លោកហេង សំរិន៖«ថ្ងៃ២ ធ្នូ ១៩៧៨ គឺជាដើមកំណើតនៃសមិទ្ធផលសព្វថ្ងៃ»
គណបក្សប្រជាជនកម្ពុជាប្រារព្ធទិវា៣៤ឆ្នាំថ្ងៃបង្កើតរណសិរ្សសាមគ្គីសង្រ្គោះជាតិកម្ពុជា។ សម្រាប់គណបក្សកាន់អំណាចយូរមួយនេះ «មានថ្ងៃ២ ធ្នូ ទើបមានថ្ងៃ៧ មករា មានថ្ងៃ៧ មករា ទើបមានអ្វីៗដូចសព្វថ្ងៃនេះ»។ ប៉ុន្តែគណបក្សប្រឆាំងវិញបានចោទជាសំណួរថា តើនណាជាអ្នកបង្កើតរណសិរ្សនេះ ?
ចុះផ្សាយនៅថ្ងៃ៖
ស្តាប់ - ០២:០២
នៅចំពោះមុខអ្នកចូលរួមប្រមាណជា១ ០០០នាក់ក្នុងសាលសន្និសីទចតុមុខទីក្រុងភ្នំពេញនៅថ្ងៃអាទិត្យនេះ លោក ហេង សំរិន ប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភាជាតិបានថ្លែងរម្លឹកគុណយុទ្ធជនអ្នកស្នេហាជាតិដែលបានប្តូរផ្តាច់ជីវិតដើម្បីរំដោះជាតិពីរបបប្រល័យពូជសាសន៍ប៉ុលពត អៀងសារីក្នុងអំឡុងឆ្នាំ១៩៧៥ និង១៩៧៩។ ទិវា២ ធ្នូ ឆ្នាំ១៩៧៨ គឺជាទិវាប្រវត្តិសាស្ត្រមិនអាចបំភ្លេចបានរបស់គណបក្សប្រជាជនកម្ពុជាកាលពី៣៤ឆ្នំាមុន ក្នុងការបង្កើតចលនាអ្នកស្នេហាជាតិដើម្បីផ្តួលរំលំរបបប្រល័យពូជសាសន៍នៅថ្ងៃ៧ មករា ឆ្នាំ១៩៧៩។
លោក ហេង សំរិន ប្រធានកិត្តិយសគណបក្សប្រជាជនកម្ពុជាបានគូសបញ្ជាក់ថា៖«មានថ្ងៃ២ ធ្នូ ទើបមានថ្ងៃ៧ មករា មានថ្ងៃ៧ មករា ទើបមានអ្វីៗដូចសព្វថ្ងៃនេះ»។ លោក ហេង សំរិន បានបន្តទៀតថា៖«យើងទាំងអស់គ្នាសូមប្រកាសថា រណសិរ្ស២ ធ្នូមិនត្រឹមតែសង្រ្គោះយើងទាំងអស់គ្នាអោយចាកផុតពីគ្រោះមហន្តរាយនៃរបបប៉ុលពតប៉ុណ្ណោះទេ។ ប៉ុន្តែរណសិរ្ស២ ធ្នូ បានជួយស្តារ កសាង និងអភិវឌ្ឍសង្គមជាតិនៅគ្រប់ទិសទី»។
ទាក់ទងទៅនឹងគុណបំណាច់ថ្ងៃ២ ឆ្នូ ឆ្នាំ១៩៧៨នេះ លោក សឺន សុងប៊ែរ៍ មន្ត្រីជាន់ខ្ពស់នៃគណបក្សសិទ្ធិមនុស្សបានចោទជាសំណួរយ៉ាងខ្លីថា៖«តើនណានៅពីក្រោយការបង្កើតថ្ងៃ២ ធ្នូនេះ តើមិនមែនវៀតណាមជាអ្នកនៅពីក្រោយទេឬ ?»
បើទោះបីយ៉ាងណាក៏ដោយ សម្រាប់លោក ហេង សំរិន ស្មារតី២ ឆ្នូ ស្មាតី៧ មករាដែលបានចារិកជាប់ក្នុងមនសិការរបស់ប្រជាជនកម្ពុជាបានប្រែក្លាយទៅជាកម្លាំងដ៏ធំធេងក្នុងការបង្កើតសមិទ្ធផលសំខាន់ៗរបស់សង្គមជាតិនាពេលបច្ចុប្បន្ននេះ។
សូមបញ្ជាក់ថា ថ្ងៃ២ ធ្នូឆ្នាំ ១៩៧៨ដែលកាលណោះមានឈ្មោះថា «រណសិរ្សសាមគ្គីសង្រ្គោះជាតិកម្ពុជា» ត្រូវបានប្តូរឈ្មោះមកជា «រណសិរ្សសាមគ្គីអភិវឌ្ឍន៍មាតុភូមិកម្ពុជាវិញសម្រាប់ពេលបច្ចុប្បន្ននេះ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ