បាតុកម្មនិងកូដកម្មនៅទីក្រុងអាថែនប្រឆាំងនឹងនយោបាយរឹតត្បិតរបស់រដ្ឋាភិបាល
កូដកម្មនិងបាតុកម្មនៅបន្តក្នុងថ្ងៃព្រហស្បតិ៍ទី២៩កញ្ញានេះ នៅទីក្រុងអាថែនប្រទេសក្រិក។ តាំងពីព្រឹកព្រលឹមមក មន្ត្រីរដ្ឋការបានកេណ្ឌគ្នាធ្វើបាតុកម្ម បានខ្ទប់ច្រកចូលនៃក្រសួងជាច្រើន និងបានដើរតម្រង់ទៅកាន់សភាជាតិ។ ពួកគេប្រឆាំងនឹងនយោបាយរឹតត្បិតកាន់តែតឹងឡើងរបស់រដ្ឋាភិបាល។ ទន្ទឹមនេះ តំណាងរបស់សហភាពអឺរ៉ុប របស់ធនាគារកណ្តាលអឺរ៉ុប និងរបស់មូលនិធិរូបិយវត្ថុអន្តរជាតិបានទៅដល់ប្រទេសក្រិកដើម្បីវាយតម្លៃមើល ថាតើសហគមន៍អន្តរជាតិគួរបន្តផ្តល់ជំនួយឲ្យប្រទេសជិតក្ស័យធនមួយនេះតទៅទៀតដែរឬទេ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
គឺជាបាតុកម្មដែលរៀបចំដោយសហជីពADEDY ដែលតំណាងអ្នករដ្ឋការជាង៧០០ ០០០នាក់។ តាំងពីព្រឹកមិញមក ពួកបាតុករបានខ្ទប់ច្រកចូលនៃក្រសួងជាច្រើន ដូចយ៉ាងក្រសួងហិរញ្ញវត្ថុជាដើម។ តាមការអំពាវនាវរបស់អ្នកដឹកនាំសហជីព ពួកបាតុករត្រូវនាំគ្នាដើរតម្រង់ទៅកាន់សភាជាតិ ក្នុងថ្ងៃព្រហស្បតិ៍ទី២៩កញ្ញានេះ។
ទន្ទឹមនេះ រដ្ឋាភិបាលក្រិកបានសម្រេចបញ្ចុះប្រាក់ខែរបស់មន្ត្រីរដ្ឋការជាទូទៅ និងបញ្ឈប់ការងាររបស់អ្នកធ្វើការឲ្យរដ្ឋចំនួន៣០ ០០០នាក់រយៈពេល១២ខែ។ អ៊ីចឹងហើយ បានជាប៉ុន្មានថ្ងៃចុងក្រោយនេះ ទីក្រុងអាថែន(Athènes) ទាំងមូលត្រូវរាំងស្ទះ ដោយហេតុតែកូដកម្មនៃមធ្យោបាយដឹកជញ្ជូនសាធារណៈ និងដោយហេតុតែកូដកម្មរបស់ពួកអ្នកបើកTaxi។
កាលពីម្សិលមិញ នៅកណ្តាលរដ្ឋធានី នៅពីមុខក្រសួងហិរញ្ញវត្ថុ ពួកអ្នកចូលនិវត្តន៍ជាច្រើនរយនាក់ ក៏បានធ្វើបាតុកម្មដែរ។ មូលហេតុ គឺមកពីរដ្ឋាភិបាលបានសម្រេចកាត់បន្ថយសោធនរបស់អ្នកចូលនិវត្តន៍ណាដែលទទួលបានប្រាក់លើសពី១ ២០០អឺរ៉ូក្នុងមួយខែ។
ចលនាសង្គមទាំងអស់នេះ ដែលកើតឡើងសឹងរាល់ថ្ងៃ អស់រយៈពេលជាច្រើនសប្តាហ៍កន្លងមកហើយ គឺជាការឆ្លើយតបទៅនឹងនយោបាយរឹតត្បិតរបស់រដ្ឋាភិបាល។ រដ្ឋាភិបាលក្រិកគ្មានជម្រើសអ្វីក្រៅពីកាត់បន្ថយប្រាក់ចំណាយឡើយ ដ្បិតជំពាក់បំណុលគេវ័ណ្តកនិងហៀបតែក្ស័យធនម្តងៗ ហើយនេះក៏ជាលក្ខខណ្ឌដែលប្រទេសនិងស្ថាប័នម្ចាស់បំណុលបានដាក់ទៅលើប្រទេសក្រិកផងដែរ។
នៅថ្ងៃនេះ តំណាងរបស់សហភាពអឺរ៉ុប របស់ធនាគារកណ្តាលអឺរ៉ុប និងរបស់មូលនិធិរូបិយវត្ថុអន្តរជាតិ បានទៅដល់ទីក្រុងអាថែន។ គោលដៅគឺវាយតម្លៃមើល ថាតើរដ្ឋាភិបាលក្រិកកាត់បន្ថយប្រាក់ចំណាយបានគ្រប់គ្រាន់ឬទេ ដើម្បីអាចទទួលជំនួយរបស់សហគមន៍អន្តរជាតិដែលនឹងជួយខ្លួនឲ្យរួចផុតពីការក្ស័យធន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ