មូលហេតុមិនច្បាស់លាស់នៃសោកនាដកម្មនៅកោះពេជ្រ
បន្ទាប់ពីសោកនាដកម្មដ៏សោកសៅបំផុតដែលបានកើតឡើងនៅយប់ថ្ងៃទី២២ វិច្ឆិកា សមត្ថកិច្ចនៅតែមិនទាន់រកឃើញថា តើព្រឹត្តិការណ៍ចលាចលដែលបណ្តាលឲ្យមនុស្សស្លាប់ដល់ទៅជិត៤០០នាក់ នេះ បណ្តាលមកពីអ្វីឲ្យពិតប្រាកដនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ ប៉ែន បូណា ពីទីក្រុងភ្នំពេញ
ក្រោយការធ្វើកោសលវិច័យលើសាកសពជាច្រើនមក ក្រុមគ្រូពេទ្យជំនាញអះអាងថាមិនបានរកឃើញសញ្ញាអ្វី ក្រៅតែពីស្នាមរបួសនៅលើខ្លួនសាកសពដែលបណ្តាលមកពីការប៉ះទង្គិច និងជាន់គ្នាក្នុងហេតុការណ៍ចលាចលនោះឡើយ។ សមត្ថកិច្ចក៏បានអះអាងនៅថ្ងៃនេះដែរថា គ្មានសញ្ញានៃអំពើភេរវកម្មណាមួយត្រូវបានគេរកឃើញឡើយ។
នៅក្រោយហេតុការណ៍ភ្លាមមានព័ត៌មានមួយចំនួនបានកើតឡើង ៖ អ្នកខ្លះថាមានឆក់ខ្សែភ្លើង ខ្លះថាមានមនុស្សមួយក្រុមបង្កឲ្យមានចលាចល ខ្លះទៀតថាភាពចលាចលកើតឡើងដោយសារតែមានមនុស្សស្រែកថាស្ពានបាក់ហើយ។ល។និង។ល។
ប៉ុន្តែ មានសំណួរសំខាន់មួយដែលកំពុងចោទឡើងនៅក្នុងបញ្ហានេះ នោះគឺហេតុអ្វីបានជាព្រឹត្តិការណ៍ កកស្ទះ និងចលាចលនៅលើស្ពានតូចមួយនេះមានមនុស្សស្លាប់ច្រើនលើសលប់ដែលមិនគួរឲ្យជឿយ៉ាងដូច្នេះ?
ជាការពិត មានមនុស្សរាប់លាននាក់ គឺចាប់ពីជាងមួយលាននាក់ទៅជាងពីរលាននាក់ដែលបានមកចូលរួមក្នុងពិធីបុណ្យអុំទូកជារៀងរាល់ឆ្នាំ។ ចំនួនមនុស្សតែងតែកើនឡើងខ្លាំងនៅថ្ងៃចុងក្រោយក្នុងអំឡុង៣ថ្ងៃនៃពិធីបុណ្យ។ ប៉ុន្តែ អ្វីដែលគួរឲ្យកត់សម្គាល់នោះគឺ រឿងហេតុចលាចលដែលបានកើតឡើងនៅយប់ម្សិលមិញនោះមិនមែនជាការចលាចលទូទៅក្នុងពិធីបុណ្យទាំងមូលនោះទេ តែវាគ្រាន់តែជាការកកស្ទះនៅលើស្ពានតូចមួយដែលឆ្លងទៅមកលើកោះពេជ្រតែប៉ុណ្ណោះ។ រីឯមនុស្សម្នានៅកន្លែងផ្សេងទៀតដែលដើរកម្សាន្តនៅមុខព្រះបរមរាជវាំង និងនៅតាមសួនច្បារវិមានឯករាជ្យ និងសួនច្បារផ្សេងៗទៀតមិនបានចលាចលអ្វីទេ។
ដូច្នេះបើពិនិត្យមើលទំហំរបស់ស្ពាននេះ គ្មានអ្នកណាអាចជឿទេថា ភាពចលាចលនៅលើស្ពាននោះ អាចបង្កឲ្យមានមនុស្សស្លាប់ច្រើនយ៉ាងនេះទេ។ ដូច្នេះហើយបានជាអ្នកវិភាគជាច្រើននៅមិនទាន់អស់ចិត្តសោះថា ជនរងគ្រោះទាំងអស់នោះស្លាប់ដោយសារតែការចង្អៀតគ្នា ឬក៏ផ្អើលជាន់គ្នាតែមួយមុខ។ ប៉ុន្តែ រហូតមកដល់ពេលនេះសមត្ថកិច្ចនៅតែអះអាងថា គេមិនបានរកឃើញជាតិពុល ឬការឆក់ខ្សែភ្លើង ឬក៏មូលហេតុណាមួយទៀតកើតឡើងទេ។ ហើយក៏មិនមែនជាហេតុផលភេរវកម្មដែរ។
យ៉ាងណាក៏ដោយ លោកនាយករដ្ឋមន្ត្រី ហ៊ុន សែន នៅយប់មិញ ក៏បានសម្តែងការមិនអស់ចិត្ត ហើយបានចេញបញ្ជាឲ្យក្រុមស៊ើបអង្កេតបើកការស៊ើបអង្កេតដ៏ធំមួយទៅលើបញ្ហានេះ។ ឥឡូវនេះអាជ្ញាធរកំពុងតែអំពាវនាវឲ្យមានការចូលរួមពីអ្នកដែលបានស្ថិតនៅក្នុងហេតុការណ៍នោះឲ្យផ្តល់កិច្ចសហការជាមួយសមត្ថកិច្ចដើម្បីផ្តល់ព័ត៌មានទៅឲ្យក្រុមអ្នកស៊ើបអង្កេត។
គេកំពុងតែរង់ចាំមើលលទ្ធផលចុងក្រោយថា តើវាជាឧប្បត្តិហេតុសុទ្ធសាធ ឬក៏ជាអំពើភេរវកម្មបែបស្ងៀមស្ងាត់ដោយមិនចាំបាច់ប្រើគ្រាប់បែកណាមួយ?
បទសម្ភាសន៍ជាមួយ លោក សុខ អាន
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ