អង្គការសមាគមជំរុញអោយរដ្ឋាភិបាលរៀបចំច្បាប់កំណត់ប្រាក់ឈ្នួលអប្បបរមាសម្រាប់ទាំងអស់គ្នា
មួយថ្ងៃមុនទិវាពលកម្មអន្តរជាតិ អង្គការសមាគមនៅក្នុងប្រទេសកម្ពុជាមួយចំនួនបានជំរុញអោយរដ្ឋាភិបាល រៀបចំច្បាប់កំណត់ប្រាក់ឈ្នួលអប្បបរមាសម្រាប់កម្មករក្នុងគ្រប់ វិស័យទាំងអស់។ ជាការឆ្លើយតប តំណាងក្រសួងការងារបានបញ្ជាក់ថា ក្រសួងបានគិតគូរពិចារណាលើបញ្ហានេះហើយប៉ុន្តែកិច្ចការនេះត្រូវការ ការសិក្សាល្អិតល្អន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
"រដ្ឋាភិបាលត្រូវតែរៀបចំច្បាប់កំណត់ប្រាក់ខែអប្បបរមាជូនកម្មករនៅក្នុងគ្រប់វិស័យទាំងអស់។ ប្រាក់ខែគោលត្រូវមានកម្រិតសមរម្យអាចរស់បានដោយថ្លៃថ្នូរ"។ នេះគឺជាការទាមរបស់អង្គការសមាគមមួយចំនួននៅក្នុងប្រទេសកម្ពុជាមួយថ្ងៃមុនពេលដែលពិភពលោកទាំងមូលនឹងរៀបចំទិវាពលកម្មអន្តរជាតិនៅថ្ងៃទី១ខែឧសភាស្អែកនេះ។
លោក វន ពៅ ប្រធានសមាគមសេដ្ឋកិច្ចក្រៅប្រព័ន្ធកម្ពុជាបានបញ្ជាក់នៅសៅរ៍នេះថា រាជរដ្ឋាភិបាលកម្ពុជាត្រូវកំណត់ប្រាក់ខែអប្បបរមាសមរម្យជូនកម្មករក្នុងគ្រប់វិស័យទាំងអស់ដូចជា ៖ វិស័យសេវាកម្មកសិកម្ម និងឧស្សាហកម្មជាដើម។ នាពេលកន្លងមក មានតែវិស័យឧស្សាហកម្មកាត់ដេរមួយតែប៉ុណ្ណោះដែលច្បាប់ការងារបានកំណត់ប្រាក់ខែអប្បបរមាក្រៅពីវិស័យនេះប្រាក់ខែអប្បបរមាត្រូវបានកំណត់ដោយថៅកែនៃសិប្បកម្មសហគ្រាសនិងក្រុមហ៊ុននីមួយៗ។ ប្រាក់ឈ្នួលអប្បបរមានៅក្នុងវិស័យកាត់ដេរត្រូវបានច្បាប់កំណត់ក្នុងកម្រិត៦១ដុល្លារក្នុងមួយខែ ប៉ុន្តែក្នុងវិស័យផ្សេងទៀតកម្មករទទួលបានប្រាក់ខែទាបជាងនេះច្រើនណាស់។
លោក វន ពៅ ប្រធានសមាគមសេដ្ឋកិច្ចក្រៅប្រព័ន្ធកម្ពុជាបានបញ្ជាក់ថា កម្មករក្នុងភោជនីយដ្ឋាន និងនៅក្នុងហាងសប្បាយមួយចំនួនផ្សេងទៀតទទួលបានប្រាក់បៀវត្សរ៍តែក្នុងរង្វង់ពី៣០ទៅ៥០ដុល្លារក្នុងមួយខែប៉ុណ្ណោះ។ ការទទួលបានប្រាក់ខែទាបយ៉ាងដូច្នេះជំរុញអោយកម្មការិនីមួយចំនួនបង្ខំចិត្តធ្វើតាមការសំណូមពររបស់ភ្ញៀវដែលជាទង្វើប្រាសចាកពីសីលធម៌របស់ខ្មែរ។ អវត្តមានច្បាប់កំណត់ប្រាក់ខែអប្បបរមា គឺជាការបើកឱកាសអោយថៅកែអាចកេងចំណេញកម្លាំងពលកម្មរបស់កម្មករបានយ៉ាងងាយ។ លោក ពៅ បានបន្តទៀតថា ប្រាក់ឈ្នួលអប្បបរមាគួរត្រូវកំណត់ក្នុងចន្លោះពី១២០ទៅ១៣០ដុល្លារអាមេរិកក្នុងមួយខែទើបកម្មករអាចរស់បាន។
លោក រ៉ុង ឈុន ប្រធានសហភាពសហជីពកម្ពុជាបាននិយាយនៅថ្ងៃសៅរ៍នេះដែរថា នៅពេលអនាគតលោកចង់អោយមានច្បាប់មួយកំណត់ប្រាក់ខែអប្បបរមាជូនកម្មករនៅក្នុងគ្រប់វិស័យទាំងអស់ពោលគឺមិនមែនគ្របដណ្ដប់តែក្នុងវិស័យកាត់ដេរមួយប៉ុណ្ណោះទេ។ លោក រ៉ុង ឈុន បានសម្ដែងការអាណិតអាសូរចំពោះកម្មករធ្វើការនៅក្នុងវិស័យក្រៅប្រព័ន្ធមួយចំនួនដែលទទួលបានប្រាក់ខែទាបជាង៥០ដុល្លារក្នុងមួយខែ។ ប្រាក់ឈ្នួលនេះមិនអាចអនុញ្ញាតអោយកម្មករអាចរស់បានទេប្រឈមទៅនឹងតម្លៃទំនិញនៅលើទីផ្សារ។
លោក អ៊ំ មាន រដ្ឋលេខាធិការក្រសួងការងារបានបញ្ជាក់ប្រាប់នៅថ្ងៃសៅរ៍នេះថា ក្រសួងការងាររបស់លោកបានគិតគូរអំពីច្បាប់កំណត់ប្រាក់ខែអប្បបរមាសម្រាប់កម្មករក្នុងគ្រប់វិស័យទាំងអស់តាំងពីយូរមកហើយ។ ប៉ុន្តែមុននឹងកំណត់បញ្ហានេះបាន ការសិក្សាម៉ត់ចត់មួយត្រូវតែធ្វើឡើងពីព្រោះពីវិស័យមួយទៅវិស័យមួយស្ថានភាពការងារ និងផលប្រយោជន៍ការងារមានលក្ខណៈខុសគ្នា។
អង្គការសមាគមដដែលបាននិយាយថា ដោយសារតែប្រាក់ខែទាប កម្មករ-កម្មការិនីមួយចំនួនបានសម្រេចចិត្តលក់ញើសឈាមនៅបរទេស និងមួយចំនួនផ្សេងទៀតសុខចិត្តលក់ខ្លួនប្រាណដើម្បីចិញ្ចឹមជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ