ក្រសួងការបរទេសកម្ពុជាព្រមានអ្នកការទូតបរទេស
ក្រោយពីមានសេចក្តីថ្លែងការណ៍របស់បេសកជនការទូតរបស់អាមេរិក និងរបស់ប្រតិភូសហភាពអឺរ៉ុបរិះគន់សម័យប្រជុំសភាដំបូង និតិកាលទី៥របស់កម្ពុជា ក្រសួងការបរទេសកម្ពុជាបានប្រតិកម្មជាផ្លូវការភា្លម តបទៅឯកអគ្គរដ្ឋទូតទាំងនោះ។ ក្រសួងការបរទេសកម្ពុជាថ្លែងថា កម្ពុជាមិនត្រូវការអោយបេសកជនការទូតណា ទទួលស្គាល់លទ្ធផលបោះឆ្នោត និងគាំទ្រគណបក្សនយោបាយណាមួយនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
កម្ពុជាមិនមែនជារដ្ឋដែលគ្មានច្បាប់ទំលាប់របស់ខ្លួននោះឡើយ។ កម្ពុជាមិនអាចទទួលយកអាកប្បកិរិយាក្រអឺត អួតអាងរបស់ឯកអគ្គរដ្ឋទូតប្រទេសណាមួយនោះទេ។ នេះគឺជាប្រតិកម្មរបស់អ្នកនាំពាក្យក្រសួងការបរទេសកម្ពុជា ដែលត្រូវបានផ្សព្វផ្សាយតាមរយៈសេចក្តីថ្លែងការណ៍មួយ កាលពីថ្ងៃចន្ទ។ ប្រតិកម្មនេះត្រូវបានចេញផ្សាយដើម្បីឆ្លើយតបទៅនឹងការអត្ថាធិប្បាយរបស់ឯកអគ្គរដ្ឋទូតអាមេរិក និងឯកអគ្គរដ្ឋទូតសហភាពអឺរ៉ុបប្រចាំកម្ពុជា។
បេសកជនការទូតទាំងពីរដែលបាននិយាយដោយផ្ទាល់ និងដោយប្រយោល មិនទទួលស្គាល់លទ្ធផលបោះឆ្នោតរបស់កម្ពុជា និងមិនយល់ស្របចំពោះការបើកសម័យប្រជុំសភាដំបូងកាលពីថ្ងៃចន្ទ។ ឯកអគ្គរដ្ឋទូតទាំងពីរទទូចអោយមានការដោះស្រាយបញ្ហាបោះឆ្នោត និងអោយមានការចូលរួមពីគណបក្សជាប់ឆ្នោតទាំងពីរ នៅក្នុងរដ្ឋសភា។
នៅក្នុងសេចក្តីថ្លែងការណ៍របស់ខ្លួន អ្នកនាំពាក្យក្រសួងការបរទេសកម្ពុជាបានសរសេរថា កម្ពុជាមិនត្រូវការការទទួលស្គាល់ណាមួយពីបេសកជនការទូតរបស់ប្រទេសណាមួយ ចំពោះលទ្ធផលបោះឆ្នោត និងការគាំទ្ររបស់ពួកគេចំពោះគណបក្សនយោបាយនៅកម្ពុជាឡើយ។ ហើយថា បញ្ហានៃភាពមិនប្រក្រតីនៃការបោះឆ្នោតនោះ ក៏ត្រូវដោះស្រាយតាមរយៈស្ថាប័នមានសមត្ថកិច្ចរបស់កម្ពុជារួចរាល់អស់ហើយដែរ។
ទាក់ទងនឹងការពិភាក្សាជាមួយគណបក្សសង្គ្រោះជាតិនោះ អ្នកនាំពាក្យក្រសួងការបរទេសបញ្ជាក់ថា គណបក្សប្រជាជនកម្ពុជាបានបើកទ្វារចំហជានិច្ចសម្រាប់ការជជែកដោះស្រាយបញ្ហាជាមួយគណបក្សសង្គ្រោះជាតិនោះ។
ដោយឆ្លើយតបទៅនឹងការអត្ថាធិប្បាយរបស់អ្នកការទូតបរទេស ក្រសួងការបរទេសក៏បាននិយាយរម្លឹកឡើងវិញ អំពីសន្ធិសញ្ញាទីក្រុងវីយ៉េនឆ្នាំ១៩៦១ ស្តីអំពីទំនាក់ទំនងការទូត។ មាត្រា៤១នៃសន្ធិសញ្ញានេះចែងថា ដោយមិនមានព្យសនកម្មប៉ះពាល់ដល់បុព្វសិទ្ធ និងអភ័យឯកសិទ្ធរបស់ពួកគេ បុគ្គលិកទូតដែលមានបុព្វសិទ្ធ និងអភ័យឯកសិទ្ធនេះ ត្រូវមានភារកិច្ចគោរពច្បាប់ និងបទបញ្ញត្តិរបស់រដ្ឋម្ចាស់ផ្ទះ។ បុគ្គលិកទាំងអស់នោះ ក៏មិនត្រូវជ្រៀតជ្រែកកិច្ចការផ្ទៃក្នុងរបស់រដ្ឋម្ចាស់ផ្ទះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ