លទ្ធផលនៃកិច្ចចរចារវាងលោក គីម យ៉ុង អ៊ីលនិងលោក មេដវេដេវ
លទ្ធផលនោះ គឺមានពីរ ៖ ទី១ ភាគីកូរ៉េខាងជើង យកចិត្តទុកដាក់មកលើការធ្វើ សហប្រតិបត្តិការវិស័យថាមពល ជាមួយរុស្ស៊ី ដោយយល់ព្រមឲ្យរុស្ស៊ីសាងសង់ បំពង់បង្ហូរឧស្ម័នរុស្ស៊ី ឆ្លងកាត់ដែនដីកូរ៉េខាងជើង ទៅកាន់កូរ៉េខាងត្បូង ជាបងប្អូនគូសត្រូវខ្លួន។ ទី២ សំខាន់បំផុត គឺទីក្រុងព្យុង យ៉ាង ត្រៀមខ្លួនវិលត្រឡប់ដោយគ្មានល័ក្ខខ័ណ្ឌអ្វីណាជាមុនទេ ទៅកាន់ តុចរចា៦ភាគីវិញ ស្តីអំពីកម្មវិធីនុយក្លេអ៊ែរកូរ៉េខាងជើង ព្រមទាំងត្រៀមយល់ព្រម ព្យួរទុកសិន ទាំងការផលិត ទាំងការសាកល្បងធាតុនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០២:៣០
គួរកត់សម្គាល់ថា កិច្ចចរចា រវាង អគ្គមគ្គុទ្ទេសក៍កូរ៉េខាងជើង លោក គីម យ៉ុង អ៊ីល និងប្រធានាធិបតីរុស្ស៊ី លោក មេដវេដេវ ដែលគេខំនាំគ្នា ទន្ទឹងចាំតាំងពីម្សិលម៉្ងៃម៉្លេះ នៅទីបំផុត ក៏បានប្រព្រឹត្តទៅមែន ពេលរសៀលម្សិលមិញ។ ហើយ ប្រព្រឹត្តទៅនេះ គឺក្នុងលក្ខណៈបិទទ្វារ នៅឯបុរីយោធា ត្រង់កន្លែងមានឈ្មោះថា “ព្រៃសាប៉ាំង” ដែលកាលមុន គឺជា”ទីស្តីការបូព៌ា” របស់អគ្គមេបញ្ជាការជានខ្ពស់បំផុតនៃ កងកម្លាំងប្រដាប់អាវុធសូវៀត។ វាស្ថិតនៅ ជាយក្រុង Oulan-Oude ទីរួមខេត្ត Bouriatie ចម្ងាយប្រមាណ ៥.៥០០គ.ម. ខាងកើតពីរដ្ឋធានីម៉ូស្គូ។
ដោយហេតុថា លោក គីម យ៉ុង អ៊ីល មិននិយមបង្ហាញខ្លួន ជាសាធារណៈ បានជា ក្រោយពី កិច្ចចរចានោះ បានប្រព្រឹត្តទៅអស់រយៈពេល២ម៉ោងមក គឺលោកមេដេវេដេវ តែម្តង ដែលបាន ថ្លែង ទៅពួកអ្នកកាសែតថា ភាគីរុស្ស៊ី និងកូរ៉េខាងជើង បានឯកភាពគ្នាផ្ទុកផ្តាក់ ដល់ ស្ថាប័នសមស្របរបស់ខ្លួន ឲ្យបង្កើតឡើងជា គណៈកម្មការចម្រុះ ដើម្បីសិក្សាលំអិត អំពីគម្រោង សាងសង់បំពង់បង្ហូរឧស្ម័ននោះ ដោយប្រាកដណាស់ នឹងមានភាគីកូរ៉េខាងត្បូង ចូលរួមដែរ។
តាមប្រសាសន៍ លោកមេដវេដេវ បំពង់នេះ នឹងមានប្រវែងសរុបទៅជាង ១.១០០គ.ម. ដែលពី ក្នុងនោះ ជាង៧០០គ.ម. គឺកាត់តាមដែនដីកូរ៉េខាងជើង ហើយ ៤០០គ.ម. នឹងលូនតាមដែនដី កូរ៉េខាងត្បូង។ សមត្ថភាពរបស់វា គឺអាចបង្ហូរឧស្ម័នរុស្ស៊ី បរិមាណដល់ ១០.០០០លានម៣ ក្នុង ១ឆ្នាំៗទៅផ្គត់ផ្គង់ដល់តម្រូវការ របស់កូរ៉េខាងត្បូង។ តាមកាសែតរុស្ស៊ីលេខថ្ងៃនេះ ចំពោះសេវា បង្ហូរនេះ ទីក្រុងព្យុងយ៉ាង នឹងទទួលបាន ១០០លានដុល្លារអាមេរិក ក្នុង១ឆ្នាំៗ។
ទាក់ទងនឹងបញ្ហានុយក្លេអ៊ែរកូរ៉េខាងជើង គឺអ្នកនាំពាក្យផ្លូវការ របស់ប្រធានាធិបតីរុស្ស៊ី លោកស្រី Natalia Timakova ដេលបានថ្លែងទៅពួកអ្នកកាសែតថា ៖ នាកិច្ចចរចានោះ លោក គីម យ៉ុង អ៊ីល បានជម្រាបលោកមេដវេដេវ អំពីភាពត្រៀមខ្លួនរបស់ទីក្រុង ព្យុង យ៉ាង
ស្តារឡើងវិញ ដោយគ្មានល័ក្ខខ័ណ្ឌ អ្វីណាជាមុនទេនូវ កិច្ចចរចា៦ភាគីដែលបានត្រូវផ្តាច់ទៅ តាំងពីខែមេសាឆ្នាំ២០០៩មក ជុំវិញបញ្ហានុយក្លេអ៊ែរ របស់កូរ៉េខាងជើង។ មិនតែប៉ុណ្ណោះ លោកគីម យ៉ុង អ៊ីល ថែមទាំងសំដែង នូវភាពត្រៀមខ្លួនជាគោលការណ៍ ព្យួរទុកដោយស្ម័គ្រចិត្ត ទាំងការផលិត ទាំងការសាកល្បង សម្ភារៈនុយក្លេអ៊ែរ។
ថ្ងៃនេះ អគ្គមគ្គុទ្ទេសក៍កូរ៉េខាងជើង លោក គីម យ៉ុង អ៊ីល ក្រោយពីបំពេញទស្សនកិច្ចខ្លួន អស់ ៦ថ្ងៃ នៅតាមតំបន់ស៊ីបេរី និង ចុងបូព៌ាប្រទេសរុស្ស៊ី ក៏ចេញដំណើរ តាមរថភ្លើងក្រោះរបស់គាត់ ត្រឡប់ទៅមាតុប្រទេសវិញ ដោយឆ្លងកាត់ តាមភាគខាងជើងប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ