បវរកញ្ញាហ្វីលីពីន ម៉េហ្កាន យុង ជាប់ឈ្មោះជាបវរកញ្ញាពិភពលោកឆ្នាំ២០១៣
នៅប្រទេសឥណ្ឌូណេស៊ី ក្នុងការប្រលងជ្រើសរើសបវរកញ្ញាពិភព កាលពីថ្ងៃសៅរ៍ម្សិលមិញនេះ គណៈកម្មការបានសំរេចជ្រើសយកបវរកញ្ញាហ្វីលីពីន ម៉េហ្កាន យុង អាយុ២៣ឆ្នាំ ជាបវរកញ្ញាពិភពលោកឆ្នាំ២០១៣។ បវរកញ្ញាបារាំង ម៉ារីន ឡរហ្វឺឡាំង ជាប់ចំណាត់ថា្នក់លេខ២ ហើយបវរកញ្ញាប្រទេសហ្កាណា ឈ្មោះ ការ៉ាន់ហ្សា អូកៃឡី ជាប់ចំណាត់ថ្នាក់លេខ៣។ អ្វីដែលគួរអោយកត់សម្គាល់ ក្នុងការប្រលងបវរកញ្ញានេះ គឺថា អាជ្ញាធរឥណ្ឌូណេស៊ី បានពង្រឹងសន្តិសុខយ៉ាងតឹងតែងបំផុត ដើម្បីចៀសផុតពីការរំខានអុកឡុក របស់អ្នកកាន់សាសនាអ៊ីស្លាមជ្រុលនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
តំណែងបវរកញ្ញាពិភពលោកឆ្នាំ២០១៣នេះ ត្រូវបានប្រគល់ទៅអោយបវរកញ្ញាប្រទេសហ្វីលីពីន គឺកញ្ញា ម៉េហ្កាន យុង អាយុ២៣ឆ្នាំ។ បវរកញ្ញាបារាំង និងបវរកញ្ញាហ្កាណា ជាប់ចំណាត់ថា្នក់ជាបវរកញ្ញារង លេខ២ និងលេខ៣ បន្តបន្ទាប់គ្នា។
កញ្ញា ម៉េហ្កាន យុង ជានិស្សិតផ្នែកភាពយន្ត មានកំណើតកើតជានៅសហរដ្ឋអាមេរិក។ ម៉េហ្កាន បានចាកចេញពីអាមេរិក នៅពេលនាងមានអាយុ១០ឆ្នាំ។ នាងធ្លាប់សំដែងកុនខ្លះៗដែរ ប៉ុន្តែ នាងចង់ក្លាយជាផលិតករភាពយន្ត នៅពេលអនាគត។
ការប្រកួតបវរកញ្ញាពិភពលោកឆ្នាំ២០១៣នេះ បានប្រព្រឹត្តទៅនៅកោះបាលី ឥណ្ឌូណេស៊ី។ កោះបាលី ធ្លាប់បានរងការវាយប្រហារភេរវកម្ម សម្លាប់មនុស្សជាង២០០នាក់ កាលពីឆ្នាំ២០០២។ អាជ្ញាធរបានដាក់ពង្រាយកងកម្លាំង និងសត្វឆ្កែជាច្រើនក្បាល ដើម្បីពង្រឹងសន្តិសុខអោយបានខ្ពស់បំផុត។ អាជ្ញាធរមិនបានជ្រើសយករដ្ឋធានីហ្សាកាតា ធ្វើជាទីកន្លែងប្រកួតបវរកញ្ញានោះទេ ព្រោះខ្លាចក្រុមអ៊ីស្លាមជ្រុលនិយម រំខានអុកឡុកការប្រលង។ កំពង់ផែកោះបាលី ក៏ត្រូវបានបិទដំណើរការផងដែរ ដើម្បីកុំអោយបណ្តាជនអ៊ីស្លាមជ្រុលនិយមទាំងនេះ ឆ្លងចូលមកធ្វើបាតុកម្មប្រឆាំងការប្រកួតនេះ។
គួររំលឹកថា ឥណ្ឌូណេស៊ី ជាប្រទេសកាន់សាសនាអ៊ីស្លាម ដែលមានប្រជាជនច្រើនជាងគេបំផុតលើពិភពលោក។ កន្លងមក ក្រុមអ៊ីស្លាមជ្រុលនិយម បានរិះគន់ការប្រកួតបវរកញ្ញាពិភពលោក ថាជាការប្រកួតសំរស់ស្រីពេស្យា។ បណ្តាជនជ្រុលនិយមអ៊ីស្លាមនានា បានគំរាមកំហែងថា នឹងធ្វើសកម្មភាពប្រឆាំងការប្រលងបវរកញ្ញាពិភពលោកនេះ។
នេះមិនមែនជាលើកទីមួយទេ ដែលការប្រកួតបវរកញ្ញាពិភពលោក បានបង្កជាភាពតានតឹង។ កន្លងមក ការប្រកួតនេះធ្លាប់បានបង្កអោយមានអំពើហិង្សាទៀតផង។ បែបយ៉ាង នៅឆ្នាំ២០០២ ការប្រកួតដែលគ្រោងធ្វើ នៅប្រទេសនីហ្សេរីយ៉ា ត្រូវបានលើកទៅធ្វើនៅអង់គ្លេសវិញ ដោយសារតែនីហ្សេរីយ៉ា រងអំពើហិង្សាបង្កឡើងដោយ អ្នកកាន់សាសនាអ៊ីស្លាម និងគ្រិស្តសាសនិក ដែលកាលណោះ អំពើហិង្សាបានសម្លាប់មនុស្សរាប់រយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ