ប្រតិបត្តិការបំបែកសំបុកពួកសង្គមងងឹតជនជាតិចិននៅភ្នំពេញ
សមត្ថកិច្ចប៉ូលិសក្រសួងមហាផ្ទៃ បានបើកប្រតិបត្តិការជាថ្មីម្តងទៀតដើម្បីចាប់ខ្លួនពួកសង្គមងងឹតជាជនជាតិចិនដែលមកសម្ងំលាក់ខ្លួនធ្វើសកម្មភាពឧក្រិដ្ឋកម្មឆ្លងដែននៅក្នុងប្រទេសកម្ពុជា។ ក្នុងប្រតិបត្តិការតាំងពី រសៀលរហូតដល់យប់ថ្ងៃសុក្រម្សិលមិញ សមត្ថកិច្ចចាប់បានជនជាតិចិនចំនួន៦៩នាក់នៅក្នុងទីតាំងផ្សេងៗពីគ្នាក្នុងទីក្រុងភ្នំពេញ។ អ្នកទាំងនោះត្រូវគេសង្ស័យថាជាបណ្តាញក្រុមចាប់ជម្រិតឆ្លងដែនតាមរយៈការប្រើប្រព័ន្ធបច្ចេកវិជ្ជាទំនើប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
យ៉ាងហោចណាស់មានជនសង្ស័យក្នុងខ្សែបណ្តាញសង្គមងងឹតជនជាតិចិនចំនួន៦៩នាក់ត្រូវបានសមត្ថកិច្ចកម្ពុជាចាប់ខ្លួនកាលពីយប់ថ្ងៃសុក្រម្សិលមិញនៅក្នុងប្រតិបត្តិការមួយដើម្បីបំបែកសំបុកបណ្តាញឧក្រិដ្ឋកម្មឆ្លងដែននៅកម្ពុជា។
ប្រតិបត្តិការនេះបានបើកធ្វើតាំងពីរសៀល រហូតដល់យប់ថ្ងៃទី១៨ឧសភាម្សិលមិញនៅក្នុងទីក្រុងភ្នំពេញក្នុងទីតាំងជាច្រើនកន្លែង រួមមានខណ្ឌពោធិសែនជ័យ ខណ្ឌទួលគោក ខណ្ឌសែនសុន និងខណ្ឌឬស្សីកែវ។
ក្រុមជនជាតិចិនទាំងនោះត្រូវគេសង្ស័យថា ជាអ្នកធ្វើសកម្មភាពចាប់ជម្រិតជនជាតិចិនដូចគ្នាដែលនៅក្រៅប្រទេស ហើយគំរាមទារប្រាក់ពីគ្រួសារនៅឯប្រទេសចិនតាមប្រពន្ធ័បច្ចេកវិទ្យាទំនើប។ ពួកជនសង្គមងងឹតចិនទាំងនោះបានមកសម្ងំលាក់ខ្លួនធ្វើសកម្មភាពនៅក្នុងប្រទេសកម្ពុជា។ លោកឧត្តមសេនីយ៍ឯក គៀត ចន្ទថារិទ្ធ អ្នកនាំពាក្យអគ្គស្នងការនគរបាលជាតិបានប្រាប់ឲ្យដឹងនៅថ្ងៃនេះថា ក្នុងចំណោមជនជាតិចិនដែលត្រូវបានចាប់ខ្លួនចំនួន៦៩នាក់នោះ មានស្ត្រី ៦នាក់។
ក្រុមជនជាតិចិនទាំងនោះនឹងត្រូវបញ្ជូនទៅប្រទេសចិនវិញដើម្បីឲ្យរដ្ឋាភិបាលចិនចាត់ការតាមផ្លូវច្បាប់។ ក្រសួងមហាផ្ទៃនិងស្ថាបន័ពាក់ពន្ធ័កំពុងតែចាត់ការតាមនីតិវិធីច្បាប់ដើម្បីបញ្ជូនខ្លួនពួកគេ។ លោកគៀត ចន្ទថារិទ្ធឲ្យដឹងទៀតថា រដ្ឋាភិបាលកម្ពុជាបានសហការយ៉ាងល្អជាមួយបណ្តាប្រទេសនៅក្នុងតំបន់និងបណ្តាប្រទេសជាមិត្តទាំងអស់ពាក់ពន្ធ័នឹងការ បង្ក្រាបបទល្មើសឧក្រិដ្ឋកម្មឆ្លងដែននេះ។ ការបង្ក្រាបជនសង្គមងងឹតជាតិចិននៅពេលនេះគឺដោយសារតែអាជ្ញាធរកម្ពុជាបានទទួលព័ត៌មាន និងកិច្ចសហការពីរដ្ឋាភិបាលចិន។សមត្ថកិច្ចប៉ូលិសក៏បានអំពាវនាវរកកិច្ចសហការពីប្រជាពលរដ្ឋទូទៅផងដែរដើម្បីបំបែកសំបុកជនសង្គមងងឹតឆ្លងដែនទាំងនោះ។
សូមបញ្ជាក់ថា ប្រតិបត្តិការចាប់ពួកសង្គមងងឹតឆ្លងដែននេះ បានបើកធ្វើជាច្រើនដងមកហើយ។ ជាក់ស្តែង ជនជាតិចិនចំនួន ១៨៦ នាក់ រួមទាំងជនជាតិវៀតណាមម្នាក់ផង ត្រូវបានចាប់ខ្លួននៅក្នុងប្រតិបត្តិការកាលពីខែមិថុនាឆ្នាំ២០១១ កន្លងទៅនៅ ភ្នំពេញ ខេត្តព្រះសីហនុ និងខេត្តស្វាយរៀង។ អ្នកទាំងនោះក៏ត្រូវបានរដ្ឋាភិបាលបញ្ជូនទៅប្រទេសដើមវិញដែរ។ មិនមែនតែកម្ពុជាទេបណ្តាប្រទេសផ្សេងទៀតក្នុងសមាគមអាស៊ានក៏ធ្លាប់បានបើកយុទ្ធនាការបង្ក្រាបបណ្តាញឧក្រិដ្ឋកម្មឆ្លងដែននេះដែរដោយមានកិច្ចសហការពីប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ