គណបក្សសង្គ្រោះជាតិនិងអង្គការសង្គមស៊ីវិល ជួបប្រជុំពីកំណែទម្រង់សម្រាប់អាណត្តិទី៥
គណបក្សសង្គ្រោះជាតិបានជួបប្រជុំជាមួយនឹងអង្គការសង្គមស៊ីវិលជាង១០ ដើម្បីសុំយោបល់ពីបច្ចុប្បន្នភាពនយោបាយនៅកម្ពុជា និងកំណែទម្រង់សំខាន់ៗសម្រាប់នីតិកាលថ្មីអាណត្តិទី៥នេះ។
ចុះផ្សាយនៅថ្ងៃ៖
ស្តាប់ - ០១:៥២
លោក យ៉េង វីរៈ ប្រធានអង្គការអប់រំច្បាប់ដើម្បីសហគមន៍ ដែលជាអ្នកតំណាងអង្គការសង្គមស៊ីវិលក្នុងកិច្ចប្រជុំ បានប្រាប់វិទ្យុបារាំងអន្តរជាតិRFIនៅល្ងាចថ្ងៃពុធ ទី១៨នេះថា អង្គការសង្គមស៊ីវិលបានស្នើចំនួន៣ចំនុចសម្រាប់គណបក្សសង្គ្រោះជាតិដើម្បីពិចារណា។
ទី១ ការស្វែងរកការពិតនៃភាពមិនប្រក្រតីនៃការបោះឆ្នោត។ ការបោះឆ្នោតដែលសង្គមស៊ីវិលបញ្ជាក់ថា មានភាពមិនប្រក្រតី។ ទី២ កំណែទម្រង់ស្ថាប័នរដ្ឋ ក្នុងនោះរួមមាន កំណែទម្រង់ស្ថាប័នតុលាការ កំណែទម្រង់ស្ថាប័នអំពើពុករលួយ កំណែទម្រង់ប្រព័ន្ធបោះឆ្នោត និងឯករាជ្យភាពនៃប្រព័ន្ធផ្សព្វផ្សាយជាដើម។ ទី៣ គឺការព្រមព្រៀងឱ្យមានតុល្យភាពនៃអំណាចរវាងបក្សកាន់អំណាច និងបក្សប្រឆាំង ក្នុងសភាជាតិ។
ប្រធានអង្គការរូបនេះបានបន្ថែមថា ក្នុងកិច្ចប្រជុំផ្តល់យោបល់ នៅថ្ងៃទី១៨កញ្ញាជាមួយប្រធានគណបក្សសង្គ្រោះជាតិទាំងពីររូបនេះ គឺដើម្បីផ្តល់យោបល់ដល់គណបក្សជាប់ឆ្នោតក្នុងសភាដើម្បីឱ្យគិតគូរពីបញ្ហាជាតិដែលចាំបាច់ត្រូវធ្វើកំណែទម្រង់ ក្នុងឋានៈជាអ្នកតាមដានបញ្ហាសង្គម។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានប្រាប់វិទ្យុបារាំងអន្តរជាតិឱ្យដឹងដែរថាជំនួបជាមួយអង្គការនេះ គឺជាការរិះរកមធ្យោបាយដោះស្រាយបញ្ហាជាតិធំៗ ព្រោះទាំងគណបក្សនយោបាយ និងអង្គការសង្គមស៊ីវិល គឺជាផ្នែកមួយនៃប្រទេសជាតិ។ តែយ៉ាងណាក៏ដោយ លោក យឹម សុវណ្ណ មិនបានបញ្ជាក់ឡើយពីបញ្ហាជាតិដែលបានលើកឡើងក្នុងកិច្ចប្រជុំ។
គួររំលឹកថា ការជួបប្រជុំគ្នារវាងគណបក្សសង្គ្រោះជាតិ និងអង្គការសង្គមស៊ីវិលនៅថ្ងៃនេះ គឺធ្វើឡើងបន្ទាប់ពីជំនួបកំពូលផ្ទួនៗគ្នារយៈពេលពីរថ្ងៃ រវាងថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិដែលបានធ្វើឡើង កាលពីដើមសប្តាហ៍នេះ ដើម្បីដោះស្រាយភាពតានតឹងនយោបាយនៅកម្ពុជាក្រោយការបោះឆ្នោតដែលមិនទាន់ដាច់ស្រេចនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ