឺរ៉ុបនឹងពន្យល់ពីស្ថានភាពនៅប្រទេសស៊ីបដល់នាយករដ្ឋមន្ត្រីជប៉ុន។ ហើយប្រធានបទក្នុងកិច្ចប្រជុំ នឹងផ្តោតទៅលើការបន្តកិច្ចសហប្រតិបត្តិការគ្នាលើផ្នែកសេដ្ឋកិច្ចនិងកិច្ចព្រមព្រៀងនយោបាយ រវាងជប៉ុននិងសហភាពអឺរ៉ុប។
គួរកត់សំគាល់ថា សេដ្ឋកិច្ចសហភាពអឺរ៉ុបនិងជប៉ុនបូករួមគ្នា មានតំលៃស្មើនឹងមួយភាគបី នៃសកម្មភាពសេដ្ឋកិច្ចក្នុងពិភពលោក។ ប៉ុន្តែរយៈពេលប៉ុន្មានឆ្នាំចុងក្រោយនេះ ការនាំចេញផលិតផលអឺរ៉ុបចូលក្នុងប្រទេសជប៉ុនមានការធ្លាក់ចុះ ធ្វើអោយចំណាត់ផ្នែកនេះក៏ធ្លាក់ចុះតាមនោះដែរ គឺពីចំណាត់ថ្នាក់លេខ៣ដែលធ្លាប់តែទទួលបានកាលពី១០ឆ្នាំមុន ធ្លាក់មកដល់ចំណាក់ថ្នាក់លេខ៧ សំរាប់ពេលបច្ចុប្បន្ន។
យោងតាមលោក Karel De Gucht ដែលជាស្នងការផ្នែកសេដ្ឋកិច្ចនៅអឺរ៉ុបមួយរូប ការរឹតបន្តឹងផ្នែកបញ្ជាទិញសាធារណៈ គោលការណ៍ខុសពីគ្នាផ្សេងៗ បទបញ្ជានានាដែលមានលក្ខណៈរើសអើង សុទ្ធសឹងជាឧបសគ្គបង្កការរាំងស្ទះដល់ដំណើរការលូតលាស់នៃកិច្ចសហប្រតិបត្តិការសេដ្ឋកិច្ចរវាងសហភាពអឺរ៉ុបនិងជប៉ុន នាពេលបច្ចប្បន្ន។
ដូច្នេះ នៅថ្ងៃចន្ទនេះ គន្លឹះសំខាន់ក្នុងកិច្ចពិភាក្សារវាងសហភាពអឺរ៉ុបនិងជប៉ុន គឺត្រូវផ្តោតទៅលើការរកវិធានការដើម្បីដោះស្រាយបញ្ហានេះផងដែរ។
ការអនុវត្តន៍កិច្ចព្រមព្រៀងពាណិជ្ចកម្មសេរីលើទ្រព្យសម្បត្តិ សេវាកម្ម ការវិនិយោគនានា ផ្នែកចំណេះដឹង និងផ្នែកបញ្ជាទិញសាធារណៈ នឹងអាចអោយផលិតផលក្នុងស្រុករបស់សហភាពអឺរ៉ុបកើនឡើងបាន០,៨ភាគរយ។
ទន្ទឹមនេះដែរ ប្រទេសជប៉ុនចង់អោយសំរេចបានកិច្ចព្រមព្រៀងមួយជាមួយអឺរ៉ុប ដើម្បីគាំទ្រឧស្សាហកម្មអេឡិចត្រូនិក និងយានយន្តរបស់ខ្លួន ព្រោះថានៅទ្វីបអឺរ៉ុប ជប៉ុនកំពុងតែប្រឈមមុខនឹងការប្រកួតប្រជែងផ្នែកយានយន្តនិងអេឡិចត្រូនិក ជាមួយនឹងប្រទេសកូរ៉េខាងត្បូង។ គួររំលឹកថា ក្រុងសេអ៊ូលធ្លាប់បានសំរេចកិច្ចព្រមព្រៀងពាណិជ្ជកម្មសេរី ជាមួយសហភាពអឺរ៉ុបរួចមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ