គម្រោងលុបចោលកូតាសម្រាប់ទទួលជនបន្លាស់ទី ពីក្រៅ មកធ្វើការនៅរុស្ស៊ី
សាច់រឿងដែលមាន បានត្រូវចុះផ្សាយថ្ងៃនេះដោយអង្គការសារពត៌មានរបស់រដ្ឋាភិបាល រុស្ស៊ី គឺកាសែត Rossiskaya Gazeta ក្រោយពីគណៈកម្មការរដ្ឋាភិបាលបានពិនិត្យមើលគម្រោងសមស្របបំផុសមកដោយ ស្ថាប័នសហព័ន្ធរុស្ស៊ីទទួលបន្ទុកខាងនយោបាយជនបន្លាស់ទី ពីក្រៅមកធ្វើការនៅប្រទេសរុស្ស៊ី ហៅកាត់ថា FMS។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
ខ្លឹមសារនៃគម្រោង លុបកូតានេះ គឺដើម្បីបើកលទ្ធភាពយ៉ាងទូលាយឲ្យកម្លាំងពលកម្មពីក្រៅហូរចូលបានកាន់តែច្រើនឡើង មកធ្វើការនៅរុស្ស៊ី ដើម្បីជួយប៉ះប៉ូវបង្គ្រប់កង្វះកម្លាំងពលកម្មរុស្ស៊ីផ្ទាល់ បណ្តាលមកពីចំនួនបណ្តាជនរុស្ស៊ីចេះតែបន្តរួញខើចទៅ ដ្បិតចំនួនអ្នកស្លាប់ នៅតែមានអត្រាខ្ពស់ជាងអត្រា ទារកដែលកើតមក។
យ៉ាងណាមិញ ស្របនឹងទិន្នន័យនៃការជំរឿនប្រជាជន ធ្វើពីកាលពីខែតុលាឆ្នាំ២០១០ កន្លងទៅ ចំនួនបណ្តាជននៅរុស្ស៊ី បានរួញខើចអស់២លាន២សែននាក់ មកនៅត្រឹម ១៤២លាន៩សែននាក់ បើប្រៀបទៅនឹង ១៤៥លាន១សែននាក់ ដែលមានស្រង់បានពេលជំរឿនប្រជាជនកាលពី៨ឆ្នាំមុន។
ហើយស្របនឹងការបូកគុណឃើញ ក្នុង១៥ឆ្នាំទៅមុខ គឺទៅទល់ឆ្នាំ២០២៥ ចំនួនបណ្តាជននៅរុស្ស៊ីនឹងថយចុះអស់១០លាន៥សែននាក់ទៀត។ អ៊ីចឹងហើយ បានជា គណៈកម្មការរដ្ឋាភិបាលយល់ថា ដើម្បីបង្គ្រប់ចំនួននេះ ក្នុង១៥ឆ្នាំទៅមុខ ប្រទេសរុស្ស៊ីត្រូវការឲ្យមានកម្លាំងពលកម្មហូរចូលពីក្រៅមួយឆ្នាំៗ ឲ្យបានចំនួនយ៉ាងហោចណាស់ គឺ៤សែន២ម៉ឺន៥ពាន់នាក់។ ឯកសារជាគម្រោងចង្អុលឲ្យឃើញថា គោលដៅនេះអាច សម្រេចទៅកើតលុះណាតែលុបចោលទៅនូវកូតាដែលកម្រិតចំនួន។
សម្រាប់ជាការកត់សម្គាល់ ក្នុង៣ឆ្នាំចុងក្រោយ ពីឆ្នាំ២០០៧ ដល់ ២០០៩ កូតានេះ តែងកម្រិតនៅត្រឹម ២លាននាក់ ប៉ុន្តែកាលពីដំណាច់ ឆ្នាំ ២០០៩ លោកនាយករដ្ឋមន្ត្រី Poutine បានសំរេចចិត្តថាកាត់បន្ថយវាមកនៅត្រឹម១លាន៣សែននាក់។
តាមតួលេខ ស្ថាប័នសហព័ន្ធរុស្ស៊ីខាងនយោបាយជនបន្លាស់ទីពីក្រៅហៅកាត់ថា FMS សព្វថ្ងៃ មានជនបន្លាស់ទីបែបនេះ ធ្វើការនៅប្រទេសរុស្ស៊ី ក្នុងចំនួន ពី៤ទៅ៥លាននាក់។ ជាទូទៅ គេមកពីអតីតសាធារណរដ្ឋសូវៀតនានា នៃតំបន់អាស៊ីកណ្តាល និងតំបន់នាយភ្នំកូកាស ហើយពីក្នុងចំនួននេះ ប្រមាណ២លាននាក់ ធ្វើការក្នុងសេដ្ឋកិច្ច ហៅថានៅ ”ក្រោមម្លប់” ជាសេដ្ឋកិច្ចក្រៅផ្លូវការ។
ស្របនឹងស្ថិតិផ្លូវការ នៅរុស្ស៊ីសេដ្ឋកិច្ច ”ក្រោមម្លប់”នេះ ស្រូបកម្លាំងពលកម្មអស់១៣លាននាក់ឬ១៨%នៃបណ្តាជនដែលសកម្មក្នុងសេដ្ឋកិច្ច ហើយផ្តល់បាន ១៦%នៃផលិតផលសរុបក្នុងស្រុក ហៅថាGDP។
ការស្ទង់មតិធ្វើដោយអង្គការសង្គមសាស្ត្ររុស្ស៊ី Levada បង្ហាញឲ្យឃើញថា ប្រជាពលរដ្ឋរុស្ស៊ី ដល់ទៅ៦៦% មិនស្វាគមទេ ចំពោះសេរីកម្មនៃនយោបាយទទួលជនបន្លាស់ទីពីក្រៅមកធ្វើការនៅរុស្ស៊ី រីឯមតិដែលគាំទ្រមានតែ២៦%ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ