មេធាវីនួនជា សួរដេញដោលសាក្សីពីសំណុំរឿង០០៣ និង០០៤
ក្នុងសវនាការលើសំណុំរឿង០០២ នៅរសៀលថ្ងៃច័ន្ទនេះ លោក Michiel Pestman សហមេធាវីបរទេសការពារលោកនួនជា បានលើកឡើងពីករណីតា អាន ឬ អោម អាន អតីតប្រធានតំបន់ ៤១ ក្នុងខេត្តកំពង់ចាមនៅសម័យខ្មែរក្រហម បានសួរដេញដោលលើសាក្សីជាអតីតកម្មាភិបាលខ្មែរក្រហម អ្នកស្រី ប្រាក់ យុទ្ធ។ ក៏ប៉ុន្តែអ្នកស្រី ប្រាក់ យុទ្ធ បានបដិសេធ មិនឆ្លើយអ្វីទាំងអស់ដោយអះអាងថា ក្នុងជំនាន់ខ្មែរក្រហម អ្នកស្រី មិនដឹងពីការងាររបស់តាអានឡើយ។ តាអាន ត្រូវបានមេធាវីលោកនួនជា អះអាងថាស្ថិតក្នុងសំណុំរឿង០០៤ដ៏ចម្រូងចម្រាស។
ចុះផ្សាយនៅថ្ងៃ៖
ស្តាប់ - ០២:៣០
មុនពេលបញ្ចប់ការផ្តល់សក្ខីកម្ម នៅតុលាការខ្មែរក្រហម ក្នុងនាមជាសាក្សី អ្នកស្រី ប្រាក់ យុទ្ធ អតីតកម្មាភិបាលខ្មែរក្រហម បានអះអាងថា អ្នកស្រី មិនបានដឹងរឿងតាអាន បើទោះបីជាក្នុងជំនាន់ខ្មែរក្រហម អ្នកស្រី ប្រាក់ យុទ្ធ បានធ្វើការងារជាមួយតាអាន នៅតំបន់ ៣៥ ក្នុងខេត្តកំពត ហើយផ្លាស់មកធ្វើការនៅតំបន់ ៤១ ក្នុងខេត្តកំពង់ចាម ជាកម្មាភិបាលខ្មែរក្រហមជាមួយគ្នាក៏ដោយ។
លោក អោម អាន ឬតាអាន ស្ថិតនៅក្នុងសំណុំរឿង ០០៤ ដ៏ចម្រូងចម្រាសដោយត្រូវបានជំទាស់ដ៏ខ្លាំងក្លាពីភាគីកម្ពុជា ពិសេសរដ្ឋាភិបាលកម្ពុជា រួមទាំងសំណុំរឿង ០០៣។
សំណុំរឿងលេខ០០៣ មានអតីតមេខ្មែរក្រហម ២ នាក់គឺលោក មាស មុតនិងលោកស៊ូ ម៉េត។ ចំណែកសំណុំរឿងលេខ ០០៤ មានជនសង្ស័យ ៣ គឺលោក យឹម ទិត, លោក អោម អាន និងអ្នកស្រី អ៊ឹម ចែម។ អ្នកមានឈ្មោះក្នុងសំណុំរឿង០០៣ និង០០៤ ទាំង ៥ នាក់ គឺជាអតីតកម្មាភិបាលខ្មែរក្រហម ដែលមានតួនាទី ជាប្រធានតំបន់ ប្រចាំនៅតាមខេត្តនានា ក្នុងជំនាន់ខ្មែរក្រហម។
យ៉ាងណាក៏ដោយក្នុងបន្ទប់សវនាការ អ្នកស្រី ប្រាក់ យុទ្ធ បានបដិសេធថា ទាំងក្នុងរបបខ្មែរក្រហមនិងទាំងក្រោយខ្មែរក្រហមដួលរលំ អ្នកស្រី ក៏មិនបានដឹងថា តាអានរស់នៅកន្លែងណាឡើយ។
ការលើកឡើងរបស់សាក្សីរូបនេះ ជាការឆ្លើយតបនឹងសំណួររបស់សហមេធាវីដើមបណ្តឹងរដ្ឋប្បវេណី និងមេធាវីបរទេសការពារលោកនួនជា នៅក្នុងសវនាការកាត់ទោសមេខ្មែរក្រហម ក្នុងសំណុំរឿង០០២ កាលពីរសៀលថ្ងៃច័ន្ទនេះ។
ក៏ប៉ុន្តែមកដល់ត្រង់នេះ លោកចៅក្រម និល ណុន ប្រធានអង្គជំនុំជម្រះសាលាដំបូង បានហាមមិនឲ្យមេធាវីលោកនួនជាសួរដេញដោលលើសំណុំរឿង០០៣ និង០០៤ ដែលចាកប្រធានបទ ក្នុងសវនាការលើសំណុំរឿង០០២ នៅពេលនេះទេ។
ក៏ប៉ុន្តែលោកមេធាវីរបស់លោកនួនជា នៅតែព្យាយាមសួរដេញដោលសាក្សី អ្នកស្រី ប្រាក់ យុទ្ធ ពីរឿង០០៣ និង០០៤។ រហូតដល់ចៅក្រម ហាមឃាត់ និងផ្អាកការសួរដេញដោល។
មុនពេលឈប់សម្រាកនៅរសៀលនេះ លោកចៅក្រម និល ណុន ក៏បានប្រកាសឲ្យដើមបណ្តឹងរដ្ឋប្បវេណីដែលអង្គុយក្នុងបន្ទប់សវនាការ រក្សាភាពស្ងៀមស្ងាត់ ដោយមិនត្រូវបញ្ចេញសំឡេងអ្វី ដែលមិនសមរម្យឡើយ។ ជនរងគ្រោះចង់ឲ្យតុលាការខ្មែរក្រហម ដំណើរការបន្តលើសំណុំរឿង០០៣ និង០០៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ