ប្រធានរដ្ឋសភាប៉ូឡូញ លាពីតំណែង ក្រោយរឿងអាស្រូវ ជិះយន្តហោះរដ្ឋសម្រាប់កិច្ចការផ្ទាល់ខ្លួន
ថ្ងៃទីព្រហស្បតិ៍ ទី៨សីហា ប្រធានរដ្ឋសភាប៉ូឡូញ លោក Marek Kuchcinski (ម៉ារេក គួចជីនស្គី) បានសុំលាលែងពីតំណែង ក្រោយបែកធ្លាយរឿងអាស្រូវ យកយន្តហោះរបស់រដ្ឋ ដើម្បីជិះដំណើរកម្សាន្ត សម្រាប់ក្រុមគ្រួសារនិងមិត្តភក្តិបក្សពួករបស់ខ្លួន។ រឿងអាស្រូវនេះ ធ្លាយចេញតាមរយៈកាសែតនៅក្នុងស្រុក និងតាមការចោទប្រកាន់របស់គណបក្សប្រឆាំង។ បើតាមគម្រោង នៅថ្ងៃសុក្រទី៩សីហា អ្នកតំណាងរាស្ត្រនឹងជជែកពិភាក្សាដេញដោលគ្នាចំពោះសំណុំរឿងនេះ ក៏ប៉ុន្តែ ដោយសារតែប្រធានសភាបានសុំចុះចេញពីតំណែងទៅហើយ សវនាការជជែកពិភាក្សា ក៏ត្រូវលុបចោលដែរ។
ចុះផ្សាយនៅថ្ងៃ៖
ប្រធានរដ្ឋសភាប៉ូឡូញ ម៉ារេក គួចជីនស្គី បានប្រើប្រាស់ឧទ្ធម្ភាគចក្រ និងយន្តហោះយោធា ជាច្រើនគ្រឿង ដែលជាសម្ភារៈរបស់រដ្ឋ ដើម្បីជិះសម្រាប់ប្រយោជន៍ផ្ទាល់ខ្លួន គឺជិះមិនតិចជាង១០០ដងនោះទេ នៅក្នុងអំលុងចន្លោះពេល ពីខែមីនា២០១៨ រហូតដល់ ខែឧសភា ២០១៩។ នេះបើយោងតាមឯកសារដែលលាតត្រដាងឡើងដោយក្រុមបក្សប្រឆាំងនិងបានត្រូវចុះផ្សាយព្រោងព្រាតក្នុងទំព័រកាសែត។
ឯកសារភស្តុតាងបង្ហាញថា លោកប្រធានរដ្ឋសភាប៉ូឡូញ បានរួមដំណើរជាច្រើនលើក ស្ទើររាប់ភ្លេច ជិះជាមួយក្រុមគ្រួសារ ប្រពន្ធកូន និងមិត្តភក្តិ រួមទាំងសមាជិកអ្នកនយោបាយនៅបក្សជាមួយគ្នា ដោយប្រើប្រាស់ជើងយន្តហោះសាធារណរបស់រដ្ឋ សម្រាប់ជិះទៅលេងស្រុកកំណើត គឺជិះចេញពីរដ្ឋធានី វ៉ាសូវី ទៅកាន់ក្រុងរ្សែសស្សូវ Rzeszow ភាគអគ្នេយ៍នៃប្រទេស ដែលស្រុកកំណើតរបស់ខ្លួន។
ចំណែក ភរិយារបស់លោកវិញ នៅពេលខ្លះ បានជិះយន្តតែម្នាក់ឯង ដោយគ្មានស្វាមីជិះជាមួយទេ។ បន្ថែមពីនេះ លោកប្រធានរដ្ឋសភា បានប្រើប្រាស់គម្រោងថវិការសម្រាប់អភិវឌ្ឍវិស័យយោធា ទៅចាយវាយចំណាយលើថ្លៃជិះយន្តហោះរបស់ប្រពន្ធគាត់ទៀតផង។
នេះបើតាមការចែងក្នុងរដ្ឋធម្មនុញ្ញ មុខតំណែងជាប្រធានរដ្ឋសភាប៉ូឡូញ គឺជាមនុស្សសំខាន់ទី២ សម្រាប់ប្រទេស។ លោក ម៉ារេក គួចជីនស្គី ប្រកាសចុះចេញពីមុខតំណែងនេះ ក្រោយពីជជែកពិភាក្សាយ៉ាងយូរ ជាមួយថ្នាក់ដឹកនាំគណបក្សអភិរក្សជាតិនិយមរបស់ខ្លួន។ ទោះបីជាប្រកាសសុំឈប់ពីតំណែងក្តី តែលោកនៅតែអះអាងថា សកម្មភាពដែលខ្លួនជិះយន្តហោះរដ្ឋកន្លងមកនោះ គឺមិនបំពានរំលោភច្បាប់អ្វីឡើយ។ តែលោកក៏បានថ្លែងសុំទោសប្រជាជាតិ ប្រសិនបើទង្វើរបស់ខ្លួនធ្វើឱ្យប៉ះពាល់ផ្លូវចិត្តរបស់ពលរដ្ឋ។
ចំពោះគណបក្សប្រឆាំងប៉ូឡូញ គឺនៅមិនអស់ចិត្តទេ។ ពួកគេបានថែមទាំងចោទថា នៅមានសមាជិករបស់បក្សកាន់អំណាចជាច្រើននាក់ទៀត ដែលក៏បានប្រើប្រាស់ជើងហោះហើរដោយចាយលុយរដ្ឋ ខុសច្បាប់ ហើយបំពានអំណាចរដ្ឋ។ ក្នុងសំណុំរឿងដូចគ្នានេះ ពួកបក្សប្រឆាំងក៏បានចោទប្រកាន់ដែរ ចំពោះអតីតប្រធានាធិបតីប៉ូឡូញ លោក ដូណាល់ ថាស់ ដែលបច្ចុប្បន្នជាប្រធានក្រុមប្រឹក្សាអឺរ៉ុប ជិតផុតអាណត្តិ ថាបានប្រើយន្តហោះរបស់រដ្ឋ សម្រាប់ជិះដំណើរ ដើម្បីកិច្ចការផ្ទាល់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ