អស់៣ថ្ងៃជាប់គ្នារដ្ឋធានីរុស្ស៊ីបានក្លាយជាទីប្រជុំនៃអតីតនិស្សិតបរទេស
ពីថ្ងៃទី២៨ ដល់ ៣០ វិច្ឆិកាកន្លងទៅ ក្នុងក្រុងម៉ូស្គូមានប្រព្រឹត្តទៅ “ វេទិកាពិភពលោកលើកទី៣នៃបណ្តាពលរដ្ឋបរទេសដែលបានបញ្ចប់ការសិក្សា ហើយទទួលសញ្ញាប័ត្រ ពីគ្រឹះស្ថានឧត្តមសិក្សា ទាំងសម័យសូវៀត ទាំងសម័យប្រទេសរុស្ស៊ីថ្មី។ បានមកចូលរួមក្នុងវេទិកានេះ គឺប្រតិភូ ៨៨៨នាក់មកពី១៧០ប្រទេស មានមកពីកម្ពុជាផងដែរ។
ចុះផ្សាយនៅថ្ងៃ៖
ស្តាប់ - ០៣:០២
វេទិកាពិភពលោកនេះចាត់ចែងឡើងដោយក្រសួងអប់រំ និងវិទ្យាសាស្ត្ររុស្ស៊ី ទាំងមានការគាំទ្រពេញទី ពីខាងក្រសួងការបរទេសរុស្ស៊ី។ បានមកចូលរួម គឺប្រតិភូ ៨៨៨នាក់មកពី១៧០ប្រទេសហើយក្នុងចំនួនច្រើនជាងគេ គឺមកពីទ្វីបអាស៊ី អាហ្វ្រិក ប៉ុន្តែក្នុងចំនួនតិចជាង គឺមកពីទ្វីបអាមេរិក និងអឺរ៉ុប។
ថ្លែងសុន្ទរកថាបើកវេទិកានោះ លោករដ្ឋមន្ត្រីក្រសួងអប់រំ និងវិទ្យាសាស្ត្ររុស្ស៊ី Dmitri Livanov លើកយកតួលេខខ្លះមកបង្ហាញ៖ បច្ចុប្បន្ន ធ្វើការនៅតាមប្រទេសគេរៀងៗខ្លួន គឺមានអតីតនិស្សិតចំនួនជាង ១លាននាក់ឯណោះ ដែលបានទទួលសញ្ញប័ត្រពីគ្រឹះស្ថានឧត្តមសិក្សាសូវៀត និងរុស្ស៊ី។ គេធ្វើការសរុបទៅ គឺនៅតាម១៧០ប្រទេស ហើយមានមិនតិចទេ អ្នកដែលកាន់មុខតំណែងខ្ពស់ៗនៅក្នុងរដ្ឋខ្លួន បែបយ៉ាងជាតំណាងរាស្ត្ររដ្ឋមន្ត្រី នាយករដ្ឋមន្ត្រី និងជាប្រធានាធិបតីទៅផង។
សព្វថ្ងៃ នៅលើដែនដីសហព័ន្ធរុស្ស៊ីកំពុងក្រេបជញ្ជក់ចំណេះវិជ្ជានៅតាមគ្រឹះស្ថានឧត្តមសិក្សា ៧៥០កន្លែង គឺនិស្សិតបរទេសប្រមាណ ២សែន ៥ម៉ឺននាក់មកពី ១៥០ប្រទេស។ គោលដៅសំខាន់បំផុត ចោទដោយវេទិកា តាមដែលគណៈកម្មាធិការចាត់ចែងប្រកាសឲ្យដឹង គឺរក្សាទុកមុខមាត់ប្រទេសរុស្ស៊ី ជាមហាអំណាចផ្នែកសិក្សាធិការទាក់ទាញនិស្សិតបរទេស ឲ្យមកសិក្សានៅតាមគ្រឹះស្ថានឧត្តមសិក្សារុស្ស៊ី ពង្រឹងទំនាក់ទំនងរវាងអ្នកដែលចេញពីសាលាជាន់ខ្ពស់សូវៀត និងរុស្ស៊ីជម្រុញគេឲ្យនៅទ្រទ្រង់ជាប់ជានិច្ច ចំណងជាមួយប្រទេសរុស្ស៊ី គាំទ្រដល់សកម្មភាពគេ ខាងផ្សព្វផ្សាយភាសារុស្ស៊ី។
ភាសារុស្ស៊ី ជាភាសាការងារមួយ ក្នុងចំណោមភាសាការងារចំនួន៦ របស់អ.ស.ប. នៅទន្ទឹមនឹងភាសា៥ទៀត គឺភាសាបារាំង អង់គ្លេស ចិន អារ៉ាប និងអេស្បាញ។ ចេះនិយាយភាសារុស្ស៊ីសព្វថ្ងៃ គឺមនុស្សប្រមាណ ៣០០លាននាក់ពីក្នុងនោះ សឹងពាក់កណ្តាលគឺនៅក្នុងប្រទេសរុស្ស៊ីផ្ទាល់ ហើយក្រៅពីនេះ គឺនៅតាមអតីតសាធារណរដ្ឋសូវៀត១៤ទៀត ព្រមទាំងនៅតាមសហគមន៍ជាតិរុស្ស៊ីរស់នៅទ្វីបអឺរ៉ុប ទ្វីបអាមេរិក ប្រទេសអូស្ត្រាលី អ៊ីស្រាអែលជាដើម។
ករណីកម្ពុជា តាមតួលេខក្រសួងការបរទេសរុស្ស៊ី គឺមានប្រមាណ ៨.០០០នាក់ដែលចេះភាសារុស្ស៊ី។ បច្ចុប្បន្នសិក្សានៅរុស្ស៊ី គឺនិស្សិតប្រមាណ ១៥០នាក់ ព្រមទាំងសិស្សសាលាយោធា ២០នាក់ដែរ។ ប្រតិភូខ្មែរ ២នាក់ដែលត្រូវភាគីរុស្ស៊ីអញ្ជើញឲ្យមកចូលរួមក្នុងវេទិកាពិភពលោកលើកទី៣នេះ ម្នាក់គឺលោក សួន ប្រិយវណ្ណដែលបានទទួលសញ្ញាប័ត្រជាន់ខ្ពស់ក្នុងឆ្នាំ១៩៩០ នៅសាធារណរដ្ឋសូវៀត អ៊ុយក្រែន ធ្លាប់ធ្វើជាអនុព័ន្ធពាណិជ្ជកម្មនៃស្ថានទូតកម្ពុជានៅម៉ូស្គូ ពីឆ្នាំ២០០២ ដល់ឆ្នាំ២០០៨ ហើយសព្វថ្ងៃជាទីប្រឹក្សាលោក ជា ស៊ីម ប្រធានព្រឹទ្ធសភាកម្ពុជា។
ម្នាក់ទៀត គឺលោក ហូ សុខុម៉ាលី តាំងពី២៥ឆ្នាំមុនម៉្លេះ គឺក្នុងឆ្នាំ១៩៨៧ បានទទួលសញ្ញាប័ត្រជាន់ខ្ពស់នៅសាធារណរដ្ឋសូវៀត អ៊ូស្បេគីស្ថាន ហើយបច្ចុប្បន្ន ជាវិស្វករសំណង់ស៊ីវិលនៃក្រុមហ៊ុនសំណង់ឯកជននៅភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ