លោកអូបាម៉ាសន្យាមិនធ្វើអន្តរាគមន៍យោធានៅស៊ីរី ដូចជានៅអ៊ីរ៉ាក់នោះទេ
នៅថ្ងៃសៅរ៍នេះ ប្រធានាធិបតីអាមេរិក បានសន្យាទៅកាន់ប្រជាជនអាមេរិកថា អន្តរាគមន៍យោធារបស់អាមេរិកនៅស៊ីរីមានព្រំដែនកំណត់ ហើយនឹងមិនធ្វើឡើងក្នុងរយៈពេលយូរអង្វែង និងអស់ថវិកាច្រើន ដូចជានៅអ៊ីរ៉ាក់ និងអាហ្វហ្កានីស្ថាននោះទេ។ លោកអូបាម៉ាព្យាយាមពន្យល់ប្រជាជនអាមេរិកអោយយល់ស្របតាមរដ្ឋាភិបាលខ្លួន។ គួររំលឹកថា ប្រជាជនអាមេរិក៥៦ភាគរយ ប្រឆាំងនឹងអន្តរាគមន៍យោធា នៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នៅក្នុងសន្ទរកថាថ្លែងទៅកាន់ប្រជាជនអាមេរិក នៅថ្ងៃសៅរ៍នេះ ប្រធានាធិបតីបារ៉ាក់ អូបាម៉ា បានលើកឡើងថា ប្រទេសស៊ីរី មិនមែនជាប្រទេសអ៊ីរ៉ាក់ រឺក៏អាហ្វហ្កានីស្ថាននោះទេ។ លោកបន្ថែមថា អាមេរិកចង់ធ្វើអន្តរាគមន៍យោធានៅទីនោះ គឺដើម្បីទប់ស្កាត់មិនអោយរដ្ឋាភិបាលស៊ីរីបង្កការវាយប្រហារដោយអាវុធគីមី សាជាថ្មីទៀតប៉ុណ្ណោះ។
លោកអូបាម៉ាសន្យាទៅប្រជាជនអាមេរិកថា អន្តរាគមន៍យោធាអាមេរិកនៅស៊ីរី នឹងមិនធ្វើឡើងក្នុងរយៈពេលយូរ ហើយរដ្ឋាភិបាលអាមេរិកក៏នឹងមិនចំណាយថវិកាអោយច្រើនសន្ធឹកសន្ធាប់ ក្នុងសកម្មភាពយោធានេះដែរ។ លោកអូបាម៉ាបានព្យាយាមទាក់ទាញប្រជាជនអាមេរិកអោយយល់ស្របតាមរដ្ឋាភិបាល ចំពោះអន្តរាគមន៍យោធានៅស៊ីរី។
យោងតាមការស្ទង់មតិរបស់សារព័ត៌មានReuters ជាមួយវិទ្យាស្ថានស្ទង់មតិ Ipsos ប្រជាជនអាមេរិកាំង៥៦ភាគរយ ជំទាស់នឹងអន្តរាគមន៍យោធានៅស៊ីរី។ ហើយមានតែប្រជាជន១៩ភាគរយប៉ុណ្ណោះ ដែលយល់ស្របអោយមានអន្តរាគមន៍នេះ។
ទាក់ទងនឹងអន្តរាគមន៍យោធានេះ សហរដ្ឋអាមេរិកកំពុងតែទន្ទឹងចាំយ៉ាងអន្ទះសា នូវការសំរេចបោះឆ្នោតរបស់សភានៅថ្ងៃចន្ទទី៩កញ្ញានេះ។ នៅសប្តាហ៍ក្រោយនេះដែរ លោកអូបាម៉ានឹងធ្វើការឃោសនាដ៏ធំមួយ ដើម្បីបញ្ចុះបញ្ចូលសមាជិកសភា។ ប្រធានាធិបតីអាមេរិកបញ្ជាក់បន្ថែមថា អាមេរិកមិនអាចបិទភ្នែកនៅចំពោះមុខរូបភាពនានានៅស៊ីរីបាននោះទេ។
កាលពីថ្ងៃសុក្រ នៅប្រទេសរុស្ស៊ី ក្នុងជំនួបកំពូលនៃប្រទេសមហាអំណាចសេដ្ឋកិច្ចចំនួន២០ ដែលហៅកាត់ថា G២០ នោះ ប្រទេសជាច្រើនបានបញ្ចុះបញ្ចូលលោកអូបាម៉ាអោយចៀសវាងអន្តរាគមន៍យោធា។ តែប្រធានាធិបតីអាមេរិកបានបដិសេធដាច់អហង្ការមិនប្តូរជំហរខ្លួននោះទេ។
យោងតាមលោកអូបាម៉ា អាជ្ញាធរស៊ីរីជាអ្នកទទួលខុសត្រូវក្នុងការវាយប្រហារដោយអាវុធគីមី កាលពីថ្ងៃ២១សីហាកន្លងទៅ នៅជាយក្រុងដាម៉ាស។ ការវាយប្រហារនៅថ្ងៃ២១សីហានោះ បានសម្លាប់មនុស្សប្រហែលជាជាង១៤០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ