ទស្សនកិច្ចរដ្ឋមន្ត្រីការបរទេស កូរ៉េខាងជើង នៅរុស្ស៊ី
ប្រមុខការទូត កូរ៉េខាងជើង លោក Pak Y Chun ដែលល្ងាចម្សិលមិញ បានអញ្ជើញមកដល់ក្រុងម៉ូស្គូ ដើម្បីបំពេញទស្សនកិច្ចការងាររយៈពេល៤ថ្ងៃនៅរុស្ស៊ី ក្នុងបំណងទទួលការគាំទ្រពីរុស្ស៊ី ថ្ងៃនេះធ្វើកិច្ចចរចាជាមួយ លោករដ្ឋមន្ត្រីការបរទេសរុស្ស៊ី Serguei Lavrov។
ចុះផ្សាយនៅថ្ងៃ៖
បទអន្តរាគមន៍របស់ កែវ ឆាយា ពីទីក្រុងម៉ូស្គូ
គោលដៅនៃទស្សនកិច្ចរបស់ប្រមុខការទូតកូរ៉េខាងជើង
គួរនិយាយថា ទោះបីកម្រមានប្រព្រឹត្តទៅទស្សនកិច្ចនៃអ្នកមុខអ្នកការកូរ៉េខាងជើងនៅម៉ូស្គូក្តី ក៏ទស្សនកិច្ចនេះ មានទម្ងន់ដ៏ហំហួនដែរ ៖
ទី១- លោក Pak Y Chun ដែលសព្វថ្ងៃជាប្រមុខការទូតកូរ៉េខាងជើង ធ្លាប់បានធ្វើជាឯកអគ្គរដ្ឋទូត ប្រចាំក្រុងម៉ូស្គូ អស់រយៈពេលជាយូរឆ្នាំ
ទី២- នេះជាទស្សនកិច្ចឆ្លើយតបនឹងទស្សនកិច្ចលោករដ្ឋមន្ត្រីការបរទេសរុស្ស៊ី Serguei Lavrov នៅក្រុងព្យុងយ៉ាង កាលពីខែមេសាឆ្នាំទៅមិញ។
ក្នុងរបៀបវារៈ គឺមាន បញ្ហាពង្រីកទំនាក់ទំនងទ្វេភាគី បញ្ហាតំបន់ក្នុងផ្ទៃនៃភាពតានតឹងពុំធ្លាប់មាននៅឧបទ្វីបកូរ៉េ ក្រោយពីមានការផ្ទុះអាវុធនៅទីនោះ ដ៏ខ្លាំងក្លាមិនធ្លាប់មាន បើគិតក្នុងអំឡុងជាងកន្លះសតវត្ស តាំងពីសង្គ្រាមនៅកូរ៉េបានចប់ទៅ។
ពីខាងភាគីរុស្ស៊ី ដែលភក្តីនឹងយន្តការនៃកិច្ចចរចា ៦ ភាគី ដើម្បីស្វែងរកដំណោះស្រាយ កម្មវិធីនុយក្លេអ៊ែរកូរ៉េខាងជើង កម្មវិធីដែលជាក្តីព្រួយបារម្ភរបស់សហគមន៍អន្តរជាតិ គឺតាំងគោលដៅបញ្ចុះបញ្ចូលក្រុងព្យុងយ៉ាង ឲ្យវិលត្រឡប់ទៅកាន់តុចរចាវិញ។
ដើមកំណើតនៃកម្មវិធីនុយក្លេអ៊ែរកូរ៉េខាងជើង
គឺចេញពីសហភាពសូវៀតតែម្តង ដែលជារៀមច្បងរបស់រុស្ស៊ីបច្ចុប្បន្ន។ មុនដំបូង លោកប្រធានាធិបតី គីមអ៊ីលស៊ុង មិនសូវអើពើនឹងការគំរាមកំហែង នៃគ្រាប់បែកបរមាណូលើប្រទេសគាត់ឡើយ ដោយគាត់ហៅគ្រាប់បែកនោះថាជា “ ខ្លាក្រដាស” ទេតើ។ ប៉ុន្តែ ក្រោយពីដឹងថា ស.រ.អា ក្នុងឆ្នាំសង្គ្រាមនៅកូរ៉េ គឺពីឆ្នាំ១៩៥០ ដល់១៩៥៣ មានគម្រោងទម្លាក់លើក្រុងព្យុងយ៉ាង និងតំបន់ជុំវិញក្រុងនេះ នូវគ្រាប់បែកបរមាណូ៧គ្រាប់ ទើបក្នុងឆ្នាំ១៩៥៦ កូរ៉េខាងជើងកុម្មុយនិស្ត ក៏បានចុះសន្ធិសញ្ញា ពឹងសហភាពសូវៀតឲ្យជួយបណ្តុះបណ្តាលសំរាប់ខ្លួន ជាពួកអ្នកឯកទេសខាងផលិតនិងប្រើធាតុបរមាណូ។ ពួកអ្នកស្រាវជ្រាវនុយក្លេអ៊ែរ តែងហៅឆ្នាំ ១៩៥២ ថាជាឆ្នាំបើកសករាជបរមាណូរបស់កូរ៉េខាងជើង ដោយកាលណោះ ទីក្រុងព្យុងយ៉ាង បានសម្រេចបង្កើត វិជ្ជាស្ថានស្រាវជ្រាវថាមពលបរមាណូ។ ប៉ុន្តែ គេត្រូវរង់ចាំដល់ពាក់កណ្តាលទីទសវត្សទី ៦០ ទើបហេដ្ឋារចនាសម្ព័ន្ធបរមាណូរបស់កូរ៉េខាងជើងលេចចេញជារូបរាងមែន។
នៅឆ្នាំ១៩៥៩ កូរ៉េខាងជើង បានចុះសន្ធិសញ្ញាជាមួយសហភាពសូវៀត និងសាធារណរដ្ឋប្រជាមានិតចិន ស្តីអំពីសហប្រតិបត្តិការក្នុងវិស័យប្រើថាមពលនុយក្លេអ៊ែរ សំរាប់គោលដៅស៊ីវិល។ ពេលនោះឯង ដែលកូរ៉េខាងជើងបានចាប់ផ្តើមសង់មជ្ឈមណ្ឌលស្រាវជ្រាវ ជាទីដែលក្នុងឆ្នាំ១៩៦៥ មានដំឡើងម៉ាស៊ីនប្រតិករនុយក្លេអែរសូវៀត កម្លាំង២ Megawatt។ ទោះបី ឥន្ធនៈដែលមានបញ្ចូលក្នុងម៉ាស៊ីនប្រតិករនេះ ជា Uranium ចំរើនធាតុក្នុងកំរិតខ្ពស់ក្តី ក៏ប្រតិករនេះមិនអាចប្រើសំរាប់ផលិតធាតុ ឧទាហរណ៍ បែបយ៉ាង Plutonium ជាដើម ដែលអាចប្រើសំរាប់ផលិតអាវុធបរមាណូតែម្តង។
មកពីមូលហេតុនេះ បានជាការងារខាងបង្កើតអាវុធបរមាណូបានចាប់ផ្តើមឡើង នៅដើមទសវត្សទី៧០។ ការសម្រេចចិត្តផ្លូវនយោបាយនេះ ត្រូវបានអនុម័ត ក្រោយពីចារកិច្ចកូរ៉េខាងជើងយកការណ៍បានថាកូរ៉េខាងត្បូង មានទៅហើយកម្មវិធីបែបនេះ។
លុះក្នុងឆ្នាំ ១៩៧៤ កូរ៉េខាងជើង បានភ្ជាប់ខ្លួនទៅនឹងទីភ្នាក់ងារអន្តរជាតិខាងថាមពលបរមាណូ ហៅថា AIEA។ រួចក្នុងឆ្នាំនោះឯង ទីក្រុងព្យុងយ៉ាង បានសុំចិនឲ្យជួយបង្កើតអាវុធបរមាណូ បន្ទាប់មកពួកអ្នកឯកទេសកូរ៉េខាងជើង ត្រូវបានអនុញ្ញាតឲ្យមានវត្តមានក្នុងវាលវង់ល្បងពិសោធន៍បរមាណូរបស់ចិន។
ក្រោយមកកម្មវិធីនុយក្លេអ៊ែរកូរ៉េខាងជើងនាំជាក្តីបារម្ភដល់សហគមន៍អន្តរជាតិបានជាមានការចរចាសំដៅទប់មហិច្ឆតាកូរ៉េខាងជើងកុំឲ្យប្រើកម្មវិធីនេះ។
គួររំលឹកថា កិច្ចចរចានេះ បានចាប់ផ្តើម នៅខែសីហាឆ្នាំ២០០៣ ដោយមាន៦ប្រទេសចូលរួម ពោលគឺ ស.ប.ចិន ស.រ.អា. កូរ៉េខាងជើង កូរ៉េខាងត្បូង ជប៉ុន រុស្ស៊ី។ កិច្ចចរចា ៣ជុំដំបូង ដែលបានចប់ទៅនៅខែមិថុនាឆ្នាំ ២០០៤ ចប់ដោយគ្មានលទ្ធផលអ្វីទេ។ លុះនៅខែកញ្ញាឆ្នាំនោះ ទីក្រុងព្យុងយ៉ាងបានដកខ្លួនចេញក្រោយពីមានការប្រឈមទល់នឹងខ្លួនពីខាង ស.រ.អា និងជប៉ុន។
ក្នុងដំណាក់ទី១ ស.រ.អា. បានទាមទារមិនគ្រាន់តែឲ្យក្រុងព្យុងយ៉ាងបញ្ឈប់កម្មវិធីនុយក្លេអែរប៉ុណ្ណោះទេ តែក៏ឲ្យរុះរើចេញហេដ្ឋារចនាសម្ព័ន្ធនុយក្លអែរដែលក្រុងព្យុងយ៉ាងចេះបង្កើតបានទៅហើយ។ ជាថ្នូរ ស.រ.អា សុខចិត្តធានាសន្តិសុខកូរ៉េខាងជើង ហើយផ្តល់ជំនួយសេដ្ឋកិច្ច ព្រមទាំងផ្តល់ឲ្យទៅក្រុងព្យុងយ៉ាង គឺ Reacteurs nucleaires 2 ដើរដោយទឹកស្រាល។ សំខាន់បំផុត ក្រុងព្យុងយ៉ាង ឈប់ចូលរួមជារៀងរហូតក្នុងកិច្ចចរចានេះ ក្រោយពី ជប៉ុននិង ស.រ.អា ទាមទារឲ្យដាក់កម្មវិធីនុយក្លេអែរកូរ៉េខាងជើង ទៅនៅក្រោមការត្រួតត្រារបស់ទីភ្នាក់ងារAIEA ឬទៅនៅក្រោមការត្រួតពិនិត្យរបស់ គណៈកម្មការ៥ប្រទេសមហាអំណាច។ អ៊ីចឹងហើយ បានជារដ្ឋមន្ត្រីការបរទេសរុស្ស៊ី ក្នុងជំនួបជាមួយសមភាគីកូរ៉េខាងជើងថ្ងៃនេះ នឹងខិតខំអន្ទងក្រុងព្យុងយ៉ាងឲ្យវិលត្រឡប់ទៅកាន់តុចរចានោះវិញ។
ទំនាក់ទំនងសេដ្ឋកិច្ចកូរ៉េខាងជើងនិងរុស្ស៊ី
ក្នុងផ្ទៃសេដ្ឋកិច្ចនេះ គួរនិយាយថា នៅរុស្ស៊ីមានកម្មករកូរ៉េខាងជើងស៊ីឈ្នួលធ្វើការ នៅរុស្ស៊ី ចំនួន ពី១ម៉ឺន៥ពាន់ ដល់ ២ម៉ឺន៥ពាន់នាក់នៅតាមវិស័យសំណង់ និងកសិកម្ម រួចភាគច្រើន គឺផ្តុំនៅតំបន់ចុងបូព៌ារុស្ស៊ី។
ចំណែកខាងការផ្តោះប្តូរពាណិជ្ជកម្មវិញ គឺមានទំហំមិនធំទេ ត្រឹម១២០លានដុល្លារ ពីក្នុងនោះរុស្ស៊ីលក់ទៅ គឺ១០៧ លានជាប្រេងកាត និង រថយន្ត ម៉ាក Lada 500 គ្រឿង។ ហើយទិញចូល គ្រឿងហូបចុក ក្នុងទឹកប្រាក់តែ ១៣លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ