ក្នុងប្រវត្តិថ្មីរបស់រុស្ស៊ី ថ្ងៃ៤វិច្ឆិកាជាខួបទី៥នៃ "ទិវាឯកភាពប្រជាជន”
ស្ថានការណ៍ពិតក្នុងមជ្ឈដ្ឋានប្រជាជនផ្ទាល់ គឺមិនសូវមានការឯកភាពគ្នាទេ ក្នុងរឿងទទួលអំណរសាទរបុណ្យនេះ។ យ៉ាងណាមិញ ការចុះថ្នល់ប្រារព្ធទិវានេះ ដើម្បីបង្ហាញទឹកចិត្តស្នេហាជាតិ ម្នាក់ៗធ្វើតាមរបៀបខ្លួន គឺ កម្លាំងស្តាំ កម្លាំងឆ្វេង កម្លាំងជាតិនិយម។ មិនតែប៉ុណ្ណោះ បណ្តាជនរុស្ស៊ីភាគច្រើន នៅមិនទាន់មានទម្លាប់ថា ថ្ងៃនេះ ជាថ្ងៃឈប់ធ្វើការ រួចអ្នកខ្លះ ថែមទាំងមិនទាន់យល់ទេ អំពីអត្ថន័យបុណ្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្ទីរាយការណ៍របស់កែវ ឆាយាពីទីក្រុងម៉ូស្គូ
នៅប្រទេសរុស្ស៊ីសម័យថ្មី "ទិវាឯកភាពប្រជាជន “ក្នុងឋានៈជាថ្ងៃឈប់ បានត្រូវ ប្រារព្ធជាលើកដំបូង គឺនាថ្ងៃ ៤វិច្ឆិកា ឆ្នាំ២០០៥។ ប្រារព្ធនេះ គឺយោង ”តាមក្រិត្យការងារ“ ចុះ ហត្ថលេខា ថ្ងៃ៣០ធ្នូឆ្នាំ២០០៤ ដោយលោក Vladimir Poutine កាលណោះជាប្រធានាធិបតីរុស្ស៊ី។ ចុះនេះ គឺ បន្ទាប់ពីឯកសារនេះបានត្រូវបន្ថែមទៅដោយវិសោធនកម្ម ដែលអនុម័ត ក្នុងខែធ្នូនោះឯង ដោយ សភាទាំងពីរជាន់។
គោលដៅនៃវិសោធនកម្ម ដាក់ចេញដោយបក្សកាន់អំណាច ឈ្មោះ “Yedinaya Rossia“ គឺដើម្បី យកថ្ងៃ ៤វិច្ឆិកា ជាថ្ងៃឈប់ជំនួសថ្ងៃឈប់៧វិច្ឆិកា ដែលបានចាក់ឫសជាប់ជ្រៅ ក្នុងខួរក្បាលអ្នកស្រុក ក្នុងឋានៈជាបុណ្យរំលឹកដល់ទិវា បដិវត្តន៍សង្គមនិយមឆ្នាំ១៩១៧ ផ្តួលរបបស្តេច Tsar។ ចំណែកទិវា ៤វិច្ឆិកា គឺឧទ្ទិសដល់សាមគ្គីភាពជាធ្លុងមួយនៃប្រជាជនរុស្ស៊ី ដែលនាថ្ងៃ៤វិច្ឆិកា ឆ្នាំ១៦១២ ក្រោមការដឹកនាំដ៏ប៉ិនប្រសប់របស់មេទ័ពរុស្ស៊ី ឈ្មោះ Kouzma MININE និង Dmitri POJARSKI ចេះរំដោះរដ្ឋធានីម៉ូស្គូ បានផុតពីក្រញាំកាន់កាប់នៃពួក ឈ្លានពានប៉ូឡូញ។
ក្នុងថ្ងៃបុណ្យនេះ នៅម៉ូស្គូ កម្លាំងស្តាំ កម្លាំងឆ្វេង កម្លាំងជាតិនិយម រួមប្រជុំសរុបទៅជា អង្គមីទិញ ៦កន្លែង ធ្វើបាតុកម្ម ២កន្លែង ដើរជាក្បួនដង្ហែមួយក្បួន។ ធំជាងគេ គឺក្បួនដង្ហែនេះ ដែលមានឈ្មោះថា “ក្បួនដង្ហែនៃពូជសាសន៍រុស្ស៊ី“ ចាត់ចែងឡើង ដោយសកម្មជនរហូត ដល់ ៣០.០០០នាក់នៃចលនាក្រោមបាវចនាថា “ គ្នីគ្នាពួកយើង” ដែលគាំទ្រពេញទីនយោបាយរបស់វិមានក្រេមឡាំង។ ពាក្យស្លោករបស់គេថ្ងៃនេះ គឺសំដែងការគាំទ្រចំពោះរូបលោក Serguei Sobianine អភិបាលថ្មីនៃក្រុងម៉ូស្គូ ជាមនុស្សរបស់លោកប្រធានាធិបតីMedvedev ផង របស់លោកនាយករដ្ឋមន្ត្រី Poutineផង។
មីទិញជាតិនិយម មានគ្នាប្រមាណ១ ០០០នាក់ ចាត់ចែងឡើង ដោយ គណបក្ស LDPR ប្រព្រឹត្តទៅ នៅចំកណ្តាលក្រុង ក្រោមពាក្យស្លោក ”ដើម្បីភាពរួមគ្នានៃបណ្តាប្រជាជនប្រទេសរុស្ស៊ី និងប្រឆាំងអំពើពុករលួយ“។ ចំណែកពួកកុម្មុយនិស្ត សំរេចថា ធ្វើបាតុកុម្ម គឺនៅថ្ងៃអាទិត្យ ៧វិច្ឆិកា ដែលជាទិវានៃបដិវត្តន៍ សង្គមនិយម។
តាមប្រពៃណីដែលមាន ក្នុងថ្ងៃបុណ្យ ៤វិច្ឆិកានេះ នៅវិមានក្រេមឡាំង លោកប្រធានាធិបតី Medvedev បំពាក់គ្រឿងលំដាប់សក្តិប្លែកៗ ជូនឥស្សរជនបរទេស ចំពោះឧបការគុណរបស់គេ ក្នុងការពង្រឹងមិត្តភាព ជាមួយប្រជាជនរុស្ស៊ី។
ស្របនឹងលទ្ធផលនៃការស្ទង់មតិ បណ្តាជនរុស្ស៊ីដល់ទៅ៦៦% មិនចាត់ទុក ទិវា៤វិច្ឆិកានេះ ថាជា “បុណ្យមែនពិត“ របស់ប្រជាជន ឡើយ។ ទោះយ៉ាងណាក្តី ក៏មាន ១៦%ដែរ ដែលយល់ថា ថ្ងៃនេះ ជា “ទិវាឯកភាពប្រជាជន“ នៅរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ