កម្ពុជាប្រារព្ធទិវាបុណ្យឯករាជ្យជាតិ ថ្ងៃ៩ វិច្ឆិកា
ទិវាបុណ្យឯករាជ្យជាតិ ថ្ងៃ៩វិច្ឆិកា គម្រប់ខួបលើកទី៥៨ ត្រូវបានប្រារព្ធឡើងយ៉ាងអធិកអធម នៅព្រឹកថ្ងៃពុធនេះ ក្រោមព្រះរាជាធិបតីភាពដ៏ខ្ពង់ខ្ពស់របស់ព្រះមហាក្សត្រ សម្តេចព្រះបរមនាថ នរោត្តម សីហមុនី និងប្រមុខដឹកនាំរដ្ឋាភិបាល រដ្ឋសភា ព្រឹទ្ធសភា នាម៉ឺនសព្វមុខមន្ត្រី ព្រមទាំងមហាជនយ៉ាងច្រើនកុះករ នៅវិមានឯករាជ្យ។ ទិវាបុណ្យឯករាជ្យ ជាការរំលឹកដល់ស្នាព្រះហស្តរបស់សម្តេចព្រះ នរោត្តម សីហនុ ដែលព្រះអង្គបានដឹកនាំធ្វើព្រះរាជបូជនីយកិច្ច ទាមទារឯករាជ្យពេញលេញពីប្រទេសបារាំង នៅថ្ងៃទី៩វិច្ឆិកា ឆ្នាំ១៩៥៣។ បារាំង បានធ្វើអាណាព្យាបាលលើកម្ពុជា ចាប់តាំងពីឆ្នាំ១៨៦៣។
ចុះផ្សាយនៅថ្ងៃ៖
ស្តាប់ - ០២:៤២
បុណ្យខួបអនុស្សាវរីយ៍ លើកទី៥៨ ទិវាបុណ្យឯករាជ្យជាតិ ថ្ងៃ៩ វិច្ឆិកា ធ្វើឡើងរយៈពេលបីថ្ងៃ ចាប់ពីថ្ងៃទី៩ ដល់ថ្ងៃទី១១វិច្ឆិកា ឆ្នាំ២០១១។ ពិធីនៅវិមានឯករាជ្យ ធ្វើឡើងក្រោមព្រះរាជាធិបតីភាពព្រះមហាក្សត្រ នរោត្តម សីហមុនី លោកនាយករដ្ឋមន្ត្រី ហ៊ុន សែន ប្រធានរដ្ឋសភាលោក ហេង សំរិន មន្ត្រីរាជការ សិស្សានុសិស្ស កងទ័ព និងមហាជនជាច្រើននាក់។ ប៉ុន្តែពិធីនៅព្រឹកមិញ គ្មានវត្តមានរបស់លោក ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជាទេ។
ទិវាបុណ្យឯករាជ្យជាតិ ថ្ងៃ៩វិច្ឆិកា ត្រូវបានប្រារព្ធឡើងជារៀងរាល់ឆ្នាំ ដើម្បីរំលឹកដល់ស្នាព្រះហស្តរបស់សម្តេចព្រះ នរោត្តម សីហនុ ដែលព្រះអង្គបានដឹកនាំធ្វើព្រះរាជបូជនីយកិច្ច ទាមទារឯករាជ្យពេញលេញពីប្រទេសបារាំង នៅថ្ងៃទី៩វិច្ឆិកា ឆ្នាំ១៩៥៣។ បារាំង បានធ្វើជាអាណាព្យាបាលលើកម្ពុជា ចាប់តាំងពីឆ្នាំ១៨៦៣។
នៅពេលចាប់ផ្តើមព្រះរាជពិធី ដែលមានការផ្សាយបន្តផ្ទាល់តាមវិទ្យុ និងទូរទស្សន៍ក្នុងស្រុក ព្រះករុណាសម្តេចព្រះបរមនាថ នរោត្តម សីហមុនី ស្តេចយាងប្រទានកម្រងផ្កា និងគោរពវិញ្ញាណក្ខន្ធ មុននឹងព្រះអង្គ ស្តេចយាងប្រទានភ្លើងជ័យ ដែលដង្ហែអមព្រះរាជដំណើរ ដោយលោកនាយករដ្ឋមន្ត្រី ហ៊ុន សែន លោក ហេង សំរិន និងសម្តេចសង្ឃ។ ភ្លើងជ័យ នៅវិមានឯករាជ្យ ត្រូវរក្សាទុករយៈពេល ៣ ថ្ងៃ។
ទិវាបុណ្យឯករាជ្យជាតិ នៅព្រឹកថ្ងៃ៩វិច្ឆិកានេះ គ្មានសេចក្តីថ្លែងការណ៍អ្វីទេ ក្រៅតែពីការស្រែកជ័យឃោស សាទរ អមដោយសំឡេងត្រែទ័ព។ ទិវាបុណ្យឯករាជ្យជាតិ នៅឆ្នាំនេះ បានធ្វើឡើង ចំពិធីបុណ្យអុំទូក រយៈពេលបីថ្ងៃ ចាប់ពីថ្ងៃទី៩វិច្ឆិកា ឆ្នាំ២០១១។ ក៏ប៉ុន្តែរដ្ឋាភិបាល បានលុបចោលពិធីប្រណាំងទូក នៅមុខព្រះបរមរាជវាំង ដើម្បីសន្សំថវិកាជាតិ សម្រាប់ជួយដល់ជនរងគ្រោះដោយសារទឹកជំនន់។
ក៏ប៉ុន្តែរយៈពេលបីយប់ ចាប់ពីយប់ថ្ងៃទី៩វិច្ឆិកា ឆ្នាំ២០១១ មានការបាញ់កាំជ្រួច នៅមុខវាំង។ ក្នុងនោះ ក៏មានការសម្តែងសិល្បៈជូនមហាជនទស្សនាកំសាន្តតាមទីធ្លាសាធារណៈ នៅវាលព្រះមេរុ នៅវត្តភ្នំ និងនៅមុខវត្តបទុមវតី។ ដោយឡែកស្តង់លក់ផលិតផលបញ្ចុះតម្លៃ សម្រាប់ពិធីបុណ្យអុំទូក មានតែនៅកោះពេជ្រមួយប៉ុណ្ណោះ។
កាលពីយប់ថ្ងៃបង្ហើយពិធីបុណ្យអុំទូកឆ្នាំមុន ថ្ងៃ២២វិច្ឆិកា មានឧបទ្ទវហេតុ ផ្អើលរត់ជាន់គ្នា នៅលើស្ពានកោះពេជ្រ បណ្តាលឲ្យមានមនុស្សយ៉ាងហោចណាស់ ៣៥៣ នាក់ បានស្លាប់ និងរបួសជិត ៥០០ នាក់ផ្សេងទៀត។
ក៏ប៉ុន្តែនៅឆ្នាំនេះ អាជ្ញាធរបានបង្កើនការប្រុងប្រយ័ត្ន និងធ្វើស្ពានថ្មី២បន្ថែមទៀត ដើម្បីចេញចូលតំបន់កោះពេជ្រ ខណៈដែលអ្នកមកលេងបុណ្យអុំទូក នៅភ្នំពេញឆ្នាំនេះ មិនមានច្រើនដូចរៀងរាល់ឆ្នាំឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ