ទីភ្នាក់ងារវាយតម្លៃហានិភ័យ Moody’s បញ្ចុះពិន្ទុ២៨ធនាគារអេស្ប៉ាញពី១ទៅ៤កម្រិត
នៅថ្ងៃចន្ទទី២៥មិថុនាឆ្នាំ២០១២ម្សិលមិញ ទីភ្នាក់ងារវាយតម្លៃហានិភ័យ Moody’s បានប្រកាសឲ្យដឹងថា គេបានធ្វើការបញ្ចុះពិន្ទុ២៨ធនាគារអេស្ប៉ាញហើយនិងគ្រឹះស្ថានហិរញ្ញវត្ថុ២កន្លែងទៀត ពី១ទៅ៤កម្រិត។ ទាំងនេះក៏ពីព្រោះតែគេខ្វះទំនុកចិត្តទៅលើធនាគារនិងគ្រឹះស្ថានហិរញ្ញវត្ថុនៅក្នុងប្រទេសអេស្ប៉ាញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
សេចក្តីសម្រេចចិត្តធ្វើការបញ្ចុះពិន្ទុ២៨ធនាគារហើយនិងគ្រឹះស្ថានហិរញ្ញវត្ថុ២កន្លែងទៀត នៅក្នុងប្រទេសអេស្ប៉ាញ ក៏ពីព្រោះតែទីភ្នាក់ងារវាយតម្លៃហានិភ័យ Moody’s មានកង្វះទំនុកចិត្តទៅលើរដ្ឋាភិបាលអេស្ប៉ាញ ដូចមានការបញ្ចុះទម្លាក់ពិន្ទុបង្ហាញឲ្យឃើញកាលពីថ្ងៃទី១៣មិថុនាឆ្នាំ២០១២កន្លងទៅចំនួនបីកម្រិតមកនៅ “Baa3” ។ ទាំងនេះក៏ដោយហេតុតែគេខ្វះជំនឿជឿថា រដ្ឋាភិបាលអេស្ប៉ាញអាចមានសមត្ថភាពគ្រប់គ្រាន់ក្នុងការិះរកដំណោះស្រាយឲ្យបញ្ហាវិបត្តិប្រាក់បំណុលរបស់ខ្លួន។
ទីភ្នាក់ងារវាយតម្លៃហានិភ័យ Moody’s បានថ្លែងប្រាប់ឲ្យដឹងទៀតថា ការបញ្ចុះទម្លាក់ពិន្ទុ២៨ធនាគារហើយនិងគ្រឹះស្ថានហិរញ្ញវត្ថុ២កន្លែងទៀត នៅក្នុងប្រទេសអេស្ប៉ាញកាលពីថ្ងៃចន្ទទី២៥មិថុនាឆ្នាំ២០១២ម្សិលមិញ គឺ Moody’s ចង់គូសបញ្ជាក់ឲ្យឃើញពីការធ្លាក់ចុះទន់ខ្សោយនៃភាពរឹងមាំនៃឥណទានធនាគារអេស្ប៉ាញ ដោយទីភ្នាក់ងារវាយតម្លៃហានិភ័យ Moody’s យល់ឃើញថា ធនាគារនិងគ្រឹះស្ថានហិរញ្ញវត្ថុអេស្ប៉ាញមានជាប់ពាក់ព័ន្ធយ៉ាងធ្ងន់ជាមួយសកម្មភាពជួញទិញដូរអចលនទ្រព្យនៅក្នុងប្រទេសអេស្ប៉ាញ។ សកម្មភាពជួញទិញដូរអចលនទ្រព្យនៅក្នុងប្រទេសអេស្ប៉ាញដែលកំពុងតែជួបនឹងវិបត្តិដ៏សែនធ្ងន់ធ្ងរ។
ក្នុងចំណោមធនាគារនិងគ្រឹះស្ថានហិរញ្ញវត្ថុអេស្ប៉ាញទាំង៣០ដែលបានស្គាល់ការទម្លាក់បញ្ចុះពិន្ទុ មានចំនួន១៦អាចនឹងត្រូវទម្លាក់បញ្ចុះពិន្ទុបន្ថែមទៀតនៅរយៈពេលខ្លីឬមធ្យមខាងមុខ។ នេះជាការបញ្ជាក់របស់ ទីភ្នាក់ងារវាយតម្លៃហានិភ័យ Moody’s ។
គួរកត់សម្គាល់ថា ក្នុងចំណោមធនាគារអេស្ប៉ាញសំខាន់ៗ ធនាគារ Banco Popular បានឃើញចំណាត់ថ្នាក់របស់ខ្លួនធ្លាក់បាត់បង់អស់១កម្រិតមកនៅ “Baa1”។ រីឯធនាគារ Banco Santander វិញបានធ្លាក់បាត់បង់អស់២កម្រិតមកនៅ “Baa2” ដោយមានភ្ជាប់មកជាមួយនូវទស្សនវិស័យអវិជ្ជមាន។ ទាំងនេះបានសេចក្តីថា ទីភ្នាក់ងារវាយតម្លៃហានិភ័យ Moody’s អាចធ្វើការបញ្ចុះទម្លាក់ពិន្ទុបន្ថែមទៀតនៅរយៈកាលមធ្យមខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ