លោកនាយករដ្ឋមន្ត្រីហ៊ុនសែនប្រកាសពីការកាត់ដីសម្រាប់ប្រជាជនមានជម្លោះ
នៅព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានប្រកាសដោយផ្ទាល់មាត់ អំពីនយោបាយថ្មី ដើម្បីកាត់ដីឲ្យប្រជាជនកម្ពុជា នៅតំបន់មានជម្លោះ ជាពិសេសជម្លោះជាមួយនឹងក្រុមហ៊ុនដីសម្បទាន នៅទូទាំងប្រទេស។ ក៏ប៉ុន្តែក្រៅពីព្រមាន ចំពោះប្រជាជន មិនឲ្យរុករាន ចូលកាន់កាប់ ចាប់ដីថ្មី នៅព្រឹកនេះ លោកនាយករដ្ឋមន្ត្រី ហ៊ុនសែន ក៏បានប្រកាសឲ្យតាមចាប់ខ្លួន បុរស ៥ នាក់ ដែលរដ្ឋាភិបាល ចាត់ទុកជាមេខ្លោង ក្នុងរឿងជម្លោះដីធ្លី នៅខេត្តក្រចេះកាលពីខែមុនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៦
ក្នុងពិធីផ្សព្វផ្សាយរបាយការណ៍ពាក់កណ្តាលអាណត្តិ នៃផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០០៩ ដល់ឆ្នាំ២០១៣ នាព្រឹកថ្ងៃទី១៤មិថុនាឆ្នាំ២០១២លោកនាយករដ្ឋមន្ត្រី ហ៊ុន សែន បានប្រកាសពី “នយោបាយចាស់ សកម្មភាពថ្មីលើវិស័យដីធ្លី”។ នោះគឺការដោះស្រាយសម្បទានដីសង្គមកិច្ច ដើម្បីចែកជូនដល់ប្រជាជនទូទាំងប្រទេសពិសេសអ្នកកំពុងមានបញ្ហាទំនាស់ដីជាមួយក្រុមហ៊ុនសម្បទាន។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា ដី ៣ ប្រភេទ ដែលនឹងត្រូវផ្តល់ឲ្យប្រជាជន នៅទូទាំងប្រទេស ហើយត្រូវអនុវត្តឲ្យរួចរាល់ យ៉ាងយូរបំផុត ក្នុងរយៈពេល ៦ ខែ គិតចាប់ពីថ្ងៃនេះ។ ទី១-ព្រៃសម្បទាន ដែលរដ្ឋាភិបាលបានផ្អាក មិនឲ្យកាប់ឈើ ចាប់តាំងពីឆ្នាំ២០០០។ ប្រភេទដីទី២ គឺប្រភេទដីសម្បទាន ដែលផ្តល់ឲ្យក្រុមហ៊ុន ហើយមានជម្លោះជាមួយប្រជាជន និងប្រភេទដីទី៣ ដែលត្រូវផ្តល់ឲ្យប្រជាពលរដ្ឋ ជាប្រភេទដីរដ្ឋ ដែលប្រជាជនកាន់កាប់ដោយខុសច្បាប់ តាមរយៈការចូលកាប់ទន្ទ្រានដីរដ្ឋ ក្នុងរយៈពេលកន្លងទៅ។
ជម្លោះដីកន្លងមក ត្រូវបានលោកនាយករដ្ឋមន្ត្រី ទទួលស្គាល់ថា មកពីក្រុមហ៊ុន ទទួលដីសម្បទានសេដ្ឋកិច្ចពីរដ្ឋាភិបាល មិនបានអនុវត្តឲ្យបានត្រឹមត្រូវ តាមសេចក្តីណែនាំ ទើបបណ្តាលឲ្យផ្ទុះជម្លោះ រហូតដល់កើតមានហិង្សា។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា នយោបាយដោះស្រាយបញ្ហាដីធ្លីពេលនេះ មិនមែនជាសូចនាករ ឬជាការកំណត់ដែលដៃគូអភិវឌ្ឍន៍ ដាក់ឲ្យលោក ឬដាក់ឲ្យរដ្ឋាភិបាលកម្ពុជាទេ។ លោកនាយករដ្ឋមន្ត្រី ក៏ព្រមានកុំនិយាយអំពីបញ្ហាគំនាបអន្តរជាតិ មកលើរដ្ឋាភិបាលឡើយ។ ករណីនេះ ក៏មិនមែន ដើម្បីសន្លឹកឆ្នោតឡើយ។
ជាមួយនឹងប្រសាសន៍ដូច្នេះ លោកនាយករដ្ឋមន្ត្រី ហ៊ុន សែន ក៏បានប្រកាសដោយផ្ទាល់មាត់ថា ចាប់ពីពេលនេះទៅ ដីសម្បទានសេដ្ឋកិច្ចរបស់ក្រុមហ៊ុនណាដែលមានជម្លោះ ត្រូវវាស់ កាត់ ចែកឲ្យប្រជាជនភ្លាម។ នោះគឺផ្តល់សិទ្ធិកាន់កាប់ឲ្យប្រជាជន លើទំហំដីកាន់កាប់ជាក់ស្តែង ដែលគាត់កំពុងអាស្រ័យផល និងទី២-កាត់ទុក ១០ % ដើម្បីឲ្យគាត់ ត្រៀមបម្រុងទុកនិងអាស្រ័យផល។
លោកនាយករដ្ឋមន្ត្រី ហ៊ុន សែន ក៏បានប្រកាសមិនឲ្យប្រជាជន ចូលទៅកាន់កាប់ដីរបស់ក្រុមហ៊ុនថែមទៀតទេ។ ចំណែកករណីដី នៅឃុំកំពង់ដំរី ក្នុងស្រុកឆ្លូង ខេត្តក្រចេះ លោកនាយករដ្ឋមន្ត្រី អះអាងថា មិនអាចទទួលយកបានទេ។
ក្នុងជម្លោះដីធ្លីនៅខេត្តក្រចេះ ដែលរដ្ឋាភិបាលប្រើកម្លាំងទ័ព បណ្ដេញប្រជាជន នាំឲ្យក្មេងស្រីម្នាក់ស្លាប់ កាលពីថ្ងៃទី១៦ ខែឧសភា ឆ្នាំ២០១២ ត្រូវបានលោកនាយករដ្ឋមន្ត្រី ហ៊ុន សែន ប្រកាសតាមចាប់ខ្លួនមេខ្លោង ៥ នាក់ ដែលជាសកម្មជនតវ៉ារឿងដីធ្លី ទោះជាជននោះទៅដល់ជើងមេឃក៏ដោយ។
ដោយសម្តីខ្លាំងៗ លោកនាយករដ្ឋមន្ត្រី បានគូសបញ្ជាក់ថា ត្រូវតាមចាប់មេខ្លោងធំ ទាល់តែបាន។ ទោះជាទៅដល់ជើងមេឃ ក៏ត្រូវតែតាមចាប់ មិនមានអត់អោនទេ។ លោកនាយករដ្ឋមន្ត្រី ក៏បានប្រកាសថា ទោះជាជននោះ ទៅដល់ប្រទេសណា ក៏តាមចាប់ ហើយត្រូវសុំធ្វើបត្យាប័នមនុស្សនោះ ត្រលប់មកវិញ។ ទោះជាលាក់ក្នុងស្ថានទូតក្តី និងទោះនៅក្នុងអង្គការក្រៅរដ្ឋាភិបាល រដ្ឋាភិបាលត្រូវតែចាប់សកម្មជនដីធ្លីទាំង ៥ នាក់នោះ។
លោកនាយករដ្ឋមន្ត្រី បានសម្តែងការសោកស្តាយចំពោះមរណភាពក្មេងស្រីម្នាក់ដែលលោកនាយករដ្ឋមន្ត្រី ប្រកាសថា បានស្លាប់ ក្នុងព្រឹត្តិការណ៍បោសសម្អាតក្រុមអនាធិបតេយ្យ នៅក្នុងជម្លោះដីនៅស្រុកឆ្លូង ខេត្តក្រចេះ។ ប៉ុន្តែលោកនាយករដ្ឋមន្ត្រី ចំអកទៅអាមេរិកថា រឿងស្លាប់ក្មេងស្រីម្នាក់នេះ វាមិនទាន់ធ្ងន់ធ្ងរ ដូចគ្រាប់បែកអាមេរិកាំង ទម្លាក់ខុសគោលដៅ នៅអាហ្កានិស្ថាន ក្រោមហេតុផល កម្ចាត់ពួកអាល់កៃដា នៅតាលីបង់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ