ចលនាឧទ្ទាមជនជាតិភាគតិចសាន(Shan)ស្នើផែនការកម្ចាត់គ្រឿងញៀន
ចលនាឧទ្ទាមជនជាតិភាគតិចសាន(Shan) កំពុងចរចាស្វែងរកសន្តិភាពជាមួយរដ្ឋាភិបាលភូមា ដោយបានស្នើនៅថ្ងៃសៅរ៍១៩ឧសភានេះនូវផែនការមួយដើម្បី”លុបបំបាត់គ្រឿងញៀន”។ទន្ទឹមនេះដែរ រដ្ឋនៃចលនាឧទ្ទាមសាន(Shan)នេះ គឺជាអ្នកផលិតច្រើននូវអាភៀន opium និងគ្រឿងញៀនamphétaminesនៅក្នុងប្រទេស។
ចុះផ្សាយនៅថ្ងៃ៖
ស្តាប់ - ០២:២២
នៅមុនពេលបន្តិចនៃកិច្ចចរចាគ្នាសាជាថ្មី ប្រធាននៃក្រុមប្រឹក្សាស្ថាបនាឡើងវិញនៃរដ្ឋ សាន(Shan)ដែលជាសាខានយោបាយនៃចលនាឧទ្ទាម សាន(Shan) បានថ្លែងបញ្ជាក់ថា ខ្លួននឹងដាក់ជូនគម្រោងផែនការលុបបំបាត់គ្រឿងញៀននេះ ចំពោះមន្ត្រីនៃរដ្ឋាភិបាល ណៃពីដ៏ (Naypyidaw) ទទួលបន្ទុកខាងកិច្ចចរចា។
ប្រធាននៃក្រុមប្រឹក្សាស្ថាបនារដ្ឋសានឡើងវិញ លោក Ywet Sitបានបញ្ជាក់បន្ថែមទៀតថា ចលនាឧទ្ទាមShan បានត្រៀមជាស្រេចក្នុងការពិភាក្សាគ្នាស្តីពីបញ្ហាគ្រឿងញៀនជាមួយរដ្ឋាភិបាលដោយពុំបានបញ្ជាក់ពីប្រភេទគ្រឿងញៀនទាំងនោះមានចែងនៅក្នុងផែនការលុបបំបាត់គ្រឿងញៀននោះទេ។
ប្រទេសភូមា “គឺជាប្រភពដ៏ចម្បងមួយខាងផលិតគ្រាប់ថ្នាំញៀន amphétamine និងសារជាតិគ្រឿងញៀននៅក្នុងតំបន់អាស៊ីអាគ្នេយ៍ហើយមួយភាគធំផលិតនៅក្នុងរដ្ឋសាន”-នេះបើយោងតាមរបាយការណ៍មួយរបស់ការិយាល័យនៃបណ្តាប្រជាជាតិប្រឆាំងនឹងគ្រឿងញៀននិងឧក្រិដ្ឋកម្ម (UNODC)នៅឆ្នាំ ២០១១។
ម្យ៉ាងទៀត ភូមា គឺជាផលិតករទីពីរនៃអាភៀន Opiumនៅក្នុងពិភពលោកបន្ទាប់ពី ប្រទេសអាហ្វហ្កានិស្ថាន ហើយអាភៀន៩១% បានដាំដុះនៅក្នុងរដ្ឋសាន-នេះបើយោងតាមអ.ស.ប.។
លោកឧត្តមសេនីយ Soe Win អ្នកដឹកនាំលេខ២នៃកងទ័ពភូមាដែលបានដឹកនាំគណៈប្រតិភូ ក្នុងកិច្ចចរចានៅថ្ងៃសៅរ៍១៩ឧសភានេះ បានរំពឹងទុកថានឹងបានសម្រេចនូវកិច្ចព្រមព្រៀងគ្នាមួយ ប្រកបដោយគុណប្រយោជន៍សំរាប់ភាគីចរចាទាំងពីរ។
រដ្ឋាភិបាលថ្មីភូមាដែលបានកាន់អំណាចតាំងពីខែមីនា២០១១ បានធ្វើកំណែទម្រង់ជាច្រើននៅក្នុងប្រទេសនិងចាប់ផ្តើមធ្វើការចរចាជាមួយចលនាឧទ្ទាមនានាដោយបានសម្រេចនូវកិច្ចព្រមព្រៀងឈប់បាញ់គ្នាជាមួយចលនាឧទ្ទាមមួយចំនួនធំផង។
ម្យ៉ាងទៀត ចលនាឧទ្ទាមទីមួយដែលបានចុះកិច្ចព្រមព្រៀងឈប់បាញ់គ្នាមុនគេ កាលពីខែធ្នូ២០១១ គឺកងទ័ពឧទ្ទាមនៃរដ្ឋសានភាគខាងត្បូងដែលជាក្រុមប្រដាប់អាវុធដ៏ចម្បងក៏មានវត្តមាននៅក្នុងកិច្ចចរចានៅថ្ងៃសៅរ៍នេះដែរ។ជនជាតិភាគតិចសានដែលមាន៩% នៃប្រជាជនភូមាសរុបគឺជាជនជាតិភាគតិចធំទីពីរនៅក្នុងប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ