រុស្ស៊ីនៅតែបន្តលក់អាវុធទៅស៊ីរី ទោះបីមានគំនាបអន្តរជាតិក្តី
សេចក្តីនេះប្រកាសដោយលោកប្រធានក្រុមហ៊ុនរដ្ឋរុស្សី ខាងលក់អាវុធទៅក្រៅប្រទេស ហៅកាត់ជាសំនៀងរុស្ស៊ី ថា RosOboronExport ទាំងសង្កត់ធ្ងន់ថា ទីក្រុងម៉ូស្គូបន្តលក់នេះ ដ្បិតគ្មានទណ្ឌកម្មអ្វីណា ដែលហាមមិនឲ្យលក់អាវុធនេះទេ ហើយ ក៏ដូចជាគ្មាន បទបង្គាប់បញ្ជាអ្វីណា ពីខាងរដ្ឋាភិបាលរុស្ស៊ីផ្ទាល់ឡើយ។ រីឯគំនាបអន្តរជាតិនោះ គឺមកពីក្នុងប្រទេសស៊ីរី អាជ្ញាធរបានបាញ់សម្លាប់ពួកបាតុករប្រឆាំង តាមតួលេខអង្គការការពារសិទ្ធិមនុស្ស គិតតាំងពីកណ្តាលខែមីនាមក គឺអស់២.០០០នាក់ទៅហើយ។
ចុះផ្សាយនៅថ្ងៃ៖
ស្តាប់ - ០២:១១
ថ្លែងក្នុងសន្និសីទកាសែត ក្នុងក្របខ័ណ្ឌ “ពិព័រណ៍អាកាសយានអន្តរជាតិ” MAKS-2011 ដែលកំពុងប្រព្រឹត្តទៅ នៅក្រុង Joukovski ចម្ងាយ ៣៣គ.ម. អគ្នេយ៍ពីរដ្ឋធានីម៉ូស្គូ លោក Anatoli Issaikine ប្រធានក្រុមហ៊ុន RosOboronExport ថែមទាំងលម្អិតទៅផងថា ភាគីរុស្ស៊ីបាននិងកំពុងបន្តបញ្ជូនទៅកាន់ប្រទេសស៊ីរី ស្របនឹងកុងត្រាដែលមានចុះរួចហើយ គឺសម្ភារៈយោធា និងយន្តហោះធុន Yak-130 សម្រាប់ការហោះហ្វឹកហាត់នៃពួក Pilotes យោធា។ យន្តហោះនេះត្រូវបក្សសម្ព័ន្ធ OTAN ដាក់ឈ្មោះថា Mitten។
ស៊ីរីជាប្រទេសសម្ព័ន្ធមិត្តដ៏ជំនិតបំផុតរបស់រុស្ស៊ី ប្រចាំនៅតំបន់ដើមបូព៌ា ហើយជាប្រទេស ទិញអាវុធរុស្ស៊ីច្រើនជាងគេក្នុងតំបន់នេះ តាំងពីជំនាន់សហភាពសូវៀតមក ដ្បិតដល់ទៅ៨០-៨៥% នៃអាវុធបំពាក់នៅនឹងកងទ័ពស៊ិរី គឺមានដើមកំណើតចេញពីរុស្ស៊ីទៅ។ តាមតួលេខដែលមាន ស៊ិរីទិញអាវុធពីរុស្ស៊ី ក្នុង១ឆ្នាំៗ ក្នុងទឹកប្រាក់ពី ៣ទៅ៤ពាន់លានដុល្លារអាមេរិក។
មកពីមូលហេតុនេះ ទោះបីមានការអំពារនាវ កាលពីសប្តាហ៍មុន របស់លោកស្រី Hillary Clinton រដ្ឋមន្ត្រីការបរទេសអាមេរិកាំង ថាឲ្យរុស្ស៊ីឈប់លក់អាវុធទៅស៊ីរី ដូចដែលសហភាពអឺរ៉ុបឈប់លក់អ៊ីចឹង ក៏ទីក្រុងម៉ូស្គូមិនអាចខ្លបត្រចៀកតាមឡើយ ពីព្រោះរុស្ស៊ី ដោយបំពេញតាមទណ្ឌកម្មរបស់អ.ស.ប. ឥឡូវបាត់អស់ម៉ូយ២ របស់ខ្លួនទៅហើយ គឺអៀរ៉ង់ និងលីប៊ី។ គ្រាន់តែលីប៊ីមួយប៉ុណ្ណោះនាំឲ្យរុស្ស៊ីខាតបង់អស់ ៤ពាន់លានដុល្លារអាមេរិកឯណោះ។
ទោះយ៉ាងណាក្តី ក៏រុស្ស៊ី ក្នុងឋានៈជាសមាជិកអចិន្ត្រៃយ៍នៃក្រុមប្រឹក្សាសន្តិសុខអ.ស.ប. បំពាក់ដោយសិទ្ធិ Veto បានសុខចិត្តត្រឹមតែឲ្យភ្លើងខៀវឲ្យក្រុមប្រឹក្សានេះ ចេញ“សេចក្តីថ្លែងការណ៍” ថ្កោលទោសដល់ការបង្ក្រាបនៅស៊ីរីប៉ុណ្ណោះ ប៉ុន្តែ មិនមែនជា“សេចក្តីសម្រេចដែលដាក់ទណ្ឌកម្ម” ទៅលើស៊ីរីឡើយ។ រុស្ស៊ីក៏បានអំពាវនាវឲ្យរបបគ្រប់គ្រងនៅស៊ីរីឈប់បាញ់សម្លាប់ពួកបាតុករប្រឆាំងទៀតឡើយ។
និយាយពីការលក់អាវុធវិញ លោកប្រធាន “ក្រុមហ៊ុនរដ្ឋរុស្សីខាងលក់អាវុធទៅក្រៅ” ហៅថា RosOboronExport ដោយបញ្ចប់សេចក្តី ក្នុងសន្និសីទកាសែតនោះ បានលើកឡើងថា ក្នុងមួយឆមាសទី១ឆ្នាំនេះ រុស្ស៊ីបាននាំចេញនូវអាវុធក្នុងទឹកប្រាក់ ៥.៩០០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ