ព្រះមហាក្សត្រនឹងយាងធ្វើទស្សនកិច្ចនៅប្រទេសជប៉ុននៅចុងសប្តាហ៍នេះ
ព្រះមហាក្សត្រកម្ពុជាព្រះបាទព្រះបរមនាថនរោត្តមសីហមុនី ព្រះអង្គនឹងយាងធ្វើទស្សនកិច្ចផ្លូវរដ្ឋរយៈពេល៥ថ្ងៃចាប់ពីថ្ងៃទី១៦ឧសភានេះទៅ។ រដ្ឋាភិបាលកម្ពុជាបានវាយតម្លៃខ្ពស់ចំពោះព្រះរាជដំណើរទស្សនកិច្ចនេះ ដើម្បីពង្រឹងអោយកាន់តែខ្លាំងថែមទៀតចំណងមិត្តភាព និងសហប្រតិបត្តិការទ្វេភាគីនៃប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
ព្រះមហាក្សត្រខ្មែរព្រះបាទព្រះបរមនាថ នរោត្តម សីហមុនីព្រះអង្គនឹងយាងចាកចេញពីប្រទេសកម្ពុជានៅថ្ងៃអាទិត្យទី១៦ខែឧសភាចុងសប្តាហ៍នេះ ដើម្បីបំពេញព្រះរាជទស្សនកិច្ចរយៈពេល៥ថ្ងៃនៅប្រទេសជប៉ុន។ នេះជាលើកដំបូងហើយ ដែលព្រះអង្គបានយាងធ្វើទស្សនកិច្ចនៅប្រទេសប្រជុំកោះជប៉ុន ចាប់តាំងពីព្រះអង្គយាងឡើងសោយរាជ្យសម្បត្តិ។
លោក កុយ គួងអ្នកនាំពាក្យក្រសួងការបរទេសកម្ពុជាបានថ្លែងប្រាប់អោយដឹងថា ក្នុងព្រះរាជដំណើរទស្សនកិច្ចនោះ ព្រះបាទព្រះបរមនាថ នរោត្តម សីហមុនីព្រះអង្គនឹងត្រូវទទួលជួបសវនាការដោយព្រះចៅអធិរាជជប៉ុនអាគីហ៊ីតូ ហើយព្រះអង្គក៏នឹងអនុញ្ញាតអោយនាយករដ្ឋមន្ត្រីជប៉ុនលោកយូគីអូ ហាតូយ៉ាម៉ាចូលជួបសវនាការផងដែរ។ លោក កុយ គួងបានអត្ថាធិប្បាយលើព្រះរាជដំណើរទស្សនកិច្ចផ្លូវរដ្ឋរបស់ព្រះមហាក្សត្រនៅលើទឹកដីប្រទេសជប៉ុនថា ជាសញ្ញាល្អនៃការពង្រឹងទំនាក់ទំនងទ្វេភាគីល្អថែមទៀតរវាងប្រទេសទាំងពីរ។
មិនអាចទាក់ទងមន្ត្រីស្ថានទូតជប៉ុនប្រចាំប្រទេសកម្ពុជាដើម្បីធ្វើអត្ថាធិប្បាយលើព្រះរាជដំណើរទស្សនកិច្ចរបស់ព្រះមហាក្សត្រកម្ពុជានៅប្រទេសជប៉ុនបានទេ។ បើយោងតាមបន្ទូលរបស់ព្រះអង្គម្ចាស់ស៊ីសុវត្ថិ ធម្មិកោដែលជាទីប្រឹក្សាអមព្រះរាជខុទ្ទកាល័យរបស់ព្រះមហាក្សត្រ ដំណើរយាងទស្សនកិច្ចនេះមានតែនាំផលប្រយោជន៍មកអោយប្រទេសកម្ពុជាតែប៉ុណ្ណោះ តាមរយៈការចាប់អារម្មណ៍របស់វិនិយោគិនជប៉ុនដែលនឹងមកដាក់ទុននៅកម្ពុជា។
ចាប់តាំងពីថ្ងៃយាងគ្រងរាជ្យនៅឆ្នាំ២០០៤ ព្រះមហាក្សត្រកម្ពុជាព្រះបាទព្រះបរមនាថនរោត្តមសីហមុនីធ្លាប់បានយាងធ្វើទស្សនកិច្ចផ្លូវរដ្ឋនៅប្រទេសវៀតណាម ប្រទេសបារាំង ប្រទេសឆេក ប្រទេសចិន។ គួរបញ្ជាក់ថា ព្រះរាជដំណើរយាងទស្សនកិច្ចនៅប្រទេសជប៉ុនរបស់ព្រះមហាក្សត្រខ្មែរត្រូវបានធ្វើឡើងភ្លាមបន្ទាប់ពីព្រះរាជពិធីចំរើនព្រះជន្មព្រះអង្គចាប់ពីថ្ងៃទី១៣ដល់ថ្ងៃទី១៥ខែឧសភានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ