ចៅអតីតប្រធានាធិបតីអាមេរិកសម័យសង្គ្រាមលោក ទៅគោរពវិញ្ញាណក្ខន្ធនៅហ៊ីរ៉ូស្ហ៊ីម៉ា
៦ សីហា ១៩៤៥ - ៦ សីហា ២០១២ ! ថ្ងៃនេះ ជាខួប ៦៧ឆ្នាំគត់ ថ្ងៃទម្លាក់គ្រាប់បែកបរមាណូអាមេរិក លើកោះហ៊ីរ៉ូស្ហ៊ីម៉ា និងកោះ ណាហ្កាហ្សាគី របស់ជប៉ុន។ បណ្តាជនជប៉ុន គ្រួសារជនរងគ្រោះ អ្នករួចពីស្លាប់ ភ្ញៀវបរទេស ប្រមាណ៥ម៉ឺននាក់ បានចូលរួមជាផ្លូវការ ក្នុងពិធីគោរពវិញ្ញាណក្ខន្ធអ្នកស្លាប់ទាំង១៤០០០០នាក់។ ក្នុងចំណោមភ្ញៀវបរទេសជាច្រើនរូប គេសង្កេតឃើញ មានម្នាក់ជាចៅអតីតប្រធានាធិបតីអាមេរិក Harry Truman ដែលបានបញ្ជាឱ្យទម្លាក់គ្រាប់បែកបរមាណូ លើប្រទេសជប៉ុន។ លោក Clifton Truman ជាសមាជិកត្រកូល Trumanដំបូងគេបំផុត ដែលបានធ្វើដំណើរទៅកាន់ហ៊ីរ៉ូស្ហ៊ីម៉ា និងទៅគោរពវិញ្ញាណក្ខន្ធជនរងគ្រោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
នៅក្នុងឧទ្យានសន្តិភាព ទីដែលកំពុងប្រព្រឹត្តទៅជាផ្លូវការ ពិធីរំលឹកខួប៦៧ឆ្នាំនៃការទម្លាក់គ្រាប់បែកបរមាណូ លោក Clifton Truman មិនអាចគេចអារម្មណ៍ឱ្យទទួលដឹងពីវត្តមាននៃព្រលឹងជនរងគ្រោះរបស់ Little Boy បានឡើយ (កូនប្រុសតូច ជាឈ្មោះរបស់គ្រាប់បែកបរមាណូអាមេរិកទីមួយ)។ ស្នូរជួងបានលាន់ឮឡើង នៅម៉ោង ៨ និង១៥ ម៉ោងនៃការទម្លាក់គ្រាប់បែកបរមាណូទីមួយ នៅហ៊ីរ៉ូស្ហ៊ីម៉ា ទាំងភ្ញៀវក្នុងពិធី ក៏ដូចជាបណ្តាជនជប៉ុន តាមផ្លូវ នាំគ្នាលំទោនខ្លួន រក្សាភាពស្ងប់ស្ងាត់មួយនាទី។
“អរគុណព្រះជាម្ចាស់ ដែលជួយយើងឱ្យមានអាវុធនុយក្លេអ៊ែរ ! សូមជួយឱ្យយើងឱ្យប្រើអាវុធនេះដោយត្រឹមត្រូវ !” នេះជាប្រសាសន៍របស់អតីតប្រធានាធិបតីអាមេរិក Harry Truman ថ្លែងពីរថ្ងៃមុនការទម្លាក់គ្រាប់បែក នៅហ៊ីរ៉ូស្ហ៊ីម៉ា។ ថ្ងៃចន្ទនេះ អតីតអ្នកកាសែត មានអាយុ ៥៥ឆ្នាំ លោក Clifton Truman ជាចៅ បានថ្លែងជាសាធារណៈ ថា “គ្មានសេចក្តីសម្រេចល្អទេ ក្នុងសង្គ្រាម ! ប៉ុន្តែជីតារបស់ខ្ញុំចង់បញ្ចប់សង្គ្រាមឱ្យបានឆាប់តែប៉ុណ្ណោះ”។
លោក Clifton Truman រស់នៅទីក្រុងស៊ីកាហ្កោ បានជួបអ្នកជនរងគ្រោះរួចពីស្លាប់ ដែលមានម្នាក់បានឆ្លើយតបថា “ខ្ញុំចង់ឱ្យគាត់ដឹងថា មានជនរងគ្រោះមួយចំនួន មិនអត់ទោសឱ្យអាមេរិកជារៀងរហូត”។ ហ៊ីរ៉ូស្ហ៊ីម៉ា ចងចាំជានិច្ច ព្រឹត្តិការណ៍ថ្ងៃទី ៦សីហា ១៩៤៥។
នៅណាហ្កាហ្សាគីវិញ គំនុំហាក់បានរសាយបន្តិច ព្រោះតែអតីតអភិបាលក្រុងម្នាក់ គឺលោក ហ៊ីតូស្ហ៊ី ម៉ូតូហ្ស៊ីម៉ា មានសេចក្តីក្លាហាន ហ៊ានពោលទម្លាក់ការទទួលខុសត្រូវ ទៅលើព្រះចៅអធិរាជ្យជប៉ុន ហ៊ីរ៉ូហ៊ីតូ ថាមានចំណែកក្នុងសោកនាដកម្មនុយក្លេអ៊ែរ នៅហ៊ីរ៉ូស្ហ៊ីម៉ា និងណាវ៉ាហ្សាគី ៖ “ព្រះចៅ ហ៊ីរ៉ូហ៊ីតូ អាចបញ្ចប់សង្គ្រាមបាន ! បញ្ចប់មុន និងទាន់ហេតុការណ៍ ឬអាចឃាត់មិនឱ្យមានសេចក្តីសម្រេចរបស់ប្រធានាធិបតីអាមេរិក Harry Truman ទម្លាក់គ្រាប់បែកបរមាណូផងក៏ថាបាន” !
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ