ម៉ូស្គូនឹង "ចំណាយតិច ប៉ុន្តែមានប្រសិទ្ធិភាព” តបនឹងក្រុងវ៉ាស៊ីនតោន
រុស្ស៊ីចាប់ផ្តើមត្រៀមទុកទៅហើយ នូវចម្លើយយោធា-បច្ចេកទេស តបនឹង“ប្រព័ន្ធខែលមីស្ស៊ីលប្រឆាំងមីស្ស៊ីល” ដែលអាមេរិកកំពុងដំឡើងនៅទ្វីបអឺរ៉ុប ក្រោយពីទីក្រុងវ៉ាស៊ីនតោន ប្រកែកមិនព្រមធានាជាលាយលក្ខណ៍អក្សរថា ប្រព័ន្ធនេះ ឥតតម្រង់ប្រឆាំងនឹងរុស្ស៊ីឡើយ។ ភាពត្រៀមខ្លួនបកវិញនេះ ចុះផ្សាយដោយកាសែតក្រុងម៉ូស្គូ Kommersant លេខថ្ងៃនេះ យោងទៅលើប្រភពមិនបញ្ចេញឈ្មោះក្នុងវិមានក្រេមឡាំង។
ចុះផ្សាយនៅថ្ងៃ៖
ស្តាប់ - ០២:០៥
មូលហេតុ គឺមកពីពេលថ្លែងក្នុងព្រឹទ្ធសភាអាមេរិកាំង ថ្ងៃពុធម្សិលម៉្ងៃ លោក Michael McFaul ដែលជា នាយកខាងមុខព្រួញប្រទេសរុស្ស៊ី នៅអម “ក្រុមប្រឹក្សាសន្តិសុខជាតិអាមេរិក” និងជាឯកអគ្គរដ្ឋទូតថ្មីរបស់ស.រ.អា. ប្រចាំនៅសហព័ន្ធរុស្ស៊ី បានប្រកាសជាផ្លូវការថា ទីក្រុងវ៉ាស៊ីនតោន គ្មានបំណងផ្តល់ឲ្យទីក្រុងម៉ូស្គូនូវ “ការធានាជាលាយលក្ខណ៍អក្សរ ប្រកបដោយធរមានជាច្បាប់” ថា “ប្រព័ន្ធខែលមីស្ស៊ីលប្រឆាំងមីស្ស៊ីល” ដែលអាមេរិកកំពុងដំឡើង នៅទ្វីបអឺរ៉ុប នឹងពុំតម្រង់ទល់នឹងកងកម្លាំងបរមាណូរបស់រុស្ស៊ីឡើយ។
លោក Michael McFaul ថ្លែងថា ភាគីរុស្ស៊ីនាកិច្ចចរចា ជុំវិញរឿង “ប្រព័ន្ធខែលមីស្ស៊ីលប្រឆាំងមីស្ស៊ីល” បានដាក់ចេញមកនូវការទាមទារ ដែលភាគីអាមេរិកមិនអាចយល់ព្រមតាមទាល់តែសោះ ម៉្លោះហើយបានជាកិច្ចចរចា ធ្លាក់ក្នុងស្ថានភាពទ័លច្រកតែម្តង។
ដូច្នេះ តាមដែលលោក Michael McFaul សន្និដ្ឋានការខ្វែងគំនិតគ្នានោះ មិនអាចនាំទៅកាន់ការធ្វើសម្បទានអ្វីណាឡើយ ជុំវិញសាច់រឿងដែលមានទាំងក្នុងជំនួបកំពូល រុស្ស៊ី-អូតង់ នៅក្រុង Chicago ស.រ.អា. ខែឧសភាឆ្នាំក្រោយ។
ចំណែកប្រតិកម្មពីខាងម៉ូស្គូ បើតាមប្រភពមិនបញ្ចេញឈ្មោះនៅវិមានក្រេមឡាំង គឺថា ៖ “ធាតុពិតនៃចេតនារបស់អាមេរិក ត្រូវរុស្ស៊ីឃើញច្បាស់ក្រឡែត។ គេដាក់ទិសសាងសង់ឲ្យទាល់តែបានមែន ប្រព័ន្ធខែលមីស្ស៊ីលប្រឆាំងមីស្ស៊ីលរបស់គេសម្រាប់ប្រចាំនៅទ្វីបអឺរ៉ុប ប៉ុន្តែគេមិនព្រមធានាថាប្រព័ន្ធនេះឥតសំដៅប្រឆាំងរុស្ស៊ីទេ។
ចម្លើយពីខាងរុស្ស៊ី ត្រូវតែមានជាដាច់ខាត។ ហើយចម្លើយរុស្ស៊ីទល់នឹងប្រព័ន្ធខែលអាមេរិកនោះ នឹងទាមទារឲ្យចំណាយតិចជាងអាមេរិក ប៉ុន្តែនឹងមានប្រសិទ្ធិភាពគ្រប់លើខែលមីស្ស៊ីលអាមេរិកនោះ។
រួចសូម្បីបើអាមេរិកស្រាប់តែនឹកឃើញ ចង់ផ្តល់ជាការធានាជាលាយលក្ខណ៍អក្សរមករុស្ស៊ីនោះ គឺវាលែងត្រូវទៅហើយ នឹងបំណងចង់បានរបស់រុស្ស៊ី ដ្បិតការធានានោះអាចមានសុពលភាព តែ ៥ឆ្នាំប៉ុណ្ណោះ។
ជាការកត់សំគាល់ ខែលអាមេរិកនោះ គឺបំពាក់ទៅដោយកងកាំជ្រួចធុន SM-3 ដែលអាចស្កាត់ចាប់ ហើយកម្ទេចកាំជ្រួចមីស្ស៊ីលដែលមានសមត្ថភាព បាញ់បង្ហោះទៅចម្ងាយពី ៣.០០០ ដល់៥.០០០គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ