ទីក្រុងម៉ូស្គូ ក៏ជ្រើសយកចិន ជាដៃគូដែរ សម្រាប់ធ្វើទំនើបកម្ម
នេះជាខ្លឹមសារនៃទស្សនកិច្ចលោកនាយករដ្ឋមន្ត្រីរុស្ស៊ី ពូទីន ដែលចាប់ផ្តើម ថ្ងៃចន្ទទី១០តុលានេះ នៅទីក្រុងប៉េកាំង។ ក្នុងក្របខ័ណ្ឌទស្សនកិច្ចផ្លូវការនេះ នឹងមានចុះ ៖ “អនុស្សរណៈស្តីអំពីសហប្រតិបត្តិការរវាងប្រទេសទាំងពីរ លើវិស័យធ្វើទំនើបកម្ម”។ ឯកសារនេះ គឺស្រដៀងនឹងកម្មវិធីដែលមានឈ្មោះថា “ភាពជាដៃគូសម្រាប់ធ្វើទំនើបកម្ម” ដែលរុស្ស៊ីបានចុះទៅហើយ ជាមួយសហភាពអឺរ៉ុប។
ចុះផ្សាយនៅថ្ងៃ៖
ស្តាប់ - ០២:០៩
តាមដែលប្រភពក្នុងក្រសួងការបរទេសរុស្ស៊ីថ្លែងទៅកាសែត Kommersant ថ្ងៃនេះ ៖ រហូតមកទល់ពេលចុងក្រោយ រុស្ស៊ីតែងបានចាត់ទុក តែបណ្ដាប្រទេសសហភាពអឺរ៉ុប ស.រ.អា. និងរដ្ឋលូតលាស់ខ្ពស់ឯទៀតនៃបស្ចិមលោក ជាភាគីដែលអាចផ្តល់បច្ចេកវិជ្ជាឈានមុខហៅថា High Tech សម្រាប់ធ្វើទំនើបកម្មសេដ្ឋកិច្ចរុស្ស៊ី ទោះបីតាំងពីយូរមកហើយ ទីក្រុងប៉េកាំងបានស្នើមកម៉ូស្គូ នូវគម្រោងបែបនេះក្តី ពីព្រោះវិមានក្រេមឡាំង តែងយល់ឃើញថា ចិនច្បាស់ជាមិនអាចជួយរុស្ស៊ី ខាងធ្វើទំនើបកម្មតាមផ្លូវបច្ចេកវិជ្ជាឈានមុខនោះឡើយ ដោយចិនប្រើកម្លាំងពលកម្មថោកទេតើ។
ប៉ុន្តែ ជាលទ្ធផលទស្សនកិច្ចលោកប្រធានាធិបតីរុស្ស៊ី មេដវេដេវ នៅប្រទេសចិន កាលពី ខែកញ្ញាឆ្នាំមុន គូភាគីក៏បានព្រមព្រៀងគ្នាត្រួសៗជាមុន ថាក្នុងពេលឆាប់ៗខាងមុខ នឹងដាក់ឲ្យដំណើរការ គឺកម្មវិធីនៃសហប្រតិបត្តិការលើវិស័យធ្វើទំនើបកម្ម។ រហូតមកទល់ឥឡូវ រុស្ស៊ីបានចុះកម្មវិធីបែបនេះ នៅទ្វីបអាស៊ី តែជាមួយប្រទេសមួយគត់ គឺកូរ៉េខាងត្បូង។
ម៉ូស្គូសង្ឃឹមថា អភិក្រមនៃទំនើបកម្មរុស្ស៊ី-ចិន នឹងមាន “លក្ខណៈឧភតោភាគី” ក្នុងន័យថា ៖
- រុស្ស៊ី នឹងជួយជ្រោមជ្រែងប្រទេសចិន ក្នុងការអភិវឌ្ឍន៍ថាមពលបរមាណូ វិស័យអវកាស និងសំណង់យន្តហោះ។
- ចំណែកប៉េកាំង នឹងជួយម៉ូស្គូ ឲ្យតាមទាន់បណ្ដាប្រទេសលូតលាស់ ខាងអភិវឌ្ឍន៍វិស័យ ដឹកជញ្ជូនតាមផ្លូវដែក ដោយប្រើរថភ្លើងល្បឿនលឿន ខាងសាងសង់នាវាសមុទ្រ ខាងផលិតម៉ាស៊ីនឧបករណ៍សម្រាប់ស្ដារឡើងវិញថាមពលដែលប្រើរួចហើយ។
តាមកាសែត Kommersant កត់សម្គាល់ ៖ ភាគីចិន នឹងខិតខំទាញយកឲ្យបានជាអតិបរមា នូវគុណប្រយោជន៍ ពីការធ្វើសហប្រតិបត្តិការជាមួយរុស្ស៊ី ក្នុងឋានៈជាប្រទេសជិតខាងសម្បូណ៌ទៅដោយធនធានធម្មជាតិ ដែលទាក់ចិត្តក្រៃ សម្រាប់យុទ្ធសាស្ត្រសេដ្ឋកិច្ច និង ភូម៌សាស្ត្រនយោបាយ របស់ទីក្រុងប៉េកាំង។
ទីភ្នាក់ងារពត៌មាន Reuters សម្តែងនូវចំណាប់អារម្មណ៍ថា នេះជាទស្សនកិច្ចលើកទី១របស់លោកនាយករដ្ឋមន្ត្រី ពូទីន នៅបរទេស ក្រោយពីថ្ងៃ២៤កញ្ញាកន្លងទៅ មានធ្លាយចេញមកនូវដំណឹងជាផ្លូវការថា ក្នុងឆ្នាំក្រោយ បុរសខ្លាំងនេះនឹងវិលត្រឡប់ទៅកាន់តំណែងកំពូល ជាប្រធានាធិបតីនៅរុស្ស៊ីវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ