ជំនួបកំពូលរុស្ស៊ី-សហភាពអឺរ៉ុបនៅក្រុងរុស្ស៊ី Saint-Petersbourg
ក្នុងជំនួបកំពូលនេះ គណៈប្រតិភូរុស្ស៊ី ដែលជាប្រទេសម្ចាស់ផ្ទះទទួលជំនួប ដឹកនាំ ដោយលោកប្រធានាធិបតី Vladimir Poutine។ ចំណែក គណៈប្រតិភូសហភាពអឺរ៉ុប ដែលតំណាងឲ្យ ២៧ប្រទេសសមាជិក ដឹកនាំដោយ លោក Herman Van Rompuy ជា ប្រធាន” ក្រុមប្រឹក្សាអឺរ៉ុប” និងលោក Jose-Manuel Barroso ជាប្រធាន” គណៈកម្មការអឺរ៉ុប”។
ចុះផ្សាយនៅថ្ងៃ៖
ស្តាប់ - ០២:៤០
ដោយហេតុថា ស្ថានការណ៍វិបត្តិ នៅប្រទេសស៊ីរីធ្ងន់ធ្ងរដល់កម្រិត តម្រូវឲ្យដោះស្រាយ ជា បន្ទាន់ បានជាតាំងពីមុនចេញដំណើរមកចូលរួម ក្នុងជំនួបនេះម៉្លេះ លោកស្រី Catherine Ashton ជាប្រមុខការទូតរបស់សហភាពអឺរ៉ុប បានថ្លែងថា ៖ សហភាពអឺរ៉ុប ត្រៀមធ្វើការ នៅកៀកជាប់ ជាមួយរុស្ស៊ី ដើម្បីស្វែងរកផ្លូវ បញ្ឈប់អំពើហិង្សា និងគាំទ្រដល់ផែនការមាន៦ចំណុច របស់ ប្រេសិតវិសាមញ្ញនៃអ.ស.ប. លោក Kofi Annan ដ្បិត ចាំបាច់ត្រូវបញ្ចៀសឲ្យផុតពីមហន្តរាយ។
លោកស្រីបន្ថែមថា សហភាពអឺរ៉ុប តែងទាក់ទងជាប់ជានិច្ច ជាមួយដៃគូ អន្តរជាតិដ៏សំខាន់ៗ របស់ខ្លួន ក្នុងគោលដៅ សម្របសម្រួលការខំប្រឹងប្រែងរួមគ្នា ឆ្ពោះទៅដោះស្រាយវិបត្តិ នៅស៊ីរី ដោយកត់សម្គាល់ព្រមជាមួយនេះ អំពី ”តួនាទីគន្លឹះរបស់ប្រទេសរុស្ស៊ី”។
បស្ចិមលោកតែងចាត់ទុករុស្ស៊ី ជាប្រទេសមាន ”ទឹកមាត់ប្រៃ” លើរបបគ្រប់គ្រង នៅស៊ីរី ក្នុង ការដាស់តឿនរបបនេះឲ្យគោរពតាមបទឈប់បាញ់ របស់ប្រេសិតអ.ស.ប.។ រីឯ ម៉ូស្គូផ្ទាល់ គឺថ្កោលទោស ទាំងទីក្រុងដាម៉ាស ទាំងពួកឧទ្ទាមបះបោរ ក្នុងការរំលោភបំពានលើបទ ឈប់បាញ់នោះ ខុសពីបស្ចិមលោកដែលទំលាក់ កំហុសតែទៅលើ រដ្ឋាភិបាលលោកអាសាដ ប៉ុន្តែ ធ្វើថ្លង់ធ្វើខ្វាក់ ចំពោះឧក្រិដ្ឋកម្ម ប្រព្រឹត្តដោយ ពួកប្រឆាំង នៅស៊ីរី។ ទូរទស្សន៍រុស្ស៊ី បញ្ចាំងឲ្យឃើញនូវសក្ខីកម្ម របស់អ្នកស្រុកក្រុង Houla ដែលតំណាលថា ពួកឧទ្ទាម បានចាក់នឹងកាំបិត ហើយបាញ់សម្លាប់ចោលអ្នកស្រុកណាដែល មិនព្រមឆ្លងទៅ នៅខាងពួកគេ និងចេះតែបន្តគាំទ្រ លោកអាសាដជាប្រមុខរដ្ឋខ្លួនដដែល។
នៅលើផ្លូវនេះ ក្រសួងការបរទេសរុស្ស៊ី ថ្ងៃ៣ មិថុនាម្សិលមិញ បានចេញសេចក្តីថ្លែងការណ៍ រិះគន់ “ក្រុមប្រឹក្សា អ.ស.ប.ខាងសិទ្ធិមនុស្ស” នៅក្រុង Geneve ថា រំលោភលើសមត្ថកិច្ចខ្លួន ដោយមិនទាន់ទាំងមានសេចក្តីសន្និដ្ឋាន របស់ពួកអ្នកសង្កេតការណ៍អ.ស.ប.ផង ហ៊ានចេញសេចក្តីសម្រេចជាអត្តនោម័តិ ទំលាក់ទោសទាំងស្រុងទៅហើយ ទៅលើទីក្រុងដាម៉ាស ចំពោះសោកនាដកម្ម នៅក្រុង Houla។
ចំណុចខុសគ្នាខ្លាំងមួយទៀត គឺថា បស្ចិមលោកដាក់ទិសធ្វើយ៉ាងណា ទម្លាក់លោក ប្រធានាធិបតីអាសាដពីតំណែង បើទម្លាក់មិនបានតាមផ្លូវនយោបាយ គឺត្រូវផ្តួលតាម ផ្លូវធ្វើ អន្តរាគមន៍យោធា ដូចនៅលីប៊ីអ៊ីចឹង។ រុស្ស៊ីវិញ យល់ថា ការប្តូរអំណាចក្នុង ប្រទេសនេះ ឬនោះ គឺជាជម្រើសរបស់ប្រជាជនប្រទេសនោះផ្ទាល់។ ភារកិច្ចរបស់កម្លាំង នៅក្រៅ គឺជួយជ្រោមជ្រែងឲ្យភាគីបដិបក្ខចរចាគ្នា ក្នុងនាមនៃជម្រើសនោះ។
តើជំនួបកំពូល រុស្ស៊ី-សហភាពអឺរ៉ុបថ្ងៃនេះ នឹងសម្រេចបានលទ្ធផលយ៉ាងណាៗ នោះ ថ្នាក់ដឹកនាំគូភាគីនឹងប្រកាសឲ្យដឹង នៅក្នុងសន្និសីទសារព័ត៌មានតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ