ទស្សនកិច្ចនាយករដ្ឋមន្ត្រីថៃនៅប្រទេសបារាំង
នាយករដ្ឋមន្ត្រីថៃលោកស្រី យីងឡាក់ស៊ីណាវ៉ាត្រា បានត្រូវទទួលជួបពិភាក្សាដោយប្រធានាធិបតីបារាំង លោក ហ្វ្រង់ស័រ ហូឡង់ នៅថ្ងៃសុក្រទី២០មិថុនា ម្សិលមិញ។ លោកប្រធានាធិបតីបារាំងបានអបអរនឹងកិច្ចសន្យារបស់លោកស្រីនាយករដ្ឋមន្ត្រីថៃពី “ការជំរុញការពារប្រជាធិបតេយ្យនិងសេរីភាពនៅក្នុងប្រទេសថៃ”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
បើយោងតាមសេចក្តីថ្លែងការណ៍នៃវិមានអេលីហ្សេ “ប្រធានាធិបតីបារាំង លោក ហ្វ្រង់ស័រ ហូឡង់ បានសម្តែងឲ្យឃើញជាថ្មីម្តងទៀតនូវសាមគ្គីភាពរបស់ប្រទេសបារាំងជាមួយប្រទេសថៃ ក្រោយពីប្រទេសនេះបានស្គាល់គ្រោះមហន្តរាយទឹកជំនន់ ដែលបានធ្វើឲ្យមានអ្នករងគ្រោះនិងខូចខាតគ្រឿងសម្ភារៈយ៉ាងច្រើនមហិមា”។
ទាំងនេះក៏ជាឱកាសមួយផងដែរ សម្រាប់គូសបញ្ជាក់ឲ្យដឹងពីសារៈសំខាន់នៃភាពជាដៃគូរវាងប្រទេសទាំងពីរដែលឈរលើផែនការសកម្មភាពបារាំង-ថៃ។ លោកប្រធានាធិបតីបារាំងនិងលោកស្រីនាយករដ្ឋមន្ត្រីថៃបានព្រមព្រៀងគ្នាថា “ត្រូវតែជំរុញទំនាក់ទំនងឧបតោភាគីបារាំង-ថៃឲ្យមានសន្ទុះថ្មី ក្នុងវិស័យនយោបាយ សេដ្ឋកិច្ច ឧត្តមសិក្សា យោធានិងវប្បធម៌”។
ប្រមុខដឹកនាំនៃប្រទេសទាំងពីរបានសង្កត់បញ្ជាក់ឲ្យដឹងពីការចាំបាច់ក្នុងការពង្រឹងពង្រីក “ទំនាក់ទំនងសេដ្ឋកិច្ចរវាងប្រទេសទាំងពីរ” ដើម្បីឲ្យសហគ្រាសបារាំងចូលរួមមានសកម្មភាពជាងនេះ ក្នុងគម្រោងអភិវឌ្ឍន៍ហេដ្ឋារចនាសម្ព័ន្ធនៅក្នុងប្រទេសថៃ។
ចំណែកឯសហគ្រាសថៃវិញ ក៏ទទួលបានជោគជ័យក្នុងការអភិវឌ្ឍន៍សកម្មភាពរបស់ខ្លួននៅក្នុងប្រទេសបារាំង៖ មានក្រុមហ៊ុនថៃមួយបានទៅអភិវឌ្ឍនៅតំបន់ប្រឺតាញ Bretagne ក្នុងវិស័យឧស្សាហកម្មកែច្នៃជលផល ហើយមួយទៀតនៅតំបន់អ៊ីហ្ស៊ែរ Isère ក្នុងវិស័យថាមពល។
ហើយនាយករដ្ឋមន្ត្រីថៃលោកស្រី យីងឡាក់ស៊ីណាវ៉ាត្រានិងប្រធានាធិបតីបារាំង លោក ហ្វ្រង់ស័រ ហូឡង់ ក៏បានព្រមព្រៀងគ្នាផងទៀតពីកិច្ចពង្រឹងសហប្រតិបត្តិការក្នុងវិស័យយោធា ដោយក្រសួងការពារជាតិនៃប្រទេសទាំងពីរនឹងត្រូវចុះហត្ថលេខានៅពេលអនាគតខាងមុខនេះ ទៅលើ “កិច្ចព្រមព្រៀងសហប្រតិបត្តិការ”។ ហើយលោកស្រីយីងឡាក់ក៏បានមានជំនួបពិភាក្សាជាមួយលោកនាយករដ្ឋមន្ត្រីបារាំង Jean Marc Ayrault ផងដែរ។
នាឱកាសនោះ លោកស្រីរដ្ឋមន្ត្រីក្រសួងសិក្សាធិការជាន់ខ្ពស់បារាំងនិងលោករដ្ឋមន្ត្រីក្រសួងការបរទេសថៃក៏បានឆ្លៀតចុះហត្ថលេខាទៅលើកិច្ចព្រមព្រៀងឧបតោភាគីក្នុងវិស័យសហប្រតិបត្តិការសិក្សាធិការនិងស្រាវជ្រាវ។
នាយករដ្ឋមន្ត្រីបារាំង-ថៃចង់ពង្រឹងពង្រីកការសិក្សាភាសាបារាំង ហើយនិងការជួយជំរុញឲ្យមាននិស្សិតថៃកាន់តែច្រើនមករៀននៅប្រទេសបារាំង។
ជាទីបញ្ចប់ ប្រមុខរដ្ឋាភិបាលនៃប្រទេសទាំងពីរចង់ឲ្យការពង្រឹងទំនាក់ទំនងបារាំង-ថៃឋិតនៅក្នុងក្របខ័ណ្ឌនៃកិច្ចចរចារឹតតែប្រសើររវាងប្រទេសថៃនិងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ