នៅសប្តាហ៍មុន អស់លោកអ្នកនាងបានជ្រាបអំពីភាពខុសគ្នានៃជំងឺឈឺពោះ និងការប្រុងប្រយ័ត្នទាំងឡាយ នៅពេលអាការៈឈឺពោះស្តែងឡើងនៅម្តុំខាងស្តាំ ផ្នែកខាងក្រោមនៃពោះ ព្រោះវាអាចបណ្តាលមកពីជំងឺពោះវៀនដុះខ្នែង។ នៅថ្ងៃពុធសប្តាហ៍នេះ លោកវេជ្ជបណ្ឌិត ឡោ គីមសុង សូមជម្រាបជូនអស់លោកអ្នកនាងអំពីមូលហេតុផ្សេងៗនៃការឈឺពោះរបស់បណ្តាជនបរទេស និងបណ្តាជនខ្មែរ ដែលបានចាកចេញពីស្រុកកំណើតយូរ ពេលត្រឡប់ទៅវិញភាគច្រើន តែងនាំយកជំងឺឈឺពោះមកជាមួយ។ ពេលខ្លះវាមិនមែនជាជំងឺអ្វីធ្ងន់ធ្ងរ គួរឲ្យព្រួយបារម្ភខ្លាំងទេ ប៉ុន្តែដោយហេតុតែទម្លាប់នៃការប្រើប្រាស់ថ្នាំមិនត្រឹមត្រូវ ជាពិសេសការប្រើប្រាស់ថ្នាំផ្សះ “Antibiotique » បានធ្វើឲ្យមេរោគមួយចំនួនស្គាល់ ព្រមទាំងធន់នឹងប្រសិទ្ធិភាពរបស់ថ្នាំនោះ។
នៅក្នុងប្រទេសក្រីក្រ និងពេលដែលការគោរពអនាម័យ មិនទាន់បានត្រឹមត្រូវ និងគ្រប់គេសង្កេតឃើញថាមេរោគឆ្លង ប៉ារ៉ាស៊ីត មានវត្តមាននៅគ្រប់ទីកន្លែងទាំងអស់ ដូចជានៅតាមបន្លែ ផ្លែឈើ សាច់ ជាពិសេសទឹក។ ដូច្នេះសម្រាប់បណ្តាជនដែលធ្លាប់រស់នៅទីស្អាត មានអនាម័យគ្រប់គ្រាន់ នៅពេលបានជួបមេរោគ ឬមីក្រុបភ្លាម ពួកគាត់ងាយនឹងធ្លាក់ខ្លួនឈឺណាស់។
និយាយបែបនេះ មិនមែនបានន័យការរក្សាអនាម័យគ្មានប្រយោជន៍ទេ ប៉ុន្តែពាក្យថា “មានអនាម័យ ឬរក្សាអនាម័យ” ត្រូវធ្វើឡើងគ្រប់ពេលវេលា និងទីកន្លែង ពោលគឺ ខ្លួនប្រាសយើងក៏ស្អាត រីឯបរិស្ថានដែលនៅជជុំវិញខ្លួនក៏ត្រូវតែស្អាតដែរ ! នោះទើបអាចចាត់ទុកថាមានអនាម័យ និងនាំមកនូវសុខភាពល្អ។ ការទម្លាប់នៅក្នុងទីមិនស្អាត ទោះបីជាពេលខ្លះគេអាចទ្រាំទ្រនឹងប្រឈមនឹងមីក្រុម ឬមេរោគខ្លះបាន ព្រោះខ្លួនប្រាណមានអង្គបដិបក្ខប្រាណ Anticorps ក៏ដោយ ក៏ក្នុងករណីមានមេរោគសាហាវ គេមិនអាចទប់ទល់បានទេ។ ឧទាហរណ៍ជំងឺអាសន្នរោគ និងគ្រុនពោះវៀន។
ដូច្នេះ ត្រូវចេះការពារប្រសើរជាងព្យាបាល វិធីការពារដែលសាមញ្ញា និងងាយស្រួលបំផុត គឺត្រូវលាងដៃឲ្យបានញឹកញាប់ ជាពិសេសមុនពេលទទួលទាន។ សូមពិសារតែអាហារឆ្អិន ទឹកដាំពុះ។ ផ្លែឈើត្រូវលាង និងចិតសំបកមុននឹងបរិភោគ។ នៅមុនពេលធ្វើដំណើរទៅកាន់ប្រទេសក្រីក្រ អន់ថយ ផ្នែកអនាម័យ យើងអាចរកចាក់ថ្នាំការពារ មានជាអាទិ៍ជំងឺគ្រុនចាញ់ គ្រុនពោះវៀន អាសន្នរោគ។
កំណត់សម្គាល់មួយដែលគួរចងចាំ គឺការប្រើប្រាស់ថ្នាំឲ្យបានត្រឹមត្រូវ។ នៅក្នុងប្រទេសក្រីក្រកំពុងអភិវឌ្ឍន៍ ការប្រើប្រាស់ថ្នាំផ្សះ ប្រព្រឹត្តទៅគ្រប់ទិសទី និងទិញដូរបានដោយសេរី ហើយដោយហេតុបញ្ហាថវិកា អ្នកជំងឺមិនបានប្រើប្រាស់ថ្នាំតាមកំរិតបរិមាណ និងពេលវេលាកំណត់ទេ។ កាយវិការនេះបានជំរុញឲ្យយើងជួបផលវិបាកនៅថ្ងៃក្រោយ មាននោះគឺខ្លួនប្រាណយើងមានសភាពធន់នឹងថ្នាំ។ ថ្នាំខ្លាំង និងពូកែយ៉ាងណា ក៏លែងមានប្រសិទ្ធិភាពដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ