កម្ពុជា បើកយុទ្ឋនាការប្រឆំាងការខ្វះទឹក និងបង្គន់ នៅជនបទ
អនាម័យជនបទ នៅកម្ពុជាស្ថិតក្នុងកំរិតមួយទាបបំផុត ពោលប្រជាពលរដ្ឋ នៅតាមទីជនបទ ចំនួនតែ៤១% មានទឹកស្អាតប្រើប្រាស់ និងចំនួន២៣%មានបង្គន់ប្រើប្រាស់។ ដើម្បីសម្រេចទិសដៅ ក្នុងឆ្នាំ២០១៥ ខាងមុននេះ អោយប្រជាពលរដ្ឋនៅតាមជនបទ ៥០%អោយមានទឹកស្អាតប្រើប្រាស់ និង៣០% អោយមានបង្គន់ប្រើប្រាស់ រដ្ឋាភិបាលកម្ពុជា សម្រេចយក ថ្ងៃទី១៣ វិច្ឆិកា រៀងរាល់ឆ្នាំ ជាថ្ងៃទិវាជាតិ លើកកម្ពស់អនាម័យនៅជនបទ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ឹម ណាវិន ពីទីក្រុងភ្នំពេញ
ដើម្បីលើកកម្ពស់អនាម័យជនបទ ប្រទេសកម្ពុជាបានកំណត់យកថ្ងៃទី១៣ វិច្ឆិកា រៀងរាល់ឆ្នាំ ចាប់ពីឆ្នាំ២០១០នេះទៅធ្វើជា “ទិវាជាតិ”លើកកម្ពស់អនាម័យជនបទ។
ប្រជាពលរដ្ឋនៅតាមជនបទ ក្នុងប្រទេសកម្ពុជា មានចំនួនតែ៤១% មានលទ្ឋភាពប្រើប្រាស់ទឹកស្អាត និងចំនួនតែ២៣% ប៉ុណ្ណោះ ដែលមានបង្គន់ប្រើប្រាស់។ នេះបើយោងតាមការអោយដឹងរបស់មន្រ្តីក្រសួងអភិវឌ្ឍន៍ជនបទ។
ទិន្នន័យខាងលើនេះ បានបង្ហាញអោយឃើញថា អនាម័យជនបទនៅកម្ពុជា មានស្ថានភាពនៅខ្សោយមែនទែន គួរអោយព្រួយបារម្ភ។ លោក វេជ្ជបណ្ឌិត ជា សំណាង ប្រធាននាយកដ្ឋានថែទំាសុខភាព ជនបទ នៃក្រសួងអភិវឌ្ឍន៍ជនបទ មានប្រសាសន៍ថា ដើម្បីពញ្ញាក់អារម្មណ៍ប្រជាពលរដ្ឋនៅតាមជនបទឲ្យយកចិត្តទុក ថែទំាសុខភាព ចេះធ្វើអនាម័យខ្លួនប្រាណ នៅឆ្នាំដំបូងនៃទិវាជាតិលើកកម្ពស់អនាម័យជនបទ សារៈសំខាន់ៗចំនួនបី ត្រូវលើកយកមកផ្សព្វផ្សាយ តាមប្រព័ន្ឋឃោសនាក្នុងស្រុកតាមខិត្តប័ណ្ណ និងតាមចលនាមហាជន។
ខ្លឹមសារសំខាន់ៗទំាងបីចំណុច រួមមាន ៖ ការសាងសង់ និងការប្រើប្រាស់បង្គន់អនាម័យ ការលាងដៃជាមួយសាប៊ូ ក្រោយពេលបន្ទោបង់ និងមុខពេលទទួលទានអាហារ និងត្រូវបរិភោគទឹកស្អាតជាប្រចាំ។
រៀងរាល់ឆ្នាំ ក្រសួងអភិវឌ្ឍន៍ជនបទ និងដៃគូអភិវឌ្ឍន៍នានា បានចំណាយថវិកាប្រមាណ ៥លានដុល្លារ ក្នុងការជំរុញប្រជាពលរដ្ឋអោយប្រើប្រាស់ទឹកស្អាត និងបង្គន់អនាម័យ។ អត្រាប្រជាជនក្រីក្រក្នុងប្រទេសកម្ពុជា មានចំនួនប្រមាណជិត៣០%។ អ្នកក្រីក្រភាគច្រើន គឺជាប្រជាពលរដ្ឋរស់នៅតាមទីជនបទ។ ការខ្វះអនាម័យក្នុងការរស់នៅ ជាផ្នែកមួយបង្កអោយមានភាពក្រីក្រនៅកម្ពុជា។ ក៏ប៉ុន្តែ ភាពក្រីក្រនេះ ក៏ជាដើមហេតុនាំឲ្យប្រជាពលរដ្ឋកម្ពុជា មិនអាចមានលទ្ឋភាពរកទឹកស្អាត និង សាងសង់បង្គន់ប្រើប្រាស់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ