ចាប់បានពួកជនដែលប៉ុនប៉ងធ្វើឃាតរូបលោកនាយករដ្ឋមន្ត្រីពូទីន
នេះជាដំណឹងទី១ ផ្សាយនៅព្រឹកថ្ងៃចន្ទ ទី ២៧ កុម្ភៈ ២០១២ ដោយកាណាល់ទូរទស្សន៍ប៉ុស្តិ៍លេ១របស់ រដ្ឋរុស្ស៊ី។ ស្របនឹងដំណឹងដែលមានឃាតកម្មនេះ ដែលពួកភេរវជនគ្រោងនឹងធ្វើ នៅក្រោយការបញ្ចប់ការបោះឆ្នោត ប្រធានាធិបតី នៅថ្ងៃទី៤ មីនាខាងមុខ។ គឺលោកពូទីនដែលជាបេក្ខជន នឹងសង្ឃឹមអាចឈ្នះឆ្នោត ក្នុងមុខតំណែងនេះតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ជាការកត់សម្គាល់ ពួកជនដែលត្រូវបាន ក្រសួងសន្តិសុខអ៊ុយក្រែន និងរុស្ស៊ី បរិហារអាក្រាតនោះ គឺសុទ្ធតែជាប់ឈ្មោះក្នុងបញ្ជីខ្មៅ ស្វែងរកចាប់ដោយប៉ូលិសអន្តរជាតិ Interpol។
គឺកាលពីថ្ងៃទី៤កុម្ភៈ ដែល សន្តិសុខអ៊ុយក្រែន ក្នុងប្រតិបត្តិការពិសេស ចាប់បានឈ្មោះ Adam Osmaiev ជនជាតិឆេឆេនី អាយុ ៣១ឆ្នាំ កាន់លិខិតឆ្លងដែន ជាពលរដ្ឋសហព័ន្ធ រុស្ស៊ី។ ឈ្មោះនេះ និងគ្នីគ្នាវា ដោយខំបង្វែងដានអាជ្ញាធរ ឧស្សាហ៍ផ្លាស់ប្តូរកន្លែងស្នាក់នៅ និងកែប្រែមុខមាត់ក្លែងខ្លួន ជាមនុស្សផ្សេង។ មុនពេលនេះ មានផ្សាយទៅហើយ នូវដំណឹងថា គ្នាវា២នាក់ទៀតត្រូវបានចាប់ខ្លួនដែរ។
មូលហេតុដែលនាំឲ្យគម្រោងវា ខាងធ្វើឃាតរូបលោកពូទីន ស្រាប់តែបែកការណ៍ទៅ គឺមកពី ១ខែ មុនពេលចាប់ខ្លួននោះ នាថ្ងៃទី៤មករា ក្នុងលំនៅឋានដែលពួកវាជួលស្នាក់នៅ នៅក្រុងផែ Odessa ប្រទេសអ៊ុយក្រែន ពួកវាបានថ្លោះការ បណ្តាលឲ្យផ្ទុះគ្ឌាំងទៅ ពេលវាផ្សំគ្រឿងផ្ទុះ។ កាលណោះ គ្នាវាម្នាក់បានស្លាប់នៅនឹងកន្លែង។ រត់រួច គឺឈ្មោះ Adam Osmaiev។ ប៉ុន្តែ ម្នាក់ទៀត ឈ្មោះ iLya Pyansin អាយុ២៨ឆ្នាំ ជាជាតិ Kazakhstan ដោយ រលាកខ្លួនប្រាណ យ៉ាងធ្ងន់ ក៏ត្រូវដឹកទៅមន្ទីរពេទ្យ។ ជនរបួសធ្ងន់នេះ ដំណាលថា ដោយរួមជាមួយគ្នីគ្នាខ្លួន ដែលស្លាប់ទៅ ឈ្មោះ Ruslan Madaiev បានធ្វើដំណើរដល់អ៊ុយក្រែន គឺពីក្រុងឡុងដ៍ ទាំងឆ្លងកាត់ តាមប្រទេស អេមៀរ៉ាតអារ៉ាបរួម និង តួកគី។
ចំណែកឈ្មោះ Osmaiev ដែលធ្លាប់បានរស់នៅអស់ពេលយ៉ាងយូរ នៅក្រុងឡុងដ៍និងដែល កំពុងជាប់ក្នុងមន្ទីរឃុំឃាំង នៃសន្តិសុខអ៊ុយក្រែន ដោយបារម្ភ ខ្លាចក្រែងអាជ្ញាធរអ៊ុយក្រែនធ្វើបត្យាប័នរូបខ្លួន មកឲ្យភាគីរុស្ស៊ី ខំសារភាពអំពីគោលដៅពួកគេ គឺ ត្រូវបំពេញតាមបទបញ្ជា ពីមេខ្លោងជាតិឆេឆេនី ឈ្មោះ Dokou Oumarov ដែលល្បីខាងប្រព្រឹត្តអំពើភេរវកម្មទល់នឹងរុស្ស៊ី និងដែលកំពុងជ្រកកោន នៅក្រុងឡុងដ៍។ គោលដៅនេះ គឺប្រព្រឹត្តអំពើភេរវកម្ម តាមវិធីបំផ្ទុះគ្រាប់បែកមានកម្លាំងខ្លាំង កម្ទេចរថយន្ត ជិះដោយលោកពូទីន តាមមហាវិថី ឈ្មោះ Koutouzovski ទៅកាន់កន្លែងធ្វើការរបស់គាត់។ ក្នុង Notebook ដែលរឹបយកបានពី ឈ្មោះ Osmaiev មានលាតត្រដាងឲ្យឃើញយ៉ាងលម្អិតពីគម្រោងធ្វើឃាតនេះ តាមវិធីបណ្តុះបណ្តាល នៅលើទឹកដីអ៊ុយក្រែន ជាភេរវជនអត្តឃាតបំផ្ទុះខ្លួនឯង ដើម្បីផ្តាច់ជីវិតនរណាជាទីដៅរបស់ខ្លួន។
គួរនិយាយថា ការប៉ុនប៉ងធ្វើឃាតរូបលោកពូទីនធ្លាប់កើតមានពីរដងហើយ ក្នុងឆ្នាំ ២០០០ និង ឆ្នាំ២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ